Okakango Gardens: 'n Sprokieswêreld van harmonie

Okakango Gardens was oorspronklik op ’n kleinhoewe buite Okahandja geleë, maar in 2004 koop mnr. Hennie Coetzer dit en van toe af is die kwekery baie gerieflik in die hartjie van die dorp geleë.
Volg die borde en vind dit maklik. Daar ingestap, tref ’n lafenis van kleur en koelte elke besoeker.
Wat Okakango Gardens so uniek maak, is die feit dat wegbeweeg is van die tipiese blokke en rye-uitleg waarvan kwekerye gewoonlik gebruik maak. Hier word plante op ’n astrante wyse deurmekaar gepak. Die gesoute tuinier sowel as ’n volslae groentjie sien dit raak. Hier kan mens letterlik voel, en ruik en geïnspireer word – en dit in die wete dat enigiemand ’n mooi plant kan aanhou, ’n bedding saai en ’n tuin uitlê.
Hoe dieper in die sprokieswêreld ingestap word, hoe meer treffend raak dit: Om elke hoekie en draaitjie is daar verrassings. Die groot verskeidenheid; die gemak en die eenvoud waarmee alles bymekaar aansluit. Hier is nie fieterjasies nie, net harmonie.
Die rose, broodbome en sitrusplante skuur skouers, daar is hangmandjies met lang, slap blaarvarings in die apiesdoringbome. Petunias en gesiggies loer oor ’n klompie kruie. Daar is ’n towenaar met ’n spierwit glimlag wat so in die loop name, pryse en inligting optower. Daar is fonteine en beelde van diere en geknoopte vyebome; daar is bonsai-bome, feetjies en dwergies. In die geskenkwinkel is selfs meer om te siene.
Weer in jou kar, kreun dit onder al die kunsmis, giwwe, potte, ’n geskenkie vir skoonma, vrolike lap vir jou tafel en wol en breipenne vir ouma, plante en ’n tuinslang.
Ja, begin dus jou eie Eden.