Ons moet eers in ons self belê

Augetto Graig - Die hele land is nou besig om na beleggings te soek, maar my vraag is belê ons in onsself; belê ons in mekaar? Hoe kan ons verwag dat ander mense van ver af moet kom en in ons belê as ons nie self hier belê nie? U mag vra hoe mens moet belê as daar dan nie geld is nie. My antwoord is dat geld die laaste ding is wat mens in homself of in mekaar moet belê. Die eerste ding wat ons in onsself en in ons mede-Namibiërs moet belê, is tyd. Maak meer tyd vir jouself. Maak meer tyd vir jou familie, vir jou bure, vir jou medemense. Met die belegging van tyd in onsself en in mekaar kom die kennis van self en die kennis van ons medemense. Die feit dat Namibië so vol verskillende mense is, maak dit so maklik vir ons om al die mense in groepe te rangskik en om hul individuele waardigheid weg te gooi.Ons ken ons dan skaars self goed genoeg. As mens jouself goed ken, is dit veel makliker om ander mense te sien vir wie hulle is en so te aanvaar. Omdat ons so min tyd aan onsself bestee, so min moeite belê om ons self te leer ken, aanvaar ons te veel van onsself as vanselfsprekend. Ons vra onsself nie af oor wat ons regtig glo nie, wat ons regtig voel nie, waarvoor ons regtig sal opstaan nie. Ons los dit vir ander om vir ons te sê wat reg en verkeerd is. Ons glo die dominee, die polisieman, die politikus, want ons wil net nie die tyd neem ons self te ondervra nie. Nog minder neem ons die tyd om mekaar reg te leer ken. Ons leer nie mekaar se tale nie, ook nie mekaar se maniere nie of mekaar se belange nie. In plaas daarvan aanvaar ons maar algemene beskrywings van mekaar en algemene leuens. Ons aanvaar maar dat die wat anders as ons is, daarom ook slegter as ons is. Ons belê nie die tyd of die moeite om mekaar reg te leer ken nie en dit los ons almal met minder. Na alles kan niemand stry dat ons wat hier is die beste kans het om te weet waar die goue geleenthede is nie. Maar as ons dan nie hier waar ons is in onsself belê nie, hoe sal ons weet wat hier moontlik is. Moet ons liewer wag vir ander om van ver af te kom en vir ons te sê wat ons kan bereik, wat ons kan regkry? As dit wel so moet gebeur kan ons maar verseker wees dat die wat van ver af kom hul eie belange op die hart sal dra en net sal kom om ons hier uit te buit. As dit gebeur, kan ons almal maar net weet dat dit ons eie skuld is. Daar is niemand om dan te blameer nie, behalwe ons self.My boodskap aan my mede-Namibiërs en aan myself is so eenvoudig. Belê in jouself, in jou medemens en in jou eie land. Ons is die mense wat die meeste daarby kan baat, maar belangriker is die feit dat ons die mense is wat die meeste kan verloor.

Ons moet eers in ons self belê

Kommentaar

Republikein 2025-06-26

Meld asseblief aan om kommentaar te lewer

Ons moet eers in ons self belê

Kommentaar

Republikein 2025-06-26

Meld asseblief aan om kommentaar te lewer

MELD AAN

Advertensie