Omstrede grondtoekenning op Okahandja onder skoot

Augetto Graig – Tydelike sertifikate van verblyfsreg vir 138 erwe op Okahandja sal vandag aan begunstigdes, insluitend 38 polisie- en weermagbeamptes uitgedeel word, volgends die ministeriële waarnemer, mnr. Linus //Garoeb.Hy is sowat nege maande gelede aangestel om die bestuur van die dorp oor te neem nadat die voormalige minister van stedelike en landelike ontwikkeling, me. Sophia Shaningwa, die dorpsraad geskors het.Volgens //Garoeb het die huidige minister, mnr. Erastus Uutoni, Woensdag met lede van die Okahandja-gemeenskap se grondleweringskomitee vergader en ooreengekom die oorhandigingseremonie sal vandag voortgaan.Bronne na aan die komitee sê hulle was teen die aanvanklike oorhandiging wat Woensdag sou plaasvind, omdat die komitee geen insae in die goedkeuring van die polisie- en weermag-begunstigdes gehad het nie.Nietemin dring //Garoeb aan die polisie- en weermaglede wat regte tot die grond sal kry, moet op ’n meesterlys geplaas word en hul name moet gepubliseer word as deel van ’n proses om besware teen die toekenning bymekaar te maak.“Wie ook al ’n erf kry, moet steeds die wettige proses volg, en die toekenning van erwe sal geadverteer word vir enige besware,” sê hy.Die komitee is geskep deur Uutoni en die goewerneur van die Otjozondjupastreek, mnr. James Uerikua, gedurende ’n massabyeenkoms by die dorp se Nau-Aib-stadion in Julie, om begunstigdes vir grondtoekenning te identifiseer. Uerikua sal vandag om 10:00 die sertifikate by die gemeenskapsaal aan die begunstigdes oorhandig.Hulle het ’n meesterlys van sowat 13 000 behoeftige Okahandja-inwoners opgestel, maar onder meer aansoekers wat sedert 2008 by die munisipaliteit grond soek, is nie noodwendig daarby ingesluit nie.Moontlike begunstigdes sluit wel dié in wat deur komiteelede uitgeken en polisieverklarings afgelê het dat hulle geen grond besit nie.Volgens //Garoeb is baie mense tevrede met die verwikkeling, en weet hy van nog 281 erwe wat oorhandig kan word.Hy sê die toekenningsproses moet voortgaan, omdat die mense van Okahandja dit wil hê.“Hulle wil die beloftes sien, die papiertjie waar hulle kan sien die grond behoort aan hulle; iets waarop hulle trots kan wees,” sê hy.Opposisiepolitici bevraagteken egter die geldigheid van die toekennings. Kandidate in volgende week se verkiesings, mnre. Charl Coetzee, Solomo Basie Tjikune en Petrus Kampaku van die Okahandja Rate Payers’ Association (ORPA), bevraagteken die tydsberekening van die toekenning en wil weet hoekom die polisie- en weermaglede – as staatsbeamptes met behuisingstoelae – begunstigdes is.Hulle wil ook weet hoekom die toekenning aanvanklik in die geheim sou plaasvind.“Dit gaan oor die wil van die mense,” sê Coetzee, wat aandring dat die gebrek aan ’n dorpsraad die inwoners se reg tot eie verteenwoordiging ondermyn.Volgens hom kry iemand iets onwettig uit die proses, óf die regerende party verwerp deursigtigheid om vir oulaas die dorp uit te buit en die dorp onbeheerbaar en onregeerbaar vir enige nuwe raad te los.Die Republican Party (RP) se Henk Mudge sê nóg mnr. //Garoeb, nóg minister Uutoni het die reg om grond op Okahandja uit te deel. Hy noem die toekenning onwettig en teen die Plaaslike Owerheidswet nommer 23 van 1992.“Wat nou gebeur, is onwettig en nie net mnr. //Garoeb nie, maar ook die minister, moet onmiddellik ontslaan en van korrupsie aangekla word,” skryf Mudge gister in ’n verklaring.Die RP verwerp die grondtoekenning en sê dit is onwettig, korrup, onreëlmatig en disrespekvol teenoor inwoners van Okahandja. Mudge doen ’n beroep op inwoners om vir hul regte op te staan.Met eise vir dokumentasie wat bewys die munisipale bestuurskomitee het die proses aanbeveel, die dorpsraad het dit goedgekeur en presies wie die polisie- en militêre begunstigdes is, versoek Mudge die onmiddellike skorsing van //Garoeb en Uutoni.- augetto@republikein.com.na

Omstrede grondtoekenning op Okahandja onder skoot

Kommentaar

Republikein 2025-05-01

Meld asseblief aan om kommentaar te lewer

Omstrede grondtoekenning op Okahandja onder skoot

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie