NWR-werkers staak vanaf Vrydag

Augetto Graig - Toeriste wat die naweek by een van die 21 oorde van Namibia Wildlife Resorts (NWR) gaan bly, sal dalk 'n staking deur werknemers moet trotseer.Dié staatsonderneming, die grootste in die land se belangrike toerismemark, het gister (1 Junie) die dreigende staking bevestig. NWR se besturende direkteur, me. Zelna Hengari, sê “ons verseker ons belanghebbendes en kliënte dat ons gedurende die beplande staking sake sal doen en die veiligheid en welstand van ons gaste is ons belangrikste oorweging. Ons sal alles doen om gasvrye diens te lewer en ons gaste te verwelkom.” Volgens Hengari is die dooie punt in onderhandeling tussen NWR en die Namibiese Unie vir Staatsdienswerkers (Napwu) oor die vakbond se eise vir 'n 15%-verhoging van salarisse vir kategorie A- en B-werkers en 12% vir kategorie C- tot D-werkers. Hulle eis verder 'n verhoging van behuisingstoelae van 50% vir kategorie A- en B-werkers, en 45% vir kategorie C- en D-werkers. Voorts eis hulle ’n maandelikse bostoelae van minstens N$500 per maand. “Weens die moeilike finansiële situasie van die maatskappy kon NWR die eise van die vakbond nie nakom nie,” het Hengari gesê." 'n Ander belangrike kwessie waaroor die vakbond nie wou onderhandel nie, spruit uit 'n ministeriële ingryping in 2005 toe werkers vier dae 'n maand verlof gekry het buiten ander verlofvoordele," sê Hengari. Volgens haar het dit tot die vergroting van die NWR-werksmag en bykomende koste van N$6,9 miljoen per jaar ten opsigte van salarisse gelei. Sy hou vol NWR betaal sy werkers meer as sy mededingers en voorsien ook voordele soos gratis behuising by oorde, water en elektrisiteit, vervoer en soms ook kos. " In die toerismesektor is ons dié werkgewer van keuse," het Hengari gesê.Volgens haar het die maatskappy reeds op 18 Februarie met die vakbond vergader, maar toe NWR noem finansiële beperkings verhoed die nakom van Napwu-eise, het die vakbond die arbeidskommissaris om 'n versoeningsvergadering op 13 April genader. Daar het Napwu aanvaar dat uitstel aan die NWR-bestuur gegee word om 'n mandaat van die nuwe raad te kry. Die raad het op 19 Mei die mandaat gegee om vir 'n inflasie-gekoppelde verhoging te onderhandel, maar nie meer as 5% nie en op voorwaarde dat die vier verlofdae per maand geskrap word. Mnr. Cleophas Katuuo van Napwu vertel 'n ander storie van moedswillige gedrag van die NWR-bestuur om op die nippertjie uitstel te vra en spanning te skep. “Ons het ons voorstelle op 30 Junie 2015 aan NWR gegee, maar hulle het bloot geweier om te onderhandel. Elke keer as hulle op die nippertjie uitstel, moet ons die vervoer en verblyfkoste vir ons onderhandelaars betaal. Van hulle kom van ver,” sê hy.As voorbeeld vertel Katuuo van 'n vergadering wat vir 28 April beplan was en die NWR-bestuur belowe het hulle sal die verblyf- en vervoerkoste dek. Dit was tydens die NWR-bestuursnaweek by Gross Barmen waar na bewering meer as N$300 000 bestee is. “Toe ons mense hier kom, was daar geen akkommodasie bespreek nie en niks was betaal nie,” sê Katuuo. “Ons moes hulle by ons gastehuis in Olympia akkommodeer. Teen vieruur bel NWR my en sê ons moet hulle uitboek. Hulle sou toe na Gross Barmen geneem word. Sewe-uur bel NWR weer en sê herbespreek die onderhandelaars by die gastehuis omdat daar geen vervoer is nie,” sê hy.Katuuo sê hul lede, meer as 700 van NWR se meer as 1 000 werkers, het by elke oord en by die NWR-hoofkantoor reeds ten gunste van die staking gestem.

NWR-werkers staak vanaf Vrydag

Kommentaar

Republikein 2025-07-18

Meld asseblief aan om kommentaar te lewer

NWR-werkers staak vanaf Vrydag

Kommentaar

Republikein 2025-07-18

Meld asseblief aan om kommentaar te lewer

MELD AAN

Advertensie