Nuwe dorp gooi ver en diep

Des Erasmus - Oranjemund se hengelaars het die bakens van die diamantvesting onmiddellik ná dorpswording ver en diep geplant. Toe die Namibiese korporatiewe hengelkompetisie met Hentiesbaai as basis aangebied is, was 'n viermanbrigade van die Oranjemund-hengelklub die wenspan uit meer as 'n halwe honderd aanspraakmakers.Oranjemund het georganiseerde hengel ook op 'n ander gebied getref. Drie spanne is Hentiesbaai toe gestuur en tydens die kompetisie is die voorneme uitgespreek om Oranjemund nou ook een van die geaffilieerde klubs van die Namibiese Hengelunie te maak. Nog meer, Oranjemund stel ook daarin belang om die gasheer van een van die kompetisies van die NHU te wees. Die basis vir sodanige mededinging kan Meobbaai tussen Walvisbaai en Lüderitz wees waar die manne en vroue van die diamantvelde oor 'n hengelkonsessie en basiese verblyfgeriewe beskik. Kennis van die voornemens is reeds deur verteenwoordigers van die Namibiese Hengelunie tydens die kompetisie op Hentiesbaai geneem. Oranjemund was die wenspan met 36,2 kg vis wat Vrydag en Saterdag oor die twee hengeldae deur die vier hengelaars ingebring is. Die tweede span van Auto World was tweede met 34,75 kg vis en die Brandberg White Lady Lodge derde met 33,52 kg.Nog 'n eerste vir die kompetisie was 'n inskrywing deur 'n hengelspan Sea Play van Oshakati. Die hengelaars uit die Noorde is as die bes geklede span van die kompetisie aangewys. Die spanne het hoofsaaklik op die vanggebied noord van Hentiesbaai gekonsentreer met die weegmeesters wat die skaal by Hentiesbaai se Skubbebar beman het. Die swaarste eetbare vis was 'n steenbras en is deur Francois Wolfaardt van Nangkang Tyres gevang. Die ou grote het die skaal op 9,23 kg getrek. Juis steenbrasse het die vangste oorheers met kabeljou wat die agterryer was.Soos die visse het geld op die gewilde jaarlikse kompetisie gepraat. Die pryse het hoofsaaklik uit hengelgerei met 'n geskatte waarde van meer as N$50 000 bestaan. Cymot was die hoofborg en die wenspanne is met visstokke, katrolle, kampeerstoele, buitebande, lugdrukpompe en nog wat beloon. Cymot het benewens die groot borgskap ook N$10 000 aan die Namibiese Hengelunie geskenk om te help met die koste vir die hengeltoets teen Suid-Afrika in die eerste week van Desember. Hentiesbaai gaan ook die basis van die sandslag tussen die twee buurlande wees. Ondersteunende borge van die korporatiewe kompetisie was Nangkang Tyres, Welwitschia Medi Park, Wurth en Komatsu.Die visstok wat op die veiling tydens die prysuitdeling aangebied was, is 'n unieke item. Dit is 'n stok van 15 voet en het blykbaar kwalik sy gelyke in die ganse Namibië. Die koper was Jaco Venter van Windhoek.

Nuwe dorp gooi ver en diep

Kommentaar

Republikein 2025-12-22

Meld asseblief aan om kommentaar te lewer

Nuwe dorp gooi ver en diep

Kommentaar

Republikein 2025-12-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.