Onderwys - 'n Tyd vir nadenke

Godfrey Kleinhans

Kersfees en Nuwejaar is om die draai en huishoudings spandeer baie tyd aan toekomsbeplanning.

Baie mense sal 2022 ingaan met pragtige resolusies; sommige onderneem om die rook te los terwyl ander graag wil gewig verloor en daar word geloer na al wat ‘n dieët is. Dit gons steeds oor die “banting” dieet en Tim Noakes se slimmigheid oor kos.

Maar hier teen Maart verdwyn baie van die mooi ondernemings soos mis voor die wind. “Blowin' in the wind” ala Bob Dylan.

Soms wens ek mense wil eerder onderneem om beter verhoudinge met ander te vestig; om die Bybelse konsep van naasteliefde ten volle uit te leef. Die Bybel leer ons inelkgeval om nie so behep te wees met die dag van môre nie; dit sorg tog vir homself.

Sal dit ons nie meer baat om ‘n wyle stil te staan en ‘n blik te werp op die jaar wat verby is nie?

Refleksie bied ons die geleentheid om 2021 te ontleed en uit ons foute en suksesse te leer. Met effektiewe beplanning kan ons die dwaalweë vermy en op goeie werk verbeter.

Nadenke moet alle beplanning voorafgaan.

Maar, die mens is nie juis lief om op die spoor van sy verlede te stap nie.

In die gedig "Reflection" (outeur onbekend) openbaar die spreker ‘n vrees vir die “demone” van die verlede. Die mens wil graag donker kolle in sy verlede uitwis en tot die vergetelheid verdoem. Maar helaas, dit is nie moontlik is nie. Die spreker sê onder andere:

Yet as I looked a bit closely

At the eyes staring back at me

I realized they were still there

Untouched and unfazed

Waiting for the day

To be let out of their cage.

Die belangrike les van die gediggie is dat ons ons foute uit die verlede vierkantig in die oë moet staar; dit is ‘n voorvereiste wat die prosesse van genesing en verbetering aan die gang sit.

Die onderwysjaar 2021 was vol donker kolle.

Covid-19 met sy verwoestende gevolge het voort getier. Gewone skoolskedules moes gewysig word en daar was selfs groter verliese aan onderrigtyd. Minder kinders het verwagte vaardighede bemeester. Ons weet ook dat baie kinders nie na skole teruggekeer het nie.

Boonop het die diefstal van etlike vraestelle die afhandeling van graad 11-eindeksamens tot volgende jaar vertraag.

Die afgelope jaar is opnuut verskeie beweerde seksuele wandade teen skoliere gerapporteer en tienerswangerskappe is meer as ooit. Ons weet nog nie watter ekstra maatreëls die ministerie geimplementeer het om sulke misdade hok te slaan en om sulke swangerskappe te probeer verminder nie.

Sommige streke geniet steeds nie die voordele van streeksonderwysforums nie. Maar te midde van al hierdie - en ander gebreke, swyg die meeste onderwysgemeenskappe.

Ons wil weet wat die ministerie gaan doen om die afgelope jare se slagysters mis te trap.

As ons niks doen nie, sal ons demone, so seker as wat die son môre sal skyn, eendag uit hul hokke ontsnap en ons aan die hakskene byt.

- [email protected]