Om te ontsmet en in te ent of nie?

Tanja BauseEk hoor die anderdag van ’n sakeonderneming waar sowat tien werknemers positief vir die coronavirus getoets het. Die besigheid het nooit toegemaak nie en is ook nie ontsmet nie. Ek weet almal het hul eie siening oor Covid-19, maar dit is ’n feit soos ’n koei dat dit ’n werklikheid is en niemand kan daarteen stry nie. Of jy nou dink dit is net ’n griep en bietjie loopneus of jy iemand ken wat dit al gehad het wat kan beaam dat dit nie net ’n verkouetjie is nie. Dit is nie ter sprake nie. Wanneer so baie werknemers by ’n klein besigheid positief toets, moet jy tog besef daar kan tog waarheid in die hele storie steek. Maak die plek vir twee dae toe en ontsmet alles. Dit kan verhoed dat nog meer van jou werknemers siek raak en in elk geval vir tien dae by die huis moet bly. Dit gaan ook verhoed dat jou kliënte dalk siek word en hulle dan weer op hul beurt mense aansteek. Julle kan die bose kringloop sien en hoe dit kan uitbrei, net omdat jy dink jy hoef nie te ontsmet nie.Tans is daar ook geen hospitaalbeddens vir Covid-19-pasiënte beskikbaar nie. Dus as jou werknemer of kliënt nou siek word, kan hulle nie in die hospitaal opgeneem word nie. Al hyg hulle na asem. Hulle sal huis toe gestuur word en hoop vir die beste. En jy, meneer die werkgewer, is oukei daarmee?Ek sê nie die besigheid moet lank toemaak nie, maar ontsmet alles en beskerm jou werknemers en kliënte, hul families en werkskollegas.Dit is dieselfde met die vraag om ingeënt te word of nie? Kyk, dit is almal se eie, vrye keuse. Ja, natuurlik kan ’n handjie vol komplikasies met die entstof ontwikkel. Jy het seker al van mense gehoor wat dood is of komplikasies ontwikkel het nadat hulle ’n entstof ontvang het? En dit is entstowwe wat al jare lank beskikbaar en getoets is. My punt is daar is altyd iemand wat ’n komplikasie kan ontwikkel. Dus om nie ingeënt te wil word oor daardie rede nie is taamlik nutteloos. Om te sê jy sal elke jaar vir ’n booster-inspuiting moet gaan, is ook geen argument nie. Almal wat al vir ’n verkoue-inspuiting gegaan het weet dat dit elke jaar gedoen moet word. Ek verstaan nie wat die verskil is nie.Dit is elke persoon se keuse wat hy of sy wil maak, maar dit is my reg om myself te beskerm. Hou asseblief jou masker aan en ontsmet. Ek wil nie alles moontlik doen om myself te beskerm en dan nog steeds siek word omdat jy dink dit is net ’n loopneus nie.

Om te ontsmet en in te ent of nie?

Kommentaar

Republikein 2025-12-17

Meld asseblief aan om kommentaar te lewer

Om te ontsmet en in te ent of nie?

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.