Nuwe Tara terug met 'n brul

Tielman van Lill - Die 2016 Tara & Friends tydren wat op 18 en 19 November in en om die hoofstad deur die Windhoek Motorklub aangebied word, gaan vanjaar heelwat opwinding en kykgenot aan motorsportgeesdriftiges verskaf.Die Tara is die onbetwiste hoogtepunt van die Namibiese tydrenseisoen en het oor jare reeds ikoniese status verwerf, vandat legendes soos Sarel van der Merwe (Suid-Afrika) en Llewellyn Anthony (Namibië) die byeenkoms gewen het. Intussen het die brandstofreus Total wat die Tara sedert sy ontstaan geborg het, hom onttrek en daar is wyd en syd gegis dat die doodsklok vir die byeenkoms gelui het.Die doemprofete het egter nie rekening gehou met jarelange vriende van die Windhoek Motorklub wat gesorg het dat die 2016 Tara vanjaar opnuut belangstelling in Namibië en Suid-Afrika gaande maak nie. Japie van Niekerk, die Suid-Afrikaner wat in 2014 as kampioen bekroon is, kon verlede jaar as gevolg van meganiese probleme nie sy titel verdedig nie. Van Niekerk sou aanvanklik nie vanjaar deelgeneem het nie, maar gaan beslis die Oranjerivier oorsteek om die plaaslike jaers opdraande te gee.Richard Slamet, voorsitter van die Windhoek Motorklub, sê die nuwe Tara sal korter en vinniger as in die verlede wees om die byeenkoms selfs méér kykervriendelik te maak.“Ons gaan weer ''n super spesiale sneldeel die Saterdagmiddag by die Tony Rust renbaan hê waar twee karre saam-saam wegspring. Elkeen volg ''n afsonderlike roete en ná een ronde wissel die jaers die trajek af sodat elkeen dieselfde pad voltooi. Op dié manier word niemand bevoordeel nie en is die speelveld gelyk,” het Slamet verduidelik.“Die trajekte is só gekies dat dit maklik bereikbaar vir toeskouers sal wees. Die opwindende sneldeel by die stadions in Olympia is weer op die spyskaart waar groot getalle ondersteuners oudergewoonte sal saamdrom. “Die verste wat ons noord sal gaan, is net anderkant die padblokkade op die Okahandja-Windhoekpad en die verste suid is ''n trajek digby Omeya wat sy eie uitdagings sal bied,” sê die voorsitter.“Ons was gelukkig genoeg om wat ons vriende van die Windhoek Motorklub noem, as borge aan boord te kry. Hul entoesiasme was ongelooflik en dit het ons as organiseerders gemotiveer om opnuut ''n belowende tydren saam te stel,” het Slamet vertel.“Ek wil in my hoedanigheid as die voorsitter van die Windhoek Motorklub, die organiserende komitee van die Tara asook komiteelede van ons klub vir hul moeite en harde werk bedank. ''n Spesiale dank aan al die borge wat saamgestaan het om die Tara te laat voortleef,” het Slamet gesê.Die groep hoofborge is City Clutch & Brake (CCB), I-S Freight Services, Griffin Transport en Legacy Hotel & Casino, terwyl M + Z Motors, Kosmos, Sat-Com, Super Tyres, Chubb, LSS, Sirkel Motors en C.A.M Namibia ook ruimhartig as ondersteunende borge optree.Die 2016 Tara & Friends tydren spring op 18 November om 13:00 by die Tony Rust renbaan weg en sal die volgende dag weer daar eindig.

Nuwe Tara terug met 'n brul

Kommentaar

Republikein 2025-06-17

Meld asseblief aan om kommentaar te lewer

Nuwe Tara terug met 'n brul

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie