Nuwe minimumloon vir plaaswerkers kom

Elvira Hattingh – Onderhandelinge oor ‘n minimumloon vir plaaswerkers tussen lede van die Namibië Landbou Arbeidsforum (Nalf) sal na verwagting teen 31 Julie afgehandel en onderteken wees.
Dit volg nadat die Landbouwerkgewersvereniging (LWV) tydens sy kongres op Dinsdag 14 Junie ‘n mandaat ontvang het waarvolgens onderhandelinge binne die arbeidsforum tussen onderskeie partye moet plaasvind, naamlik die Namibië Landbou-unie (NLU), Namibië Nasionale Boere-unie (NNFU) en die Nasionale Unie vir Namibiese Werkers se geaffilieerde Namibiese Plaaswerkersunie (NAFWU).
Die LWV se ondervoorsitter, mnr. Hellmut Förtsch, het gesê alvorens onderhandelinge afgehandel is, kan die LWV nie hierdie mandaat bekend maak nie. Daar moet ook eers met NNFU hieroor ooreengekom word waarna die twee werkgewersunies verder met die vakbond sal onderhandel.
Förtsch het gesê dat die vereniging die styging in produksiekoste en inkomste van landbouprodusente asook inflasiesyfers oor die afgelope twee jaar onder oë geneem het en ‘n voorgestelde verhoging in die minimumloon uitgewerk het.
“Produksiekoste van boere het die afgelope twee jaar sedert die huidige minimumloon vasgestel was, met 26% gestyg, terwyl die inkomste in die ooreenstemmende tyd met net 13% gestyg het. Inflasie oor die twee jaar was gesamentlik 9,9%, terwyl voedselinflasie14,8% was. Na verwagting sal laasgenoemde nog verder styg as gevolg van die huidige droogte in Suider-Afrika.”
Mnr. Danie van Vuuren, hoofbeampte van die LWV by die Namibië Landbou-unie (NLU), het egter gesê dat nie met die vakbond onderhandel hoef te word nie omdat dit nie meer as 50% van plaaswerkers verteenwoordig nie.
“Ons doen dit egter om proaktief te wees om te verhoed dat ‘n minimumloon deur die regering op landbouers afgedwing word, soos dit in Suid-Afrika gebeur het. Verskeie bedrywe, waaronder konstruksie, petroljoggies, sekuriteit en huishulpe se minimumloon is onlangs verhoog.”
Me. Christine Stoman, die LWV se voorsitter, het tydens haar voorsittersrede gesê sommige arbeidskonsultante mislei plaaswerkers en sê dat die minimumloon reeds verhoog is.
“Indien die onderskeie partye ‘n ooreenkoms bereik het, sal dit in die teenwoordigheid van die minister van arbeid, nywerheidsbetrekkinge en werkskepping onderteken word. Werkgewers sal dienooreenkomstig ingelig word en moenie toelaat dat vakbonde of sogenaamde arbeidskonsultante vals gerugte op hul plase versprei nie,” het Stoman gesê.