Onderwys – Die Covid-19-pandemie en tienerswangerskappe

Godfrey Kleinhans – Ek wou aanvanklik hierdie week voortborduur op alternatiewe onderrigmodelle, maar beriggewing oor Covid-19, tienerswangerskappe en vroeë skoolverlating noop meer onmiddellike debat.Die dokument School Policy on Learner Pregnancy in Namibia: Summary of Background Information (2008) deur die onderwysministerie en die Regshulpsentrum (LAC) het die soeklig geplaas op statistiek hieroor.In 1992 is hierdie koers aangegee as 21,5% met ‘n afname na 17,6% in 2000 en ‘n verdere verlaging in 2006 na 15,6%.Die situasie in ons skole het welliswaar verbeter oor die vermelde period, maar die statistiek wat toe vir 15-jariges verstrek is, bly onrusbarend. Tienerswangerskappe in die groep het van 1,3% in 1992 tot 2,7 % in 2006 toegeneem.Die bevinding van die parlementêre komitee wat die verskynsel in 2018 ondersoek het, is nie minder skokkend nie. Hierdie ondersoek, wat slegs op die noordelike streke gefokus het, het 2 000 gevalle vir 2017 en 1 440 vir 2018 gerapporteer.Die streek met die hoogste syfer was Kavango-Oos met 544 gevalle vir 2017 en 545 vir 2018. Die grootste skok was die 39 tieners onder die ouderdom van 13 jaar wat in Ohangwena swanger was.Die parlementêre komitee het die oorsake herlei na ‘n gebrek aan toesig in gemeenskapskoshuise, kulturele en godsdienstige praktyke, gesinsomstandighede, gebrekkige ouerleiding, verkragting, privaat losies en saamrygeleenthede met vragmotorbestuurders.Die sekretaris-generaal van die Teachers Union of Namibia (TUN) plaas sy vinger op ‘n meer kollektiewe oorsaak, naamlik voortgesette ongelykhede.Verlede week het The Namibian oor die jongste Covid-19-verwante onderwysstatistiek berig. Meer as 3 300 dogters het sedert die aanvang van Covid-19 in Maart swanger geraak, meer as 25 000 leerlinge het nie teruggekeer ná die heropening van die skole nie terwyl 13 000 steeds tuisonderrig ontvang.Die ministerie pleit by kinders om terug te keer en gee die versekering dat skole gereed is. Dit is die regte ding om te doen. Ons nie kan toelaat dat een kind verdwaal in die oerwoud van ongeletterdheid en onkunde nie.Maar dit bring skole voor reuse-uitdagings te staan en verg uiters puik en professionele beplanning.Baie skole ervaar reeds ‘n gebrek aan onderrigruimte, die afstandsrëel moet gehandhaaf word terwyl nuwe leerlinge in grade 1 en 8 opgeneem moet word. Verder is daar die normale aantal leerlinge wat na ‘n lang periode van afwesigheid na die skool terugkeer terwyl voorbereidings getref moet word vir die swanger dogters.Daar sal teruggekeer moet word na aspekte van die kurrikulum wat nie aandag gekry het nie, anders sal sekere vaardighede wat aangeleer moet word, eenvoudig agterweë gelaat word.Hierdie is nie ‘n taak alleenlik vir die ministerie van onderwys, kuns en kultuur nie. Skoolhoofde moet die wekroep van bo uitvoer en instansies in skoolgemeenskappe soos streeksdirektorate, skoolrade, kerke, plaaslike en streeksowerhede, tradisonele owerhede, kiesafdelingkantore en onderwysunies sal moet help om die wa deur die drif te trek.Die “nuwe normaal” is hier! - godfrey.kleinhans@gmail.com

Onderwys – Die Covid-19-pandemie en tienerswangerskappe

Kommentaar

Republikein 2025-12-17

Meld asseblief aan om kommentaar te lewer

Onderwys – Die Covid-19-pandemie en tienerswangerskappe

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.