Ons taal

In ’n winkelsentrum in my woonbuurt is daar ’n tuisnywerheid wat heerlike pannekoek verkoop. By die deur staan daar ’n klein swartbord op ’n staandertjie wat hierdie lekkerny verkondig. ’n Paar jaar gelede het daar een Saterdagoggend gestaan:Pannekoek N$6 elkPensioenarisse N$5 elkMy eerste gedagte was dat pensioenarisse hier verkoop word, en dat hulle boonop goedkoper is as pannekoek. Miskien kon ek ’n pensioenaris vir net N$5 koop, en dié sou dan vir my soveel pannekoek kon bak as wat ek wou hê. Natuurlik beteken dít wat op die bord gestaan het nie wat ék in my belaglike bui daarin gelees het nie. Maar hiér is die vraag: Waarom nie? Waarom verstaan ek dat “Pannekoek N$6 elk” beteken “Jy kan hier pannekoek koop teen N$6 elk”, en “Pensioenarisse N$5 elk” beteken “Pensioenarisse betaal net N$5 per pannekoek”? Die beantwoording van hierdie soort vraag en vele ander is die taak van die fassinerende onderafdeling van die taalkunde wat ons die pragmatiek noem. In die pragmatiek probeer ons presies verklaar waarom my eerste interpretasie niks meer as ’n grap kan wees nie, en waarom almal ten spyte van die oënskynlik minimale uitdrukking op die bord dit tog reg interpreteer. Die pragmatiek is eintlik niks anders nie as taalkundige kommunikasieteorie. ’n Groot klomp navorsing in hierdie veld gaan oor hoe ’n mens afleidings maak uit iemand se taalgebruik, en hoe ons dinge kan begryp wat eintlik nooit gesê word nie. In my volgende klompie bydraes gaan ek ’n bietjie verder daaroor gesels.Prof. Herman BeyerVakgroep AfrikaansUniversiteit van Namibiëhbeyer@unam.na

Ons taal

Kommentaar

Republikein 2026-05-15

Meld asseblief aan om kommentaar te lewer

Ons taal

Kommentaar

Republikein 2026-05-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.