Onderwys - Kwaliteit sukkel om wortel te skiet

Godfrey Kleinhans - Onderwys is 'n toekomsgerigte aktiwiteit en die uiteindelike doelwit is om die toekoms ten goede te beïnvloed. Ons wil tog die toekoms verbeter vir die wat na ons kom.Dit is voldoende motivering vir regerings om so 'n geweldige groot deel van nasionale rykdom aan onderwys te bestee. Die Namibiese regering het dit ná 1989 terdeë besef.Die nuwe ministerie van onderwys het destyds 'n paar doewitte aangeneem wat as rigtinggewende sterre vir die ontwikkelende onderwysstelsel kon dien. Kwaliteit onderwys is een daarvan.Die veronderstelling was dat kwaliteit onderwys leerlinge voorsien van eienskappe wat noodsaaklik is vir hulle om die wêreld van volwassenes op 'n sinvolle wyse te betree. Dit moet hulle in staat stel om ekonomies by te dra tot die samelewing, 'n bydrae te kan lewer tot die vestiging en onderhoud van vrede en 'n demokratiese lewenswyse en om hul eie welsyn te bevorder. Kwaliteit onderwys veronderstel egter:• Die daarstel van essensiële fasiliteite vir onderwys.• Toepaslike opleiding en voortgesette indiensopleiding van onderwysers.• Die voorsiening van onderrigmateriaal.• Monitering, toesighouding en evaluering. • Die betrokkenheid van skoolgemeenskappe en ander belanghebbendes. Ons is nou al terdeë bewus toets- en eksamenuitslae spreek nie die laaste woord oor die kwaliteit van onderwys nie. Ons weet ook hierdie einste uitslae is vir leerlinge, ouers, besighede en tersiêre instellings van kardinale belang.'n Steekproef van graad 10-uitslae by agt skole in die twee suidelike streke is 'n sterk aanduiding daarvan dat die verwesenliking van hierdie doelwit (kwaliteit) nog ligjare ver is. Skole se name word nie in die meegaande tabel vermeld nie.Baie leerlinge moet die graad herhaal, 'n verskynsel met sy eie uitdagings, terwyl ander eenvoudig die skool verlaat. Hierdie scenario speel hom jaar na jaar in vele skole af.Skole word streng aangespreek; verdoemende uitsprake gaan op en so ook stemme vir versagting .Natuurlik word die gebrek aan befondsing en die afwesigheid van die lat ook beskuldig. Daar is egter 'n klompie vrae wat by mens opkom wat net nie wil weggaan nie. • Wat doen die persone wat jaar na jaar die onderwysbegroting goedkeur dat hul werkgewer, die belastingbetaler, duidelik nie waarde vir sy geld kry nie?• Wat doen die instansies wat daarvoor verantwoordelik is om beleidsbesluite te implementeer en skoolprosesse te monitor en te evalueer?• Wat doen skoolrade, wat die ouers verteenwoordig en direkte inspraak het in die sake van skole?• Wat doen die skoolhoofde en hul besture om soortgelyke tragedies te voorkom?• Wat doen die ouers wat hierdie tragedies op 'n gereelde grondslag in hul kinders se lewens aanskou?• Wat doen die kerkgenootskappe wat so 'n geweldige bydrae tot die ontwikkeling van onderwys in hierdie land gelewer het?• Wat doen die besighede en tersiêre instellings wat op graad 12-graduandi wag om in diens te neem of verder op te lei? Onderwys skep 'n kollektiewe verantwoordelikheid en kinders kan nie alleen hiervoor geblameer word nie. Wie het dus vir wie gefaal? Of sing ons die liedjie “It wasn't me” van Shaggy?Terwyl ek in die stilte van ons eetkamer op 'n Maandagoggend met hierdie rubriek worstel, dwing my bekommernis my na die woorde van Jeremia 31 vers 15" “n Gekerm word in Rama gehoor, 'n gehuil vol hartseer: Ragel treur oor haar kinders, sy wil haar nie laat troos nie, want haar kinders is weg.”.Die hemele behoed ons teen so 'n toekoms . . .

Onderwys - Kwaliteit sukkel om wortel te skiet

Kommentaar

Republikein 2025-06-18

Meld asseblief aan om kommentaar te lewer

Onderwys - Kwaliteit sukkel om wortel te skiet

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie