O.21's nét buite toptien, bespreek plek vir 2020
Kanopolo
Namibië se onder 21 mans kanopolospan het die land se deelname aan die 2020 wêreldkampioenskap van die Internasionale Kanopolofederasie verseker, danksy die elfde posisie waarin die span by laas naweek se weergawe van die wêreldbyeenkoms geëindig het.
Die Namibiërs het in Welland, Kanada, tot die tweede ronde gevorder, maar kon nie vir die halfeindronde kwalifiseer nie.
Hulle het nietemin vir Japan in die uitspeelwedstryde om die elfde posisie verslaan om sodoende outomatiese kwalifisering vir die 2020 wêreldkampioenskap in Rome, Italië te verseker.
Sestien lande se spanne het in die o.21-mansafdeling meegeding. Namibië se eindposisie is hoër as Japan, Ierland, Chinese Taipei, die gasheerland Kanada en Argentinië.
• Die Namibiese senior mans het algeheel 21ste klaargemaak uit die 23 lande wat teenwoordig was.
Die manspan het Sondag sy uitspeelwedstryd vir dié plek met 8-3 teen Argentinië gewen. Dit was hul enigste oorwinning ná sewe opeenvolgende nederlae en het verseker dat hulle in 'n beter posisie as Argentinië en Singapoer klaarmaak.
Die Namibiese span se deelname was vooraf in die gedrang toe die maatskappy wat gehuur is om hul bote na Kanada te vervoer, se karweiers in 'n ongeluk betrokke was.
'n Kanadese maatskappy het egter na vore getree en sewe kano's, ter waarde van rofweg N$278 000 in totaal, aan die spelers beskikbaar gestel.
Die maatskappy het ook aangebied om die kano's vanaf China na Kanada voor die begin van die toernooi te laat versend.
Die missiehoof van die Namibiese span, Anton Jacobie, het aan 'n plaaslike koerant gesê die kano's wat hulle vanaf 'n Europese vervaardiger bestel het, het uiteindelik op dag drie van die kampioenskap daar aangekom.
Kanopolo is nie een van Namibië se grootste of bekendste sportkodes nie, maar nogtans het die land reeds 20 jaar gelede sy eerste manstoerspan na 'n wêreldkampioenskap gestuur. Sedertdien het veral die seunsgroepe tevore goeie prestasies in internasionale kompetisies behaal.
Jacobie sê sy spanne het geen geldelike bystand van die regering gekry nie en moes self plan maak om die koste van hul reis, verblyf, deelname en toerusting te dek. Dié koste het op bykans 6 500 euro per speler (net kort van N$100 000) te staan gekom.
“Vanjaar was ons ongelukkig om nie onder top 10 te wees nie. Vir die volgende wêreldkampioenskap in 2020 gaan ons werk vir 'n plek in die topses. Hierdie span van ons is inderdaad meestal onder 18 en almal sal nog vir die volgende een kwalifiseer.
“Namibië het 'n paar uitdagings in die sport, want ons speel as 'n span skaars ses wedstryde in twee jaar, teenoor die lande in Europa wat minstens 80 wedstryde speel.
“Die sport is baie duur en ons water is min. Die manne oefen elke aand tot 21:00 en die drie maande voor die wêreldkampioenskap is dit winter in Namibië.”
– Nampa
Die Namibiërs het in Welland, Kanada, tot die tweede ronde gevorder, maar kon nie vir die halfeindronde kwalifiseer nie.
Hulle het nietemin vir Japan in die uitspeelwedstryde om die elfde posisie verslaan om sodoende outomatiese kwalifisering vir die 2020 wêreldkampioenskap in Rome, Italië te verseker.
Sestien lande se spanne het in die o.21-mansafdeling meegeding. Namibië se eindposisie is hoër as Japan, Ierland, Chinese Taipei, die gasheerland Kanada en Argentinië.
• Die Namibiese senior mans het algeheel 21ste klaargemaak uit die 23 lande wat teenwoordig was.
Die manspan het Sondag sy uitspeelwedstryd vir dié plek met 8-3 teen Argentinië gewen. Dit was hul enigste oorwinning ná sewe opeenvolgende nederlae en het verseker dat hulle in 'n beter posisie as Argentinië en Singapoer klaarmaak.
Die Namibiese span se deelname was vooraf in die gedrang toe die maatskappy wat gehuur is om hul bote na Kanada te vervoer, se karweiers in 'n ongeluk betrokke was.
'n Kanadese maatskappy het egter na vore getree en sewe kano's, ter waarde van rofweg N$278 000 in totaal, aan die spelers beskikbaar gestel.
Die maatskappy het ook aangebied om die kano's vanaf China na Kanada voor die begin van die toernooi te laat versend.
Die missiehoof van die Namibiese span, Anton Jacobie, het aan 'n plaaslike koerant gesê die kano's wat hulle vanaf 'n Europese vervaardiger bestel het, het uiteindelik op dag drie van die kampioenskap daar aangekom.
Kanopolo is nie een van Namibië se grootste of bekendste sportkodes nie, maar nogtans het die land reeds 20 jaar gelede sy eerste manstoerspan na 'n wêreldkampioenskap gestuur. Sedertdien het veral die seunsgroepe tevore goeie prestasies in internasionale kompetisies behaal.
Jacobie sê sy spanne het geen geldelike bystand van die regering gekry nie en moes self plan maak om die koste van hul reis, verblyf, deelname en toerusting te dek. Dié koste het op bykans 6 500 euro per speler (net kort van N$100 000) te staan gekom.
“Vanjaar was ons ongelukkig om nie onder top 10 te wees nie. Vir die volgende wêreldkampioenskap in 2020 gaan ons werk vir 'n plek in die topses. Hierdie span van ons is inderdaad meestal onder 18 en almal sal nog vir die volgende een kwalifiseer.
“Namibië het 'n paar uitdagings in die sport, want ons speel as 'n span skaars ses wedstryde in twee jaar, teenoor die lande in Europa wat minstens 80 wedstryde speel.
“Die sport is baie duur en ons water is min. Die manne oefen elke aand tot 21:00 en die drie maande voor die wêreldkampioenskap is dit winter in Namibië.”
– Nampa
Kommentaar
Republikein
Geen kommentaar is op hierdie artikel gelaat nie