Oefenklere wat op aandag staan

Kristien Kruger - In die lig van vrouemaand moet erkenning gegee word aan die veelsydige, dinamiese vroue van ons land. Só ’n vrou is me. Nadine Liebenberg – ’n werkende vrou, deeltydse student, ma van twee en nou die eienaar van Mustbenice Clothing in Namibië. Ná die uitbreking van die Covid-19-pandemie het Nadine se werk in die toerismebedryf ’n knou gekry. Sy het egter nie teruggestaan nie.“In Maart het my werk heelwat afgeskaal en ek het begin dink hoe om ’n ekstra inkomste te verdien. My skoonsuster het in Maart 2019 met Mustbenice Clothing in Suid-Afrika begin en ek het daarin belang gestel. My skoonpa was in die land en ek het hom genader om ’n tak hier te begin,” het Nadine aan Republikein gesê.Gemaklike oefenklereNadine het die gaping in die Namibiese mark gesien en besef daar is baie vroue, wat nes sy, sukkel om oefenklere te kry wat uitstaan en gemaklik is.“Elke vrou wil goed voel en lyk. Die probleem is net meeste oefenklere gly af of dit skyn deur. Dit het gemaak dat ek nie meer wou oefen nie.” “Alles wat mens op die internet sien vat maande om hier uit te kom en dit kos ’n plaas se geld. Kom dit hier, dan pas dit nie en jy kan dit nie terugstuur of omruil nie. Boonop lyk dit soveel mooier op die model as wat dit werklik is,” het sy gesê.Toekomsplanne Nadine werk tans van haar huis af. Kliënte kan aanlyn bestel en by haar huis kom aanpas. Daarna maak sy pakkies wat sy landswyd uitstuur. Sy werk egter aan die opening van haar winkel en beoog om 1 September die deure oop te maak.“Die winkel gaan by Bakkie Centre in Onafhanklikheidsrylaan langs Langerhans-apteek wees. Ons beplan om binnekort verskeie takke oraloor die land te hê.”Mustbenice Clothing maak gebruik van die Suid-Afrikaanse tak in Kaapstad se ontwerpers wat van sublimasiedrukwerk gebruik maak. Hiertydens gaan kleurstof fisiek in die materiaal in. Die proses neem 14 tot 20 dae voordat die klere in Namibië aankom. Mustbenice Clothing in Suid-Afrika het in 2019 begin deur gebruik te maak van ander verskaffers, maar in Februarie vanjaar het hulle masjiene aangekoop en doen tans alles self.“My mikpunt is om nes in Suid-Afrika, alles self te kan doen. Die idee was om eers die mark te toets en van daar af op te bou. Ek hoop om die besigheid so te ontwikkel dat dit eg Namibies is!”Mustbenice Clothing verkoop tans verskillende lengte oefenbroeke (tights) vir mans en vrouens, bypassende hemde in verskillende style, sports bra’s, swemklere, baadjies, buffs en oefenklere vir kinders.“Ek is bevoorreg om vir Michelle Vorster as ons handelsmerk-ambassadeur te hê. Sy is die perfekte kandidaat om ons te verteenwoordig. Nes ek, is sy ook ’n ma wat haar drome uitleef.” - kristien@republikein.com

Oefenklere wat op aandag staan

Kommentaar

Republikein 2026-07-29

Meld asseblief aan om kommentaar te lewer

Oefenklere wat op aandag staan

Kommentaar

Republikein 2026-07-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.