‘Onmoontlike’ eis kelder Aussie-reeks

Johann de Jager – Hulle is bitter teleurgesteld dat Krieket Australië (CA) die toer op die nippertjie gekanselleer het nadat Krieket Suid-Afrika (KSA) basies agteroor gebuig het om dit ’n werklikheid te maak.So sê Graeme Smith, direkteur van krieket van KSA, oor die Aussies se skokbesluit om nie meer in Maart met hul Suid-Afrikaanse toer voort te gaan nie. CA het Dinsdag onverwags aangekondig dat hy die toer weens Covid-19-vrese moet uitstel.Die Aussies se veranderende eise is die laaste paar weke telkens tegemoetgekom. Selfs die Proteas se toer na Pakistan is aangepas om hulle te akkommodeer.KSA het hierbenewens ook aansienlike koste aangegaan, terwyl die kansellasie verdere geldelike verliese vir hom inhou.Die spanne sou in drie toetse slaags gewees het.Volgens planne waartoe die Aussies vroeër ingestem het, sou die eerste toets op 3 Maart begin het. Netwerk24 kan onthul dat die eerste en derde toetse albei in Centurion gespeel sou word en dat die Wanderers tussenin gasheer vir die tweede een sou wees.“Ons is uiters teleurgesteld oor die besluit van CA. Ons is vanoggend daarvan ingelig. Ons het die afgelope weke onverpoos gewerk om te verseker dat ons aan elke verwagting van CA voldoen,” sê Smith.“Ons het gehoor van hul vrese. Ek dink nie ons kan dit besweer nie, maak nie saak wat ons in plek sit nie.”“Ons voel ons het alles moontlik gedoen om die toer ’n werklikheid te maak.”Smith sê voorts hy dink nie die Engelse toer (waarvan die eendagreeks weens Covid-kwessies in die bioborrel gekanselleer is) het iets daarmee te make nie en meld dat wat hulle vir Australië beplan het, boonop heeltemal verskil van wat vir die Engelse gereël is.Volgens ESPNcricinfo.com het CA gesê dat hy weens die situasie hier geen ander keuse het nie.“Weens die situasie in Suid-Afrika, wat ’n tweede vlaag en ’n nuwe variant van die virus insluit, en ná uitgebreide gesprekke met mediese kundiges het dit duidelik geword dat om op die oomblik na Suid-Afrika te reis sou ’n onaanvaarbare veiligheidsrisiko vir ons spelers en personeel inhou,” sê Nick Hockley, waarnemende uitvoerende hoof van CA.Dr. Shuaib Manjra, hoof van KSA se Covid-19-taakspan, sê die Aussies het aangedring op “zero-risiko”, wat hy dink onmoontlik in die wêreld is.Hy sê hulle kon niks meer doen om die Aussies gerus te stel nie – en kon nie beter maatreëls beplan het nie.“Die protokolle wat ons aan hulle voorgelê het, was ongekend.”Hy wys daarop dat hulle ooreengekom het dat die Protea-span die borrel 14 dae voor die Australiese span se aankoms sou binnegaan en dat dié reëlings meegebring het dat die huidige toer deur Pakistan gewysig moes word.“Ons het toe tot twee afsonderlike borrels ingestem. Australië is die volle en eksklusiewe gebruik van die Irene Country Lodge toegestaan, wat ons met Sri Lanka met ’n minimum personeel op die perseel gedeel het.“Wat die reëlings betref, sou die Proteas na ’n afsonderlike hotel verhuis het.Verder moes alle hotelpersoneel, wedstrydbeamptes en selfs busbestuurders die borrel 14 dae voor Australië se aankoms ingaan. Daarbenewens het KSA hom ook daartoe verbind om ’n Australiese opsporingstelsel teen groot koste in te voer. Dit is om seker te maak dat diegene wat dalk in die geval van ’n positiewe toets in kontak was, nagespoor kan word.”Volgens KSA se verklaring sou die toerspan ook BBP-toegang met sy huurvlug op lughawens geniet het nadat die regering ingegryp het om hom die voorreg toe te staan.“Afgesien van die twee suksesvolle bioveilige borrels, het KSA sy plaaslike eendagreeks in ’n borrel in Potchefstroom gehou, waar geen positiewe gevalle aangemeld is nie,” lui die verklaring.Hy noem verder dat pres. Cyril Ramaphosa intussen Maandagaand ’n versagting van die inperkings aangekondig het nadat die infeksies afgeneem het.FOTO’sGraeme Smith is diep teleurgesteld dat Australië op die nippertjie besluit het om nie meer teen Suid-Afrika te kom speel nie. Foto Gallo ImagesNick Hockley, die waarnemende uitvoerende hoof van Krieket Australië. Foto Getty Images

‘Onmoontlike’ eis kelder Aussie-reeks

Kommentaar

Republikein 2026-02-03

Meld asseblief aan om kommentaar te lewer

‘Onmoontlike’ eis kelder Aussie-reeks

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.