Nuwe inisiatief vir koerantbedryf

Waar jy jouself ook al in die land bevind, maak nie saak watter dagblad jy lees nie; die koerant wat jy nóú vashou is deur Namibia Distribution Hub afgelewer.Dit is 'n gesamentlike onderneming en is gemik om die bestaan van alle plaaslik gedrukte publikasies te verseker. Deur die aflewering van New Era (op uitgesoekte roetes), The Namibian, Allgemeine Zeitung, Republikein en Namibian Sun, word dié handelsmerke deur 'n gekonsolideerde platform versterk. Dit, om te verseker elke publikasie word vroeër by verspreidingspunte afgelewer en deur 'n onderneming wat die gedrukte media se belange op die hart dra.Die splinternuwe vloot wat dié koerante aflewer, is elkeen met spesiaal vervaardigde trollies toegerus. Hierdie nuwe stelsel help om tyd en geld by aflewering te bespaar.Volgens mnr. Ettienne Kotze, verspreidingsbestuurder, moes hierdie oplossing al lank al ontwikkel en beskikbaar gewees het. “In die verlede sou derde partye koerante in wanorder vervoer. “Die uitdaging was dan om die korrekte bondel te vind en die regte koerante aan die kliënt af te lewer.”“Met die nuwe stelsel word elke koerantbondel op 'n spesifieke trollie geplaas en eenvoudig op die afleweringsvoertuig gelaai. “Dit neem dan net 'n paar minute om die bestelling op 'n ordelike wyse af te laai,” het hy gesê.Dit is egter nie net die afleweringsproses wat vlotter verloop nie. Hy sê sodra die koerante gedruk en verpak is, gaan elke pakkie direk in sy aangewese trollie wat reeds gemerk is met die regte roete, aflaaipunte en verspreidingsagente. Sodoende word die hantering tot die minimum beperk.“Ons agente is tevrede met die orde wat geskep is en die tyd wat bespaar is,” het Kotze gesê. Buiten die New Era en Namibia Media Holdings (NMH) se dagblaaie wat vanaf Newsprint se perseel in Lafrenz gedruk en versprei word, word NMH se publikasies soos Tourismus, Die Boer/The Farmer en Fokus-uitgawes, sowel as Game, Shoprite Usave, HiFi Corp, Dischem en Agra-brosjures ook deur Namibia Distribution Hub versprei. The Namibian, wat by WordPress gedruk word, word elke aand by Newsprint afgelewer. Volgens Kotze kan elke afleweringsvoertuig tot 32 000 koerante van 32 bladsye elk aflewer. Elke voertuig vervoer tans tussen 23 000 en 25 000 koerante elke nag. “En dan het ons nog nie eens ons handige sleepwa aangehak nie,” het hy gesê. Die sleepwa sal hoofsaaklik gebruik word om die noordweste van die land tot by Opuwo te bedien. “Die slagspreuk van Namibian Distribution Hub is 'Namibië behoort aan diegene wat lees'. “Hierdie inisiatief is om te verseker dat ons die gemeenskap op 'n koste-effektiewe manier van inligting voorsien en betyds aan almal in die land versprei,” het Kotze afgesluit.

Nuwe inisiatief vir koerantbedryf

Kommentaar

Republikein 2026-07-17

Meld asseblief aan om kommentaar te lewer

Nuwe inisiatief vir koerantbedryf

Kommentaar

Republikein 2026-07-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.