Nuwe Swapo-sekretariaat

Denver Kisting Die regerende party, Swapo, het Woensdagmiddag sy nuwe sekretariaat in die hoofstad bekend gemaak.Volgens Swapo se sekretaris-generaal, me. Sophia Shaningwa, gaan dié span die party se politburo tot 2022 met sleutelbesluite bystaan.Kragtens die party se grondwet hou die sekretariaat se rol verband met bystand vir die inwerkingstelling van besluite en opdragte soos die partykongres voorskryf.Shaningwa is die voorsitter van die sekretariaat terwyl die adjunk-sekretaris-generaal, mnr. Marco Hausiku, die ondervoorsitter is.Professor Peter Katjavivi, die speaker van die Nasionale Vergadering (NV), sal tydens die nuwe termyn gelas wees met eksterne betrekkinge, terwyl mnr. Erkki Nghimtina, die huidige minister van arbeid, nywerheidsbetrekkinge en werkskepping, wag gaan hou oor Swapo se verdedigings- en veiligheidsportefeulje.Mnr. Tjekero Tweya, die minister van nywerheidsontwikkeling, handel en SME-ontwikkeling, gaan verantwoordelik wees vir die finansies van die party. Shaningwa het Woensdag benadruk sy gaan geen wanbestuur van die party se hulpbronne duld nie.Met die oog op openbare betrekkinge – spesifiek die verhouding met die media en kommunikasie-aangeleenthede – is me. Hilma Nicanor, die adjunkminister van veteranesake, aangestel om daardie portefeulje te behartig.Dit is opnuut beklemtoon dat magte, wat hulle daarop toespits om die party se leierskap en die organisasie in oneer te bring met foutiewe inligting, voor stok gekry word. In dié verband het Shaningwa gesê: “Ons moet ons party en ons leiers beskerm.”Me. Doreen Sioka, die minister van geslagsgelykheid en kinderwelsyn, gaan vir die volgende vyf jaar verantwoordelik vir Swapo se onderwys-, kultuur- en sportaangeleenthede wees, terwyl die minister van werke en vervoer, mnr. John Mutorwa, met vervoersake gemoeid sal wees.Swapo moes die afgelope klompie jare miljoene dollar opdok vir regsfooie, en om te help toesien dat dié en ander aangeleenthede die hoof gebied word, is die prokureur-generaal, adv. Albert Kawana, aangewys.Die minister van landbou, water en bosbou, mnr. Alpheus !Naruseb, sal na ekonomiese aangeleenthede omsien, terwyl die NV se adjunkspeaker, me. Loide Kasingo, gemoeid sal wees met arbeidskwessies. Me. Margaret Mensah-Williams, die voorsitter van die Nasionale Raad (NR), is aangestel as Swapo se verteenwoordiger vir gesondheid en maatskaplike dienste.Mnr. Pohamba Shifeta, die huidige minister van die omgewing en toerisme, gaan ook die party se omgewingsake behartig, terwyl me. Sylvia Makgone, die adjunkminister van visserye en mariene hulpbronne, 'n oog oor landboukwessies sal moet hou.Die goewerneur van die Khomasstreek, me. Laura McLeod-Katjirua, sal moet waghou oor Swapo se behuisings- en sanitasiebeleid en die jeugleier mnr. Ephraim Nekongo se fokus gaan die jeugliga wees. “Ons verwag van die jeug om by die ouer garde te leer omdat hulle die wysheid het,” het Shaningwa voorts tydens die aankondiging gesê.Me. Eunice Ipinge gaan die party se vroueraadsverteenwoordiger op die sekretariaat wees en mnr. Mukwaita Shanyenga, die oudmediaman, gaan vir die ouer garde se belange pa staan.

Nuwe Swapo-sekretariaat

Kommentaar

Republikein 2026-08-03

Meld asseblief aan om kommentaar te lewer

Nuwe Swapo-sekretariaat

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.