Nuwe leerplan vir IEB-skole

Henriette Lamprecht - Uitstel is tot 2021 deur die Suid-Afrikaanse minister van basiese onderwys aan Independent Examinations Board(IEB)-skole in Namibië gegee om nuwe leerplanne en eksamens in die taalvoorkeur van dié skole te ontwikkel. Die ontwikkeling geskied in samewerking met IEB.Die uitstel geld ook vir IEB-skole buiten dié in Suid-Afrika en die Suider-Afrikaanse Ontwikkelingsgemeenskap(SADC)-streek. Die ontwikkeling van die nuwe leerplanne en eksamens is afsonderlik van die Nasionale Senior Sertifikaat (NSC) waaraan die IEB gekoppel is, en is op dieselfde internasionaal erkende standaard as die huidige IEB-stelsel.Volgens die IEB-skoolhoofde se verteenwoordiger vir Namibië, die Noord-Kaap, Noordwes en die Vrystaat, mnr. Henry McCarthy, wat ook hoof van Pro-Ed Akademie se sekondêre skool is, volg dít ná ‘n opdrag van die buurland se onderwysminister in 2016 dat die NSC ná 2019 volgens ‘n regsbeperking nie meer buite die grense van Suid-Afrika geskryf mag word nie. Die uitsteldatum is intussen tot 2021 verleng.“Die regsbeperkings verwys na die regulasies oor die uitvoer, administrasie en bestuur van die nasionale senior sertifikaat (NSC) wat die skryf van die NSC tot Suid-Afrikaanse burgers beperk,” het McCarthy verduidelik.Volgens McCarthy is IEB-skole in Namibië sedert 2016 in gesprek met die Namibiese ministerie van onderwys, kuns en kultuur, die direktoraat vir nasionale eksamens en evaluering (DNEA), die Nasionale Instituut vir Opvoedkundige Ontwikkeling (NIED), die Namibiese Kwalifikasie-owerheid (NQA), sowel as IEB oor die pad vorentoe. Hy het die hoop uitgespreek dat die samesprekings “oor ‘n lewensvatbare pad vorentoe” teen die einde van die jaar afgehandel sal wees. “Ons het dus van nou af twee en ‘n halwe jaar om nuwe, alternatiewe kwalifikasies gereed te kry, voordat die eerste groep graad 12’s in Namibië dit in 2022 kan skryf,” het McCarthy gesê.Volgens hom het die komitee wat deur die Namibiese Afrikaanse Privaat Skole-organisasie (Napso) opdrag gegee is om die proses te bestuur, aan die einde van verlede jaar reeds sekere voorleggings aan die Namibiese onderwysowerhede gedoen.“Ons wag nog vir amptelike terugvoering op hierdie voorleggings.”Hy het beklemtoon skole in Namibië wat die IEB-leerplan volg en die betrokke eksamens skryf, se voortbestaan is “glad nie gekoppel aan IEB nie”.“Die skole sal bly voortbestaan ongeag die leerplan of eksamenstelsel wat gevolg of geskryf word. Die gerusstelling is dat ons voortdurend in gesprekke met die Namibiese onderwys- en ander kwalifikasieowerhede, sowel as die IEB, oor ‘n lewensvatbare pad vorentoe is en dat beide partye ons ondersteun en met raad bystaan.”Aan die einde van 2018 se graad 12-eksamen het IEB-kandidate (249 privaat skole van Suid-Afrika, Namibië, Swaziland en Mosambiek en 12 372 studente in totaal) 'n slaagsyfer van 98,92% behaal, terwyl 90,65% van die studente vir graadkursusse gekwalifiseer het.Die IEB word deur Umalusi (skooleksamineringsliggaam vir SA) geakkrediteer en is ‘n internasionaal erkende kwalifikasie wat deur al die top-universiteite oraloor die wêreld en in Suid-Afrika aanvaar word.McCarthy verduidelik voor 2000 het die meeste Napso-skole Impak- of Sukseskorrespondensiekursusse en –eksamens of een van die provinsiale onderwysdepartemente in Suid-Afrika, soos die Kaapse Onderwysdepartement (KOD), se sillabusse en eksamens gevolg.“Die hoofrede was dat dié instansies se leerplanne en eksamens in die moeder- en onderrigtaal van die betrokke skole was.”Dit is voorts gedoen met die goedkeuring van die Namibiese ministerie van onderwys, kuns en kultuur. Met die uitfasering van die KOD(Kaapse Onderwysdepartement)-eksamens in 1998 weens ‘n ooreenkoms tussen die regerings van Suid-Afrika en Namibië ten opsigte van die Walvisbaai-skole wat verstryk het, was die IEB bereid om ses Napso-skole, wat dt versoek het, se leerplanne en eksamens in hul voorkeur moeder- en onderrigtaal te vertaal, verduidelik McCarthy. Dit is ook met die goedkeuring van die ministerie van onderwys, kuns en kultuur gedoen.

Nuwe leerplan vir IEB-skole

Kommentaar

Republikein 2026-06-16

Meld asseblief aan om kommentaar te lewer

Nuwe leerplan vir IEB-skole

Kommentaar

Republikein 2026-06-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.