Nuwe bestel vir tenders

Augetto GraigDie Tenderraad bestaan van 31 Maart af amptelik nie meer nie. Die minister van finansies, mnr. Calle Schlettwein, het aangekondig die nuwe Wet op Openbare Aankope, Wet no. 15 van 2015, gaan nou in werking tree en die nuwe Sentrale Aankoperaad (SAR) word daarmee saam ingestel om die Tenderraad te vervang. Die SAR bestaan uit die voorsitter, mnr. Patrick Swartz, en sy adjunk, me. Lischen Ramakutla, wat albei vir vyf jaar voltyds aangestel is, asook die sewe raadslede wat vir drie jaar deeltyds aangestel is.Hulle is me. Mansuetta-Maria Nakale, me. Maria Iyambo, mnr. Hendrik Cronje Loftie-Eaton, me. Hilja Nandago-Herman, mnr. Titus Ndove, mnr. Epaphras Pendpala Shilongo en mnr. Jerry Mwadinohamba. In die teenwoordigheid van sy adjunkminister, mnr. Natangwe Ithete, en sy permanente sekretaris, me. Erika Shafuda, het Schlettwein die nuwe wet as 'n transformerende stuk wetgewing beskryf en die nuwe SAR-raadslede aangemoedig om dit presies te volg om openbare staatsaankope te moderniseer en by die beste internasionale praktyke aan te pas. Die raadslede is gekies vir hul ervaring, hul spesifieke kennis en hul geslag. Volgens die minister is 67 aansoeke vir die belangrikste posisies ontvang, waarvan 35 die kortlys gehaal het. By dieselfde geleentheid is die nuwe hersieningspaneel aangewys. Die paneel sal sake hersien wanneer die SAR se besluite die aanbieder of die kliënt noop om beswaar daarteen te maak. Die paneel word gelei deur mnr. Kenandei Tjivikua en sy adjunk, mnr. Michael Gaweseb. Ander lede sluit in mnr. Ono-Robby Nangolo, mnr. Amon Ngavetene, me. Selma-Penna Utonih en me. Toska Sem. Die paneel moet volgens die nuwe wet uit 15 lede bestaan. Schlettwein het gesê akademiese instansies is gevra om kenners aan te beveel om die res van die posisies te vul. Die voorstelle word tans oorweeg en die res van die lede behoort binne 'n maand aangestel te word, het hy gesê. Aankope deur die regering of staatsmaatskappye verteenwoordig tot 60% van plaaslike aanvraag, wat die belangrikheid van die twee nuwe liggame benadruk.Die derde komponent van die nuwe struktuur om aankope te beheer, is 'n beleidseenheid wat volgende maand op die been gebring kan word, sê die minister. Die regering wil openbare aankope verbeter sodat bemagtiging en voorkeurbehandeling plaaslike ekonomiese groei kan bevorder. Volgens die minister sal die nuwe raad etiek, deursigtigheid en aanspreeklikheid moet verbeter om die persepsie van staatsaankope te verbeter en foute van die verlede te vermy. Foute sluit in die verhoging van pryse van sekere tenders, hofsake, asook substantiewe en prosedurele tekortkominge in die tenderproses. “Alle aanbiedinge bo die drumpel wat in die wet voorgeskryf is, moet by die Sentrale Aankoperaad ingedien word. Aanbiedinge onder die drumpel sal van binne die betrokke staatsliggaam of openbare entiteite hanteer word,” sê Schlettwein. “Alle geskille, insluitende wat klaar deur die Tenderraad toegeken is, word nou die verantwoordelikheid van die hersieningspaneel.” By die geleentheid het Swartz gesê die nuwe raad sal werk om die waardes en beginsels van die nuwe wet te inkorporeer asook om hoë standaarde van deursigtigheid en aanspreeklikheid toe te pas. Tjivikua het gesê die paneel neem Namibië se aspirasies ter harte en beloof om 'n sterk fondament te lê vir wat in die beste belang van openbare aankope in die land sal wees.

Nuwe bestel vir tenders

Kommentaar

Republikein 2026-02-05

Meld asseblief aan om kommentaar te lewer

Nuwe bestel vir tenders

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.