Onafhanklike party moet landbou-baas ondersoek

Elvira Hattingh – Daar is reeds begin om 'n onafhanklike derde party te kry om die ondersoek teen die geskorste besturende direkteur van die landbousake-ontwikkelingsagentskap (AgriBusDev) te hanteer.Dit volg ná die voorsitter van die AgriBusDev-raad, me. Sophia Kasheeta, se aankondiging Maandag dat mnr. Petrus Uugwanga met onmiddellike effek geskors is.“Die skorsing sal die weg baan vir ongehinderde ondersoeke teen die besturende direkteur,” het Kasheeta in 'n mediaverklaring gesê.“Ons wil iemand onpartydig hê vir die ondersoek en het reeds met die proses begin om so 'n party te nader,” het sy gister aan Republikein gesê. Sy wou nie sê waarvoor Uugwanga ondersoek word nie. Sy sê die raad wil nie die ondersoek belemmer deur net sekere aspekte te identifiseer wat ondersoek gaan word nie. “Dit is ook hoekom ons die verklaring so opgestel het soos wat ons het.“Jy sal weet daar is baie dinge wat in die media oor hom gepubliseer is. Ons wil nie hê daar moet nagevolge wees omdat ons sê net sekere sake sal teen hom ondersoek word nie,” het sy gesê. “Ons het besluit om hom te skors sodat 'n ondersoek gelas kan word. Ons sal die media in kennis stel wat ons uit die ondersoek wys raak en die stappe wat ons gaan neem,” het sy gesê.Kasheeta sê wat die beplande tydsduur van die ondersoek betref, sal hulle die voorgeskrewe beleid volg. “Hiervolgens sal dit sowat drie maande neem. Die beleid laat toe dat die tydperk vir 'n ondersoek verleng kan word, sou ons nog nie bereik het wat ons daarmee beoog het nie.“AgriBusDev is egter 'n groot agentskap en ons wil seker maak daar word met almal gepraat wat moontlik waardevolle inligting tot die ondersoek kan bydra,” het sy gesê. Kasheeta het in haar verklaring gesê die raad het wel die ministeries van landbou, water en grondhervorming, asook van openbare ondernemings oor sy skorsing geraadpleeg. AgriBusDev was dae gelede in die nuus toe Uugwanga aan Nampa gesê het die agentskap het nie genoeg fondse om die salarisse van werknemers op die regering se groenskemaprojekte landswyd te betaal nie. Dit volg ná 'n lang geskiedenis van mediaberigte oor die agentskap se stryd om hul sowat 130 werknemers te betaal. Die agentskap is in beheer van nasionale groenskemas, maar moes noodgedwonge weens finansiële druk dié skemas aan private vennote verhuur. AgriBusDev skuld verskeie partye glo ook miljoene. Terwyl die groenskemas gestig is om die land se voedselsekuriteit te verbeter, het Republikein bykans 'n jaar gelede berig Uugwanga het erken dat die land se groenskemaprojekte algaande minder mielies en koring oes. Dit het ook geen oesteikens in hul 2015-strategiese plan bereik nie.Uugwanga het toe beweer die uitbreking van die herfskommandowurmplaag is hiervoor te blameer. Beswaar is ook uit verskeie oorde geopper oor die samestelling van die agentskap se raadslede, wat glo hoofsaaklik uit ministeriële amptenare bestaan. Ander media het reeds oor beweerde wanbestuur en korrupte ooreenkomste deur AgriBusDev berig.– elvira@republikein.com.na

Onafhanklike party moet landbou-baas ondersoek

Kommentaar

Republikein 2026-07-31

Meld asseblief aan om kommentaar te lewer

Onafhanklike party moet landbou-baas ondersoek

Kommentaar

Republikein 2026-07-31

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.