Nujoma swyg oor 'verraad'
Die wonde oor die beweerde gruwels van die Swapo-gate is opnuut rou nadat 'n boek daaroor pas verskyn het.
Denver Kisting
“Ek het oombliklik besef Nujoma het ons versaak. Hý het ons gefaal. Hý was die verraaier, nie ek nie.”
Só sê mnr. Oiva Angula, 'n oorlewende van die omstrede Swapo-gate in Lubango in naburige Angola.
Angula maak dié opmerkings in 'n pas verskene onthullende boek oor die rol van die stigterspresident, mnr. Sam Nujoma, in die teistering van vermeende Swapo-verraaiers.
In dié boek, Swapo Captive: A comrade's experience of betrayal and torture, sê Angula Nujoma is 'n leuenaar.
Dít het sy vertroue in Nujoma se leierskap skipbreuk laat ly, vaar Angula verder uit.
Angula sê in dié boek van meer as 160 bladsye woede het in hom gekook toe Nujoma tydens 'n besoek aan die gate daarop sinspeel dat hulle die ontbering verdien het vir hul beweerde ontroue en verraderlike dade.
Dié aanhouding het gevolg nadat Angula en kie gevange neem is omdat hulle na bewering apartheidspioene was.
Volgens hom het dit voorgekom asof Nujoma genot daaruit geput het om hulle emosioneel te kasty.
Angula sê Nujoma het dié blitsbesoek aan die Lubango-gate tydens 1986 gebring.
Die opvatting het destyds bestaan dat Nujoma nie kennis gedra het van die veiligheidsagente se gruweldade nie, sê Angula.
Die aangehoudenes wou tydens dié besoek vir Nujoma “'n ware prentjie skets van die omstandighede sodat hy die malheid kon stopsit”.
Die stemming tydens die kortstondige besoek was gespanne, vertel Angula.
Nujoma se uitvoerende assistent, mnr. John Nauta, het gister gesê hulle het kennis geneem van die boek, maar gaan nie kommentaar lewer nie. “Waarop wil jy hê moet ons reageer?”
Volgens hom is aantygings oor gruweldade in die gate geen nuwe verwikkeling nie.
“Daardie bewerings is al daar sedert die mense in 1989 teruggekeer het. Nee, ons gaan nie op sy boek reageer nie.”
Nauta sê Nujoma se kantoor beplan eweneens geen regsaksie teen die boek nie.
“Waarvoor? Laat hulle praat. Ons het ook (in Namibië) mense wat gely het onder Koevoet en Koevoet is hier.”
Hy sê dit is hoekom die deur destyds vir versoening oopgemaak is.
“Julle mors ons tyd, kollegas,” het Nauta gesê.
Angula, vandag 'n woordvoerder by 'n telekommunikasiemaatskappy, het gedurende die 1970's op 19-jarige ouderdom na Angola uitgewyk waar hy by Swapo se militêre vleuel, Plan, aangesluit het.
Volgens hom is hy verkeerdelik as 'n apartheidspioen gebrandmerk.
Hy het uiteindelik vier en 'n halwe jaar in die gate by Lubango deurgebring, waar hulle volgens hom vir dood agtergelaat is.
Angula is 'n stigterslid en waarnemende voorsitter van Breaking the Wall of Silence (BWS), 'n plaaslike nieregeringsorganisasie wat hom beywer vir die regte van diegene wat deur Swapo aangehou is tydens Namibië se bevrydingstryd.
Me. Sophia Shangingwa, Swapo se sekretaris-generaal, het gistermiddag by navraag onkunde oor die bestaan van Angula se boek gepleit.
“(Dit) is nuus vir my. Ek weet nie waarvan jy praat nie. Ek het nie die boek gesien nie.”
Op 'n vraag oor wat die standpunt van die regerende party is rondom die bewerings van foltering in die gate, het sy gesê: “Moet my nie daardie tipe goed vra nie.”
Angula sê sy seun (toe 16) het hom in 2000 gevra om hom te vertel hoe dit in die gate was.
Dié seun is twee maande nadat Angula “na die gate toe gesleep is”, gebore.
“Ek onthou dat ek na 'n martelkamer geneem is sonder om tot siens te sê aan sy ma, wat toe sewe maande swanger was. Ek is kaal uitgetrek, beledig en gemartel deur Swapo-veiligheidsagente wat vreugde uit my pyn geput het.”
Oor dié boek sê die vermaarde joernalis Werner Menges dit is “'n belangrike en boeiende storie, wat omgaan met 'n veragtelike deel van Namibië se geskiedenis wat verdien om nie vergeet te word nie”.
“Ek het oombliklik besef Nujoma het ons versaak. Hý het ons gefaal. Hý was die verraaier, nie ek nie.”
Só sê mnr. Oiva Angula, 'n oorlewende van die omstrede Swapo-gate in Lubango in naburige Angola.
Angula maak dié opmerkings in 'n pas verskene onthullende boek oor die rol van die stigterspresident, mnr. Sam Nujoma, in die teistering van vermeende Swapo-verraaiers.
In dié boek, Swapo Captive: A comrade's experience of betrayal and torture, sê Angula Nujoma is 'n leuenaar.
Dít het sy vertroue in Nujoma se leierskap skipbreuk laat ly, vaar Angula verder uit.
Angula sê in dié boek van meer as 160 bladsye woede het in hom gekook toe Nujoma tydens 'n besoek aan die gate daarop sinspeel dat hulle die ontbering verdien het vir hul beweerde ontroue en verraderlike dade.
Dié aanhouding het gevolg nadat Angula en kie gevange neem is omdat hulle na bewering apartheidspioene was.
Volgens hom het dit voorgekom asof Nujoma genot daaruit geput het om hulle emosioneel te kasty.
Angula sê Nujoma het dié blitsbesoek aan die Lubango-gate tydens 1986 gebring.
Die opvatting het destyds bestaan dat Nujoma nie kennis gedra het van die veiligheidsagente se gruweldade nie, sê Angula.
Die aangehoudenes wou tydens dié besoek vir Nujoma “'n ware prentjie skets van die omstandighede sodat hy die malheid kon stopsit”.
Die stemming tydens die kortstondige besoek was gespanne, vertel Angula.
Nujoma se uitvoerende assistent, mnr. John Nauta, het gister gesê hulle het kennis geneem van die boek, maar gaan nie kommentaar lewer nie. “Waarop wil jy hê moet ons reageer?”
Volgens hom is aantygings oor gruweldade in die gate geen nuwe verwikkeling nie.
“Daardie bewerings is al daar sedert die mense in 1989 teruggekeer het. Nee, ons gaan nie op sy boek reageer nie.”
Nauta sê Nujoma se kantoor beplan eweneens geen regsaksie teen die boek nie.
“Waarvoor? Laat hulle praat. Ons het ook (in Namibië) mense wat gely het onder Koevoet en Koevoet is hier.”
Hy sê dit is hoekom die deur destyds vir versoening oopgemaak is.
“Julle mors ons tyd, kollegas,” het Nauta gesê.
Angula, vandag 'n woordvoerder by 'n telekommunikasiemaatskappy, het gedurende die 1970's op 19-jarige ouderdom na Angola uitgewyk waar hy by Swapo se militêre vleuel, Plan, aangesluit het.
Volgens hom is hy verkeerdelik as 'n apartheidspioen gebrandmerk.
Hy het uiteindelik vier en 'n halwe jaar in die gate by Lubango deurgebring, waar hulle volgens hom vir dood agtergelaat is.
Angula is 'n stigterslid en waarnemende voorsitter van Breaking the Wall of Silence (BWS), 'n plaaslike nieregeringsorganisasie wat hom beywer vir die regte van diegene wat deur Swapo aangehou is tydens Namibië se bevrydingstryd.
Me. Sophia Shangingwa, Swapo se sekretaris-generaal, het gistermiddag by navraag onkunde oor die bestaan van Angula se boek gepleit.
“(Dit) is nuus vir my. Ek weet nie waarvan jy praat nie. Ek het nie die boek gesien nie.”
Op 'n vraag oor wat die standpunt van die regerende party is rondom die bewerings van foltering in die gate, het sy gesê: “Moet my nie daardie tipe goed vra nie.”
Angula sê sy seun (toe 16) het hom in 2000 gevra om hom te vertel hoe dit in die gate was.
Dié seun is twee maande nadat Angula “na die gate toe gesleep is”, gebore.
“Ek onthou dat ek na 'n martelkamer geneem is sonder om tot siens te sê aan sy ma, wat toe sewe maande swanger was. Ek is kaal uitgetrek, beledig en gemartel deur Swapo-veiligheidsagente wat vreugde uit my pyn geput het.”
Oor dié boek sê die vermaarde joernalis Werner Menges dit is “'n belangrike en boeiende storie, wat omgaan met 'n veragtelike deel van Namibië se geskiedenis wat verdien om nie vergeet te word nie”.
Kommentaar
Republikein
Geen kommentaar is op hierdie artikel gelaat nie