Onderwys – Moenie tuisbly oor Covid-19

Godfrey Kleinhans - Covid-19-statistieke vir Namibië het effe versleg, maar is nog baie gerustellend teenoor die van baie ander lande.

Die regering het nietemin besluit om inperking te verlig, veral om die ekonomie en onderwys weer aan die gang te kry. Restaurante kan weer klante ontvang, die verbod op drankverkope is gelig, gesamentlike aanbidding kan hervat en onderrig en leer op skoolpersele kan volgens geskeduleerde datums voortgaan.

Hierdie verslapping kom egter saam met ‘n reeks belangrike verantwoordelikhede. Redes vir die verbod op drankverkope bestaan steeds terwyl predikante en kerkbeamptes moet toesien dat lidmate die basiese pandemierëels tydens eredienste, begrafnisse en huwelikseremonies nakom.

Die heropening van skole hou die grootste bedreigings in. Die gesondheid van leerlinge en onderwysers moet beskerm word.

Effektiewe skoolbestuur, veral ten opsigte van leerlinge, tyd, die benutting van klaskamers en ander fasiliteite is nou nodig om te verseker voorkomingsrëels word eerbiedig. Die verantwoordelikheid berus by die staat om te sorg skole beskik oor skoon water, sanitasie- en ablusiegeriewe.

Kinders se weerstand teen die virus mag nie as gerustelling dien of streng bestuur ondermyn nie.

Ons kan nie bloot aanvaar opdragte sal uitgevoer word nie. Effektiewe kontrole en toesighouding moet dit verseker.

Naas bekommernisse oor die gesondheid van hul kinders sit baie ouers en die owerhede met ‘n ander kopseer. Dit is die moontlikheid dat sommige leerlinge sal weier om terug te keer skool toe.

Volgens die National Centre on Educational Statistics in die VSA is daar ‘n betekenisvolle verhouding tussen chroniese afwesigheid en voortydige skoolverlating. Dit is nie vergesog om dieselfde afleiding te maak wanneer leerlinge vir lang periodes nie skole kan bywoon nie as gevolg van ‘n pandemie of ‘n natuurramp.

Leerlinge kan omstandighede buite die skool aangenamer ervaar. Ouers het ‘n groot verantwoordelikheid om te verseker leerlinge gaan terug skool toe.

Ouers kan ook voel hul spaar geld as kinders eerder tuis bly.

Baie mense is bekommerd wat die kwaliteit van onderwys gaan wees ná die inperking. Baie tyd het verlore gegaan en daar is geen presiese aanduiding hoeveel tuis- en afstandsonderrig plaasgevind het nie.

Onderwysers sal daarom ‘n baie hoë werkspeil moet handhaaf. ‘n Gesonde verhouding tussen ouers en onderwysers is nou meer nodig as ooit.

Ouers sal moet sorg hul kinders is elke dag betyds vir skool en dat huiswerk gedoen word. Onderwyserafwesigheid sal tot die minimum beperk moet word.

Onderwysers, in hul strewe om te sorg dat leerlinge die nodige kennis en vaardighede bekom, sal nou die volgehoue ondersteuning en samewerking van ouers benodig. Goeie kommunikasie is die lewensaar van hierdie vennootskap.

Effektiewe en hardwerkende onderwysers en betrokke ouers dra grootliks by tot interne koste-effektiwiteit. Koste-effektiewe onderwyssisteme het lae herhaling- en uitvalkoerse omdat die verlangde uitsette met die nodige insette verkry word.

Onderwysers en ouers word met hierdie groot taak sterkte toegewens.