Ons Mense: Vetkoek vir voorspoed

Tanja Bause – “Welkom by die Vetkoek Palace! Hoe kan ek help?” Só word mense vriendelik by Emma Gontes se vetkoekpaleis in Windhoek begroet. Emma is op Mariental gebore en het as een van nege kinders daar grootgeword en skoolgegaan.“Ek het nie met skool klaargemaak nie, en moes Windhoek toe kom om werk te soek.”Met haar aankoms in die hoofstad in 1988 het sy huiswerk om den brode gedoen.“Ek was ook ’n kassier in ’n videowinkel toe videowinkels nog bestaan het,” sê sy. Emma was ook ’n kassier by onder meer ’n slaghuis, vulstasie en groentewinkel. “Die salaris as kassier is nie baie nie, en ek het aan planne gedink hoe ek my inkomste kan verbeter en dalk ook met my eie besigheid kan begin. Dit is hoe die idee van vetkoek maak en verkoop opgekom het.” Sowat 16 jaar gelede het sy haar eerste vetkoeke by die Soweto-opemark in Katutura begin verkoop. “Ek het my eerste vetkoeke vir 50 sent verkoop. Vandag kos hulle N$3,” sê sy. Ná twee jaar wou Emma haar besigheid uitbrei.“Ek woon in Goreangab en het besluit om met ’n emmer vol vetkoeke na die bushalte te gaan en hulle daar te verkoop aan mense wat op pad werk toe is. Hulle het toe reeds N$1 gekos.”Sy het die vetkoeke in plastieksakkies gesit en soos die bus aangekom het, het sy gehardloop en “vetkoekies, vetkoekies” geroep. “Die mense het my ‘Koekie’ begin noem en my vetkoeke het vinnig verkoop. As ek nie almal verkoop het nie, het ek op die bus geklim en saam gery tot almal verkoop was, en dit is hoe ek by die bushalte in Klein Windhoek beland het.”Dít was sewe jaar gelede. Emma vertel sy het met ’n emmer vol vetkoek van die bus afgeklim, wat baie vinnig net daar in Klein Windhoek op die sypaadjie uitverkoop het.“Die mense het van my vetkoek gehou, en ek het begin om stukkies gaar boerewors op die spyskaart te sit. Ek het ’n stoel, sambreel en opvoutafel gekoop om dit vir myself gemakliker te maak. Ek het intussen ook ’n taxi gehuur wat my soggens met al my bagasie by my huis kom optel en by die bushalte kom aflaai het, en saans huis toe gevat het.”Emma maak die vetkoekdeeg saans om 20:00 aan en laat dit staan om te rys. “Aan die begin toe ek net vetkoeke verkoop het, het ek elke dag 300 gemaak. Nou maak ek net 150 omdat daar nog baie ander kos op my spyskaart is. Ek maak die deeg en sit hom eenkant, dan staan ek 01:00 op om die vetkoeke te bak sodat ek voor 06:00 by die Vetkoek Palace kan wees wanneer die eerste mense op pad werk toe van die busse af klim.”Emma verkoop intussen ook hoenderpote en lewer, vis, vleis, pap, toebroodjies, lekkers, skyfies en sap.Sy het haar sambreel in ’n stadium vir ’n kleinerige tent verruil.“Maar die son het die tent aanhoudend verniel en ek het besluit dit is ’n te groot uitgawe. Ek het laas jaar September besluit om die Vetkoek Palace te bou.“Hoewel ek nou baie ander eetgoed verkoop, het alles met vetkoek begin. Die mense hou die meeste van die vetkoek en dit is altyd eerste uitverkoop. Ek het my eerste geld met vetkoeke verdien en dus het dit sin gemaak dat ek die woord vetkoek in my besigheid se naam gebruik,” sê sy. Emma het haarself geleer vetkoek maak.“Ek weet nie waar ek dit vandaan het nie, maar ek het net eendag gedink dit is wat ek wil doen en meel gekoop en begin. Ek het die deeg gemeng, gebak en geproe tot dit reg was. Ek het ook agtergekom jy moet in die somer minder gis gebruik, anders proe die vetkoek nie lekker nie. Alles moet reg en presies wees – die sout, suiker en gis – dit is iets wat ek uitgevind het deur te toets en te proe tot die resep perfek was.” Emma is ’n ma van vyf kinders, waarvan twee nog op skool is en drie werk.“Ek wil jongmense aanmoedig wat nie werk kry nie, om hul hande te gebruik en iets te doen. Maak klere, maak kos, doen iets. Jy kan selfs ysies maak en dit vanuit jou huis verkoop. Solank jy iets doen en nie ledig by die huis sit en wag nie. Die N$1 wat jy nou vir jou werk kry, klink nie soos baie nie, maar baie van die N$1 is baie geld.”– tanja@republikein.com.na

Ons Mense: Vetkoek vir voorspoed

Kommentaar

Republikein 2025-05-07

Meld asseblief aan om kommentaar te lewer

Ons Mense: Vetkoek vir voorspoed

Kommentaar

Republikein 2025-05-07

Meld asseblief aan om kommentaar te lewer

MELD AAN

Advertensie