Omeya se ontwikkelaar vra vir likwidasiebevel
Die ineenstorting van die eiendomsmark plaas hulle in 'n netelige situasie, sê Omeya Gholf- en Residensiële Oase, wat in die rooi by hul grootste skuldeisers is.
Elvira Hattingh
Omeya se ontwikkelaarsmaatskappy bring vandag 'n dringende aansoek in die Windhoekse hoërhof om vir likwidasie aansoek te doen.
“Ons huiseienaars is 'n geruime tyd al baie bekommerd en is bly sake staan nou na 'n kant toe,” het die Omeya-huiseienaarsvereniging se mnr. Arno du Plessis gister aan Republikein gesê.
Hy sê die vereniging is slaggereed om, sou die hof op likwidasie besluit, so gou as moontlik met die likwidateurs om 'n tafel te sit om oor die toekoms van Omeya te vergader.
Du Plessis sê dit is vir hulle belangrik dat dienste ononderbroke gelewer moet word en die gholfbaan in stand gehou moet word. 'n Likwidasiebevel beteken dat huiseienaars se selfverkose direkteurs asook die likwidateurs weer groter beheer oor hul vereniging sal verkry en inwoners dus nie paniekerig oor dié aansoek hoef te raak nie.
BESTE BELANG
Mnr. André van der Walt, een van vier lede op Omeya Gholf- en Residensiële Oase (Ogro) se direkteursraad, lig die hoërhof in 'n beëdigde verklaring in dat alhoewel Ogro se bates steeds meer as sy laste is, dit nie meer oor kontantvloei beskik nie en dus kommersieel insolvent is.
Vandaar die likwidasie-aansoek.
Dit sal in die beste belang wees van skuldeisers asook 'n groot aantal mense en partye wat belang in die voortbestaan van die Omeya-landgoed het, meen die aansoeker.
“Ogro se hoofbron van inkomste is die verkoop van gedienste erwe en eiendomme binne Omeya, asook 'n minimale huurinkomste,” sê hy.
Hy voer verder aan dat Ogro se inkomste so te sê opgedroog het weens die insinking in die eiendomsmark sedert 2018, wat onlangs deur die Covid-19-pandemie vererger is.
VOORUITSIG
Ogro is in die rooi by twee van sy grootste skuldeisers, naamlik Bank Windhoek asook First National Bank, aan wie dit onderskeidelik sowat N$133 miljoen en N$12 miljoen skuld.
“Dit vereis maandelikse terugbetalings van onderskeidelik ongeveer N$900 000 en N$75 000,” het Van der Walt gesê. Hy sê Ogro bied boonop maandelikse geldelike bystand aan verskeie filiale van sowat N$660 000.
Hy sê die ononderbroke beskikbaarheid van dienste en finansiering aan Ogro se filiale is noodsaaklik vir die voortbestaan van die landgoed.
“Die maandelikse geldelike verpligtinge van Ogro kan nie nagekom word nie. Daar is geen vooruitsig dat die situasie binne die afsienbare toekoms sal verander of verbeter nie,” sê Van der Walt en voeg by dat hul sakebankrekening by Bank Windhoek intussen gevries is.
Die aansoeker sê indien die likwidasie toegestaan word, kan 'n likwidateur behoorlike stappe neem om te verseker die funksies van Ogro gaan voort, tot voordeel van die onderskeie belanghebbers.
Daar word aangevoer die saak is dringend omdat Ogro geen toegang tot kontant het nie en dus nie sy maandelikse uitgawes kan dek nie, wat dienste soos infrastruktuur, die verskaffing van elektrisiteit, water en riooldienste belemmer.
Hulle meen ook dit is in die beste belang van die huiseienaars, families, skoliere en bejaardes dat die saak as dringend hanteer word.
Van Ogro se filiaalmaatskappye sluit die Omeya-eiendomsagentskap, 'n private skool, Lilamed wat die bedrywighede van die aftree- en sorgsentrum bestuur, die Omeya Ontwikkelingstrust, 'n infrastruktuurmaatskappy, 'n aftree- en sorgsentrum, asook 'n inwonersvereniging in.
Van der Walt Investment Trust, waarvan Van der Walt ook een van die trustees is, is 'n alleen-aandeelhouer in Ogro.
- [email protected]
Omeya se ontwikkelaarsmaatskappy bring vandag 'n dringende aansoek in die Windhoekse hoërhof om vir likwidasie aansoek te doen.
“Ons huiseienaars is 'n geruime tyd al baie bekommerd en is bly sake staan nou na 'n kant toe,” het die Omeya-huiseienaarsvereniging se mnr. Arno du Plessis gister aan Republikein gesê.
Hy sê die vereniging is slaggereed om, sou die hof op likwidasie besluit, so gou as moontlik met die likwidateurs om 'n tafel te sit om oor die toekoms van Omeya te vergader.
Du Plessis sê dit is vir hulle belangrik dat dienste ononderbroke gelewer moet word en die gholfbaan in stand gehou moet word. 'n Likwidasiebevel beteken dat huiseienaars se selfverkose direkteurs asook die likwidateurs weer groter beheer oor hul vereniging sal verkry en inwoners dus nie paniekerig oor dié aansoek hoef te raak nie.
BESTE BELANG
Mnr. André van der Walt, een van vier lede op Omeya Gholf- en Residensiële Oase (Ogro) se direkteursraad, lig die hoërhof in 'n beëdigde verklaring in dat alhoewel Ogro se bates steeds meer as sy laste is, dit nie meer oor kontantvloei beskik nie en dus kommersieel insolvent is.
Vandaar die likwidasie-aansoek.
Dit sal in die beste belang wees van skuldeisers asook 'n groot aantal mense en partye wat belang in die voortbestaan van die Omeya-landgoed het, meen die aansoeker.
“Ogro se hoofbron van inkomste is die verkoop van gedienste erwe en eiendomme binne Omeya, asook 'n minimale huurinkomste,” sê hy.
Hy voer verder aan dat Ogro se inkomste so te sê opgedroog het weens die insinking in die eiendomsmark sedert 2018, wat onlangs deur die Covid-19-pandemie vererger is.
VOORUITSIG
Ogro is in die rooi by twee van sy grootste skuldeisers, naamlik Bank Windhoek asook First National Bank, aan wie dit onderskeidelik sowat N$133 miljoen en N$12 miljoen skuld.
“Dit vereis maandelikse terugbetalings van onderskeidelik ongeveer N$900 000 en N$75 000,” het Van der Walt gesê. Hy sê Ogro bied boonop maandelikse geldelike bystand aan verskeie filiale van sowat N$660 000.
Hy sê die ononderbroke beskikbaarheid van dienste en finansiering aan Ogro se filiale is noodsaaklik vir die voortbestaan van die landgoed.
“Die maandelikse geldelike verpligtinge van Ogro kan nie nagekom word nie. Daar is geen vooruitsig dat die situasie binne die afsienbare toekoms sal verander of verbeter nie,” sê Van der Walt en voeg by dat hul sakebankrekening by Bank Windhoek intussen gevries is.
Die aansoeker sê indien die likwidasie toegestaan word, kan 'n likwidateur behoorlike stappe neem om te verseker die funksies van Ogro gaan voort, tot voordeel van die onderskeie belanghebbers.
Daar word aangevoer die saak is dringend omdat Ogro geen toegang tot kontant het nie en dus nie sy maandelikse uitgawes kan dek nie, wat dienste soos infrastruktuur, die verskaffing van elektrisiteit, water en riooldienste belemmer.
Hulle meen ook dit is in die beste belang van die huiseienaars, families, skoliere en bejaardes dat die saak as dringend hanteer word.
Van Ogro se filiaalmaatskappye sluit die Omeya-eiendomsagentskap, 'n private skool, Lilamed wat die bedrywighede van die aftree- en sorgsentrum bestuur, die Omeya Ontwikkelingstrust, 'n infrastruktuurmaatskappy, 'n aftree- en sorgsentrum, asook 'n inwonersvereniging in.
Van der Walt Investment Trust, waarvan Van der Walt ook een van die trustees is, is 'n alleen-aandeelhouer in Ogro.
- [email protected]
Kommentaar
Republikein
Geen kommentaar is op hierdie artikel gelaat nie