O.20-talent maak Thompson opgewonde

Andrew Poolman - ’n Oefengroep propvol talent is gister deur die Namibiese onder 20 rugby-afrigter Roger Thompson aangekondig wat vir volgende maand se Wêreldrugby Junior Trofee-toernooi in Uruguay sal voorberei.Die Namibiese groep sal op 26 Augustus na Suid-Amerika vertrek vir die toernooi waaraan agt ontluikende rugbylande deelneem wat elke vasteland verteenwoordig. Namibië is gegroepeer om teen Kanada (29 Augustus), Chili vier dae later en daarna Japan te speel, voor die laaste uitspeelwedstryd vir die eindposisie.Die Junior Trofee se groot prys vir die kampioenspan is dat dié nasie die volgende jaar na die o.20 wêreldkampioenskap bevorder kan word.Thompson se groep van 34 spelers floreer van spelers wat tevore die toets deurstaan het om die land met onderskeiding by die o.18 Cravenweek te verteenwoordig en klim ook die volgende trappe in senior rugby. Twee groeplede het Namibië vanjaar reeds op senior toetsvlak verteenwoordig, naamlik die losskakel en waarskynlike o.20-kaptein Cliven Loubser asook die haker Obert Nortjé. Beide was laas naweek in die beginspan vir die Afrikabeker-wedstryd teen Uganda in Kampala, waar Loubser met ’n strafdoel en drie doelskoppe geslaag het. Die losskakel het verlede maand ook in die einste Uruguay saam met die senior nasionale span vir die Wêreldrugby Nasiebekertoernooi getoer.In die provinsiale SuperSport uitdaagreeks het die stut Nelius Theron (Wanderers) en vleuel Collins Omalu (Western Suburbs) ook al die Welwitschias-trui gedra.“Heelwat van die groeplede oefen al ’n geruime tyd by die Namibië Rugby-akademie, maar vir die oefenkamp bring ons ook die spelers in wat by universiteite en rugby-akademies in die buiteland speel.In ’n laat terugslag is Thompson gister ingelig dat Gerswin Mouton, Windhoek Affies se blink buitesenter, tydens die afgelope o.18 Cravenweek sy enkelligamente beseer het en dus weggelaat moes word. Mouton en die vaskopstut Gerhard Opperman (seuns van die 1999 Wêreldbeker-spanmaats Deon Mouton en Jood Opperman) sou die twee spelers uit die jonger ouderdomsgroep gewees het vir wie Thompson wou nader trek. Seuns jonger as die tydgleuf van twee kalenderjare waarin ’n speler onder 20 is, mag gekies word indien die ouers ’n toestemmingsbrief gee. Amerika en Hongkong is nog die enigste lande wat al ’n speler vir drie o.20-toernooie gebruik het.Oor die jong Opperman sê Thompson dat hy as een van die belowende vaskoppe by die proewe na vore getree het, terwyl die afrigter ook vir Allie Emamdien van ’n losvoorspeler na ’n loskopstut wil omskep.“Sy klub Unam het hom nog nie in die posisie begin gebruik nie, maar ons het daaroor gepraat. Allie kan dalk net te swaar en te kort raak vir ’n toekoms as losvoorspeler, maar hy het plofkrag en sy kragtoetse is goed genoeg om hom as ’n dinamiese voorry te gebruik wat vir die land baie werd kan wees.”Nog ’n posisie waarin die diepte vir Thompson opgewonde maak, is die hakers. “Obert het laas naweek die toets teen Uganda begin; Darius von Solms speel vir die Luiperds in die o.19 Curriebeker en JT Basson (voorheen WHS) is in baie goeie kondisie waar hy saam met ons oefen.Die oefengroep:Stutte: Marino Goagoseb (Unam), Gerhard Opperman (Windhoek Gimnasium), André Rademeyer (WP Akademie), Norman Erasmus (West Coast Sharks), Patrick Schickerling (Walvisbaai Privaat Hoërskool), Adriaan Vermeulen (Windhoek Gimnasium), Allie Emamdien (Unam), Nelius Theron (Wanderers).Hakers: Obert Nortjé (Unam), JT Basson (Rustenburg Barbarians), Darius von Solms (Luiperds).Slotte: Le Beau du Preez (Pukke), Diamando Tjombe (Western Suburbs), Rheinhardt Carelse (Unam), Armand Kotze (Windhoek Gimnasiums), Adriaan Ludick (Paarl Gimnasium).Losvoorspelers: Prince Goagoseb (Blou Bulle akademie), Peter Diergaardt (Blou Bulle akademie), Tjingari Katjivi (Western Suburbs), Riaan de Klerk (Walvisbaai rugbyklub), Oderich Mouton (WHS).Skrumskakels: Wihan von Wielligh (Pukke), Jay-C Olivier (Blou Bulle akademie).Losskakels: Cliven Loubser (Sharks), Armando van Wyk (Pukke).Senters: Tristan Mouton (Universiteit van Wes-Kaap), Brandon Groenewald (Sharks), Alastair Miller (Western Suburbs).Vleuels: Luke Jansen (Blou Bulle akademie), Chrischen Olivier (Windhoek Gimnasium), Chad Plato (Blou Bulle akademie), Collins Omalu (Western Suburbs).Heelagters: André van der Berg (Wanderers), PW Steenkamp (Universiteit van Johannesburg).

O.20-talent maak Thompson opgewonde

Kommentaar

Republikein 2025-12-16

Meld asseblief aan om kommentaar te lewer

O.20-talent maak Thompson opgewonde

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.