Ongemak, afwagting en hoop

Augetto Graig – ’n Mens moet soms ongemak verduur en soms moet jy wag vir die impak van die situasie. Die lewe is nie altyd maklik nie en die toekoms blyk dikwels donker te wees. In hierdie tye van Covid is dit nog meer algemeen dat donker wolke die sonstrale belemmer. Soms is hoop selfs skaars.

Ek wil egter die ongelooflike krag van perspektief onder julle aandag bring. Perspektief is die beskrywing van hoe mens na iets kyk. Doen jouself ’n guns en gee bietjie aandag daaraan; kyk byvoorbeeld na iets naby jou. Tel dit op en bekyk dit; enigiets wat maklik rondgeskuif kan word.

Jy sal sien vanaf ’n sekere hoek is dele van die voorwerp onsigbaar. Draai dit om en een faset raak prominent. Draai dit weer, en ’n ander deel van die voorwerp is die fokuspunt. Dit is alles deel van perspektief.

Hoe jy die voorwerp interpreteer word bepaal deur watter deel van die voorwerp jy kan sien, en ook dit wat jy nie kan sien nie.

Neem nou die konsep van perspektief en pas dit in jy eie lewe toe. Jy sien jou bestaan op ’n sekere manier. Is dit moontlik dat jy jou lewe uit ’n ander oogpunt kan bekyk? Sal jy dit anders kan sien? Wat as ek sê jy kan in ’n oogwink jou perspektief verander.

Al wat jy moet doen, is om jou sienswyse te verander.

En hoe doen mens dit? Jy verander jou voorgestelde plan. Jy verander jou ingesteldheid. Jy besluit anders. Dit is so maklik soos dit.

Dit gaan oor die uitgangspunt. Dit gaan alles oor die verhouding. Jou gesigslyn word deur jou posisie bepaal teenoor die posisie van die voorwerp. In terme van jou lewe, is dit jou veronderstellings wat jou perspektief bepaal.

Kyk na jou aannames. Bevraagteken hulle. Is hulle nog geldig? Is hulle ooit waar? Is hulle geregverdig of selfs werklik van toepassing? Vra jouself hoekom jy sekere dinge as vanselfsprekend aanvaar? Is dit regtig so?

Miskien is jy nie so nutteloos soos jy dink nie, of miskien is jy nie so wonderlik soos jy jouself verbeel nie. In elk geval is dit waardevol om nader aan die waarheid te kom. Dit skep die geleentheid om iets daaraan te kan doen. As jy nie weet die probleem bestaan nie, is ’n oplossing vergesog. Identifiseer die probleem, en die stryd is halfpad gewonne.

Nou kan ons terugbeweeg na ongemak. Wat maak jou ongemaklik? Wat kan jy daaraan doen? Probeer dit. Tog moet mens soms nog ongemak verduur, en daar is niks wat daaraan gedoen kan word nie. Maar niks bly vir ewig nie, en selfs dié ongemak sal ook verbygaan.

As dit kom by die toekoms kan mens voorberei vir amper enige gebeurtenis. Doen dit. Met die pandemie in ag genome, sou ek aanraai jy doen wat jy kan om gesond te bly. Neem dit verder, maar vat dit een dag op ’n slag. Hoop is steeds daar iewers, al is dit redelik skaars. Vind jou eie hoop en klou verbete daaraan vas.