Nuwe dam bring hoop aan Noordeboere

Tammy Kleinhans Die nuwe Nghishongwa-gronddam sal onder andere bydra om boere in die noordelike kommunale gebiede se inkomste te verhoog. Die dam is pas deur die MCA-N aan die gemeenskap oorhandig.Die dam se inhoudsmaat is 60 000 kubieke meter en het met ’n sonkrag aangedrewe dompelpomp, ’n pyplyn na watertenks, trôe vir diere en ’n heining.Volgens die MCA-N voorsien die dam water vir groot troppe diere. Die water kan tot twee jaar geberg word en sal inwoners selfs toelaat om tuinbouprojekte te begin. Vir ’n plaaslike boer, mnr. Mathew Popyeni Nanghama, beteken die nuwe dam onmiddellike vooruitgang.“Ons moes in die verlede lang afstande reis om water vir ons en ons diere te kry. Sommige mense het putte gegrawe. Maar danksy die MCA-N, beteken die dam rykdom vir ons, want ons diere sal floreer. Ons kan selfs groente plant en moontlik ook akwakultuur-projekte begin,” het hy gesê.Volgens hom kan baie van die jeug nou projekte begin om geld te genereer wat tot die vermindering van misdaad kan bydra. Die MCA-N se adjunk hoof uitvoerende bedryfsbeampte, mnr. Sikongo Haihambo, het gesê die dam se doel is om die hindernisse in die weg van ekonomiese aktiwiteite te verminder en sodoende boere in staat te stel om meer geld te verdien. Juis daarom is dit belangrik om oplossings te vind waar water permanent vir die diere beskikbaar is.“Die voorsiening van waterpunte was ’n byvoeging tot die oorspronklike beoogde ingryping,” het Haihambo gesê. Volgens Haihambo is 69 waterpunte tot die Noordelike Kommunale Gebied (NCA) se netwerk van sonpaneelstelsels gevoeg, putte met die hand gegrawe is verstewig, waterpunte is teen olifante beskerm, pyplyne is verleng en die dam is gebou. MCA-N het ook die bekendstelling van ’n opsporingstel vir beeste in die NCA ondersteun ten einde die diere se bewegings - van geboorte tot by die slagpale - te bepaal. Hulle het ook vyf moderne veeartsenyklinieke gebou, die kwarantynkampe in die Zambezistreek verbeter en honderde kommunale boere deur middel van die gemeenskapsgebaseerde weiding- en veebestuursprogram (CBRLM) ondersteun. “Ons glo die lewendehawe-sektor is nou beter op die toekoms voorberei en dat hierdie pogings tot die verklaring van ’n siektevrye status vir die NCA deur die Wêrelddieregesondheidsorganisasie sal lei. Dit sal nie net die NCA baat nie, maar die hele Namibië.”Mutorwa het die plaaslike gemeenskap aangemoedig om die dam veral teen vandalisme te beskerm.“Daar is geen twyfel dat die dam daartoe sal bydra om omstandighede en die toestand van die vee te verbeter nie. Boonop sal boere dan beter pryse vir hul diere by veilings kry.”Mutorwa het gesê die regering beplan om op die MCA-N se werk voort te bou deur soortgelyke damme op sekere gebiede oral in die land te bou.Die Amerikaanse saakgelastigde, mnr. John Kowalski, het gesê die dam is gebou omdat spanne van MCC en MCA-N na die boere geluister het wat gesê het: “Sonder water sal nuwe bestuurstegnieke vir die boerdery nie werk nie”.

Nuwe dam bring hoop aan Noordeboere

Kommentaar

Republikein 2025-06-30

Meld asseblief aan om kommentaar te lewer

Nuwe dam bring hoop aan Noordeboere

Kommentaar

Republikein 2025-06-30

Meld asseblief aan om kommentaar te lewer

MELD AAN

Advertensie