‘Nuwe normaal’ in gasvryheidsbedryf

Yandi du Plessis - Jy is heel moontlik al redelik keelvol om jou eie etes voor te berei. Dit is immers hoekom restaurante daar is. Tydens die inperking moes eetplekke noodgedwonge hul deure toemaak en was afhanklik van mense wat wegneemetes bestel het. Kelners moes met hul hande gevou sit aangesien dit bloot nie vir hulle moontlik was om te werk nie.Namibië het fase 3 van die inperking op Dinsdag betree, wat beteken restaurante kan weer hul deure oopmaak. Streng regulasies moet egter gevolg word om die veiligheid van personeellede en kliënte te verseker. Republikein het verskeie restaurante en koffiewinkels Dinsdagoggend (2 Junie) besoek en baie plekke was nog redelik leeg gewees. Van die eienaars meen mense is nog skepties om in restaurant en koffiewinkels te sit en eet en sal nog steeds eerder wegneemetes bestel, omdat hulle dit as “veiliger” beskou.Meeste kliënte is egter opgewonde om weer te gaan sit en ’n koppie koffie te geniet. Mnr. Wilbur Izaaks, die eienaar van Dulcé Café in Maerua Mall, het dié oggend gesê hulle het reeds baie kliënte in die koffiewinkel gehad. “Baie mense het reeds gesê hulle is opgewonde om weer te kom sit en koffie drink. Ons is ook opgewonde om dinge so normaal as moontlik te laat voortgaan,” het Izaaks gesê. “Een kliënt het vanoggend vir my gesê hy is bly om vir ’n slag uit ’n regte koppie te drink en nie ’n wegneembeker nie. Hy het selfs gesê hy sal vir ’n nuwe koppie betaal,” het hy bygevoeg.Izaaks het gesê hulle het alle moontlike veiligheidsmaatreëls geïmplementeer om almal se veiligheid eerste te stel. Om te verseker dat sosiale afstand gehandhaaf word, is ongeveer ’n derde van die tafels en stoele verwyder, sodat daar genoeg spasie tussen die oorblywende stoele en tafels is. Die oppervlaktes, veral die toonbank en tafels waar kliënte sit, word gereeld skoongemaak en handontsmetmiddels is beskikbaar. Aangesien mense daar is om te eet en drink kan hulle uiteraard nie heeltyd maskers dra nie, maar Izaaks sê die kelners en ander personeellede dra heeltyd hul maskers. Die Dulcé-franchise het ook ’n regulasie geïmplementeer dat nie meer as een chef ’n enkele bord kos voorberei nie. Elke chef berei dus ’n enkele bestelling alleen voor om te verseker nie baie mense kom in aanraking met die kos nie. Mense kan volgens die regulasies nie in ’n eetplek gaan sit as hulle nie vooraf bespreek het nie. Só kan die getal mense wat binne is beheer word om te verhoed dat te veel mense op een slag in ’n restaurant is. Izaaks sê hulle het reeds Dinsdagoggend twee of drie besprekings gehad.Izaaks het weer eens bevestig die Covid-19-inperking het die gasvryheidsbedryf hard getref. “Ons het beslis die afgelope tyd voorraad verloor. In die begin van die inperking moes ons byvoorbeeld eiers aan die personeel uitdeel, anders sou dit sleg word.”Hy sê alle Namibiërs moet in die tyd moeite doen om mekaar te ondersteun. “Dit maak nie saak hoe versigtig ons is nie, mense is steeds skepties om weer te gaan sit en eet. Ons maak staat op die publiek om klein besighede te ondersteun.”Me. Caroline Geises, die bestuurder van Fika Coffee Bar, sê hulle volg dieselfde maatreëls. “Die tafels is ver van mekaar om te verseker die regte afstand word gehandhaaf. Kliënte se hande word by die toonbank ontsmet en die personeel dra altyd maskers. Ons maak ook gereeld die oppervlaktes skoon.”Ook hulle kliënte wat graag wil sit en aan ’n koppie koffie teug moet eers vooraf bespreek. Meeste koop nogsteeds net wegneemetes. Geises sê baie mense het reeds Dinsdagoggend die koffiewinkel besoek. Sy sê hulle het geen nuwe riglyne van die regering ontvang nie en volg steeds die maatreëls wat tydens die inperking gegeld het. Die personeel van Mountain Eagle Spur was Dinsdagoggend besig om die restaurant van hoek tot kant skoon te maak. Oral, van die ontvangstoonbank tot by die badkamers, staan bottels handontsmetmiddel wat vrylik vir kliënte beskikbaar is. Personeel moet sosiale afstand handhaaf en maskers dra. Minder personeellede sal ook per skof werk. Volgens me. Paula Cadet, die bestuurder, sal daar te alle tye ’n tafel tussen kliënte oop wees. Saam met al die personeellede mag daar nie meer as 50 mense in die restaurant wees nie, daarom sal hulle ook slegs mense laat aansit wat vooraf ’n tafel bespreek het. Alle kliënte moet volgens standaardprosedure hul besonderhede in die register by die ontvangstoonbank invul, indien ’n potensiële geval moontlik daar was en almal waarmee hy/sy in kontak gekom het opgespoor moet word. Cadet sê hulle het gelukkig tydens die inperking nie baie voorraad verloor nie, aangesien hulle ruim verkoel- en vriesgeriewe het. Sy sê hulle het baie simpatie met kleiner restaurant wat nie dieselfde geriewe het nie. “Dit was baie erg om een dag nog soos normaal aan te gaan en skielik die volgende dag net ons deure toe te maak,” sê Cadet. Al dié restauranteienaars vra dat mense plaaslike besighede ondersteun, die gasvryheidsbedryf het dit nou baie nodig.Almal sê dieselfde: “Moenie bang wees om weer iewers te gaan sit en eet nie. Jou veiligheid is ons eerste prioriteit.” – yandi@myzone.com.na

‘Nuwe normaal’ in gasvryheidsbedryf

Kommentaar

Republikein 2026-07-31

Meld asseblief aan om kommentaar te lewer

‘Nuwe normaal’ in gasvryheidsbedryf

Kommentaar

Republikein 2026-07-31

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.