Onderwyser vas oor horings

Francoise Steynberg'n Laerskoolonderwyser is een van sewe Namibiërs wat Saterdag in hegtenis geneem is nadat die karkas van 'n swartrenoster Vrydag by Kliprivier in die Kunenestreek ontdek is.Volgens die Namibiese polisie se misdaadverslag is die sewe verdagtes Saterdag tussen 02:00 en 17:00 in die Humor-omgewing naby die Erwee-nedersetting in die Noordweste aangekeer. “Dit word beweer dat die twee verdagte voertuie by Erwee geparkeer was en drie van die verdagtes is daar gekry. Die ander vier verdagtes is in die veld gevind,” sê die polisie.Volgens die woordvoerder van die ministerie van die omgewing en toerisme, mnr. Romeo Muyunda, is 'n renosterkarkas Vrydag in die omgewing van Kliprivier naby Grootberg Lodge gevind. “Beamptes van die ministerie en die Namibiese polisie het die verdagte bewegings opgevolg en drie mans is in hegtenis geneem,” het Muyunda gesê.“Daarna het 'n operasie gevolg waartydens lugpatrollies ontplooi en strategiese padblokkades in die gebied opgestel is. Dit het gelei tot die inhegtenisneming van nog vier verdagtes wat vermoedelik die renoster gestroop het.”Volgens Muyunda is die vier verdagtes, onder wie die onderwyser, met 'n paar vars renosterhorings betrap. “Twee ongelisensieerde vuurwapens en agt patrone is ook in hul besit gevind,” sê die polisie. Die beskuldigdes, mnre. Vetupunga Tjiumbi, Frans Tjirondero (34), Uahohorua Tjambiru (31) Ujamaa Tjingee (23), Hevita Ngavehupe Alex (32),Uetuura Tjiharuka en Kareka Hembinda (32), het gister in die landdroshof op Outjo verskyn. Tjingee is 'n onderwyser by die Otjijandjasemo Primêre Skool naby Okanguati.Die saak is vir verdere ondersoek tot 6 November uitgestel. Al die beskuldigdes bly in aanhouding. NóG 'n KARKAS ONTDEK In 'n ander voorval is nóg 'n renosterkarkas ontdek. Volgens die polisie is die karkas van 'n onthoringde swartrenosterbul Saterdagmiddag op die plaas Okosongoro naby Omaruru in die Erongostreek gevind. Okosongoro is een van plase waar die ministerie se renosters onder bewaarderskap is.“Die karkas is sowat agt dae oud en 'n patroonpunt is in sy hart gevind,” sê die polisie.Geen patroondoppies is op die toneel gevind nie en die ondersoek duur voort. Niemand is nog in verband met dié voorval in hegtenis geneem nie. Volgens Muyunda is altesaam 26 renosters vanjaar gestroop in vergelyking met die 60 verlede jaar. Altesaam 18 olifante is vanjaar gestroop teenoor 2016 se 101. “Ondersoeke in beide gevalle duur voort en die ministerie doen 'n beroep op die publiek om voort te gaan om enige verdagte renoster- of olifantstropery by die polisie te rapporteer,” het Muyunda gesê.Die ministerie waarsku ook diegene betrokke by stropery dat teenstropery-eenhede, bestaande uit lede van die ministerie, die Namibiese polisie en weermag, in alle gevaargebiede van renosters en olifante ontplooi is. Die ministerie herinner ook die publiek dat die gewysigde Natuurbewaringswet, Wet No.3 van 2017, toepaslik is in enige onwettige aktiwiteite, wat die onwettige jag van renosters en olifante insluit. “Die voorsienings van die wet bepaal as verdagtes skuldig bevind word, kwalifiseer die oortreders vir 'n boete van N$25 miljoen of 25 jaar tronkstraf, of beide. In gevalle waar verdagtes tweede oortreders is, sal die boete N$50 miljoen of 50 jaar tronkstraf wees, of beide,” het Muyunda gewaarsku.

Onderwyser vas oor horings

Kommentaar

Republikein 2025-12-22

Meld asseblief aan om kommentaar te lewer

Onderwyser vas oor horings

Kommentaar

Republikein 2025-12-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.