Onnies stel ultimatum oor salarisse

Augetto Graig - Die Namibië Nasionale Onderwysersunie (Nantu) met sy bykans 17 000 lede het eerste minister Saara Kuugongelwa-Amadhila gister vyf werksdae gegee om die raamwerk vir salarisonderhandelinge te verander om ’n dooie punt te vermy.As sy teen eerskomende Maandag nog nie gereageer het nie, gaan die vakbond die dispuut na die arbeidskommissaris, mnr. Bro-Matthew Shinguadja, verwys, het Nantu se sekretaris-generaal, mnr. Basilius Haingura, gesê. Daarna het Shinguadja net 30 dae om ’n ooreenkoms te bewerkstellig voordat onderwysers landswyd ander stappe sal doen, sê hy. Haingura sê die dispuut is een van belange eerder as een van regte. Dus sal daar geen arbitrasiestap in die proses wees nie voordat die arbeidskommissaris amptelik ’n dispuut mag verklaar en die onderwysers daardeur die opsie van ’n wetlike staking te gee.Verlede jaar het die regering met staatswerkers ooreengekom om middelvlak-verdieners vanjaar ’n verhoging van 5% te gee, maar Haingura sê die onderwysers het dit nooit onderteken nie. Nou eis hulle 8%, omdat 5% minder as die heersende inflasie is. Namibië se gemiddelde inflasiekoers vir 2015 was 3,4%, maar teen die einde van April het dit reeds op 6,3% gestaan. Haingura sê dis hoog tyd dat die regering ophou om onderwysers om die bos te lei. “Die regering weerspreek homself. Dit praat van droogte, maar ons voel almal die droogte en ly almal daar onder. Nasionale kwessies raak ons almal. Ons vra nie 20% nie; ons is nie selfsugtig nie,” het hy gesê. Haingura het dié uitlatings gistermiddag by die Nantu-hoofkantoor gemaak nadat die visepresident, dr. Nickey Iyambo, gisteroggend beide Nantu en die staatswerkersunie, Napwu, ontbied het. Volgens Iyambo word sake van nasionale belang nou meer openlik bespreek en konsultasie is aan die orde van die dag. Iyambo het aan die media gesê die vergadering was slegs ’n konsultasie oor salarisonderhandelinge, alvorens dit agter geslote deure voortgesit is. Nogtans het Nantu later die dag voortgegaan met sy aankondiging.Haingura sê sy vakbond het meer as 16 800 lede, maar dit praat namens al die onderwysers in die land. Hy vra die lede en alle Namibiese onderwysers om geduldig te wees terwyl alle wetlike prosedure gevolg word. Aangesien die meeste stakings in die verlede onwettig verklaar is, maak Nantu nou eers seker dat as dit so ver gedryf word, die nywerheidsaksie nie teenstand van die polisie sal kry nie, het hy gesê. Volgens hom was die sperdatum vir interne dispuut met die regering onderhandelingspan, soos in die erkenningsooreenkoms aangewys is, al op 27 Mei verby. Die subkomitee van regeringonderhandelaars en Nantu-lede kon ook nie op 16 en 17 Mei ’n ooreenkoms bereik nie.

Onnies stel ultimatum oor salarisse

Kommentaar

Republikein 2025-07-01

Meld asseblief aan om kommentaar te lewer

Onnies stel ultimatum oor salarisse

Kommentaar

Republikein 2025-07-01

Meld asseblief aan om kommentaar te lewer

MELD AAN

Advertensie