Oekraïne Vooraanstaande joernalis sterf in motorbomontploffing

’n Vooraanstaande joernalis is gister in Kiëf, die hoofstad van die Oekraïne, in ’n motorbomontploffing dood. Dit het skokgolwe deur die Oekraïne se joernalistieke gemeenskap gestuur.
Die land se top aanlyn nuuswebtuiste, Ukrainska Pravda, sê sy joernalis Pavel Sheremet is in die ontploffing dood toe hy in die motor ingeklim het om na ’n radiostasie te ry waar hy die aanbieder van ’n geselsprogram was.
Die motor het aan die hoofredakteur, Olena Prytula, behoort.
Zoryan Shkiryak, ’n raadgewer vir die ministerie van binnelandse sake, het op Facebook gesê ’n geïmproviseerde ploftoestel is onder die motor aangebring.
Die Oekraïne se mediagemeenskap is in 2000 diep geraak deur die brutale moord van Ukrainska Pravda se stigter, Heorhiy Gongadze. Dertien jaar later is ’n amptenaar van die ministerie van binnelandse sake aan die moord skuldig bevind, maar daar kon nooit vasgestel word wie opdrag vir die moord gegee het nie.
- Nampa/AP