O.20's in niemandsland
Die onsekere klimaat in die land se rugby is na die nasionale junior span uitgebrei.
Andrew Poolman - Enige mens wat hom in selfs ’n matig kompeterende omgewing of in die najaag van ’n doelwit bevind, moet die feit aanvaar dat die horlosie vir niemand wag nie.
Des te meer indien jy só vroeg in 2019 by Namibiese rugby betrokke is. Dan is dit oënskynlik eerder ’n geval dat die uurglas om elke hoek en draai wag om dinge vir jou onmoontlik te maak.
Die reeds bekende patroon wat tussen Wêreldbeker-siklusse afspeel, waarin Namibië hom dikwels weens tweespalt op bestuursvlak in een of ander soort selftoegediende chaos bevind, eis steeds sy tol.
Die nuutste slagoffer hiervan kan die nasionale o.20-span wees wat jaarliks in ’n Afrika-toernooi meeding en dan gewoonlik kwalifiseer vir deelname aan ’n sterker internasionale toernooi.
Kort voor Kersfees het Rugby Afrika bekend gemaak dat sy Junior Barthes-toernooi vir die topvier spanne in die A-afdeling vanaf 27 tot 30 Maart 2019 in Nairobi, Kenia aangebied gaan word.
Op die eerste wedstryddag, 27 Maart, speel die titelhouer Namibië teen Senegal, gevolg deur die botsing tussen Kenia en Tunisië. Senegal en Tunisië vervang Zimbabwe en Madagaskar, wat ná verlede jaar gerelegeer is.
Drie dae later volg die bronsfinaal tussen die twee verloorspanne, gevolg deur die finaal. Die kampioen van die A-afdeling dring deur tot die 2019 Wêreldrugby Junior Trofee-toernooi, wat vanaf 9 tot 21 Julie in Brasilië sal plaasvind.
Republikein se navrae het laat blyk dat geen afrigterspan nog in plek is om leiding met die samestelling en voorbereiding van vanjaar se o.20-span te neem nie. Dit terwyl die sperdatum voor hul eerste wedstryd vandag op ’n skrale 69 dae begin aftel.
Die Namibië Rugby-unie (NRU) se president, mnr. Corrie Mensah, het dié week aan die koerant gesê die NRU is tevrede met die vertoning van Henry Kemp en sy toerverslag na afloop van die 2018 Junior Trofee-toernooi in Roemenië, waar die jong span vierde geëindig het.
Mensah het egter uitgewys dat Kemp se aanstelling as plaasvervanger vir Roger Thompson op redelike kort kennisgewing voor die Augustus/September-toernooi in Boekarest genoodsaak was.
“Ons sal die aanstelling van die o.20 afrigter/s, bestuurder en mediese personeel op ’n deursigtige wyse moet laat geskied, deur die poste in die media te adverteer.
“Uiteraard is die implikasie van die koste-aspek van die aanstellings ook nog onseker (vanweë die dooiepunt tussen die NRU, die Namibiese Rugbymaatskappy en Wêreldrugby wat reeds maande aan die gang is).
“Ons hoop en strewe om die onderhandelingsproses voor die einde van Januarie af te handel, sodat ons die o.20’s se program van voorbereiding aan die gang kan kry,” het Mensah gesê.
• Die Namibiese Rugbymaatskappy se uitvoerende hoof, mnr. Mervin Green, sê Wêreldrugby kommunikeer sedert sy feitebesoek in Desember net met die NRU en nie met die Maatskappy nie.
“Die o.20’s was tot nou toe deel van die hoëprestasieprogram, maar as die Rugby-unie dit wil oorneem, moet hulle maar verantwoordelikheid neem,” sê hy.
Des te meer indien jy só vroeg in 2019 by Namibiese rugby betrokke is. Dan is dit oënskynlik eerder ’n geval dat die uurglas om elke hoek en draai wag om dinge vir jou onmoontlik te maak.
Die reeds bekende patroon wat tussen Wêreldbeker-siklusse afspeel, waarin Namibië hom dikwels weens tweespalt op bestuursvlak in een of ander soort selftoegediende chaos bevind, eis steeds sy tol.
Die nuutste slagoffer hiervan kan die nasionale o.20-span wees wat jaarliks in ’n Afrika-toernooi meeding en dan gewoonlik kwalifiseer vir deelname aan ’n sterker internasionale toernooi.
Kort voor Kersfees het Rugby Afrika bekend gemaak dat sy Junior Barthes-toernooi vir die topvier spanne in die A-afdeling vanaf 27 tot 30 Maart 2019 in Nairobi, Kenia aangebied gaan word.
Op die eerste wedstryddag, 27 Maart, speel die titelhouer Namibië teen Senegal, gevolg deur die botsing tussen Kenia en Tunisië. Senegal en Tunisië vervang Zimbabwe en Madagaskar, wat ná verlede jaar gerelegeer is.
Drie dae later volg die bronsfinaal tussen die twee verloorspanne, gevolg deur die finaal. Die kampioen van die A-afdeling dring deur tot die 2019 Wêreldrugby Junior Trofee-toernooi, wat vanaf 9 tot 21 Julie in Brasilië sal plaasvind.
Republikein se navrae het laat blyk dat geen afrigterspan nog in plek is om leiding met die samestelling en voorbereiding van vanjaar se o.20-span te neem nie. Dit terwyl die sperdatum voor hul eerste wedstryd vandag op ’n skrale 69 dae begin aftel.
Die Namibië Rugby-unie (NRU) se president, mnr. Corrie Mensah, het dié week aan die koerant gesê die NRU is tevrede met die vertoning van Henry Kemp en sy toerverslag na afloop van die 2018 Junior Trofee-toernooi in Roemenië, waar die jong span vierde geëindig het.
Mensah het egter uitgewys dat Kemp se aanstelling as plaasvervanger vir Roger Thompson op redelike kort kennisgewing voor die Augustus/September-toernooi in Boekarest genoodsaak was.
“Ons sal die aanstelling van die o.20 afrigter/s, bestuurder en mediese personeel op ’n deursigtige wyse moet laat geskied, deur die poste in die media te adverteer.
“Uiteraard is die implikasie van die koste-aspek van die aanstellings ook nog onseker (vanweë die dooiepunt tussen die NRU, die Namibiese Rugbymaatskappy en Wêreldrugby wat reeds maande aan die gang is).
“Ons hoop en strewe om die onderhandelingsproses voor die einde van Januarie af te handel, sodat ons die o.20’s se program van voorbereiding aan die gang kan kry,” het Mensah gesê.
• Die Namibiese Rugbymaatskappy se uitvoerende hoof, mnr. Mervin Green, sê Wêreldrugby kommunikeer sedert sy feitebesoek in Desember net met die NRU en nie met die Maatskappy nie.
“Die o.20’s was tot nou toe deel van die hoëprestasieprogram, maar as die Rugby-unie dit wil oorneem, moet hulle maar verantwoordelikheid neem,” sê hy.
Kommentaar
Republikein
Geen kommentaar is op hierdie artikel gelaat nie