Nujoma en Pohamba skok grondkonferensie

Denver KistingDie leier van 'n burgerlike liggaam sê die omstrede uitlatings deur mnre. Sam Nujoma en Hifikepunye Pohamba by die grondberaad die afgelope week het talle afgevaardigdes stom gelaat.Enersyds het die stellings oor onteiening sonder vergoeding, dat álle grond aan die staat moet behoort en 'n referendum gehou moet word, verras, sê mnr. Uhuru Dempers van die Namibiese Forum vir Nieregeringsorganisasies (Nangof).Andersyds, sê hy, het dié standpunte baie mense geskok.Albei voormalige presidente het Maandag voorgestel die Grondwet moet gewysig word om aan dié eise gehoor te gee.Prof. Nico Horn, 'n regsdosent verbonde aan die Universiteit van Namibië (Unam) en 'n Grondwetkenner, maan dit is egter nie so eenvoudig om aan die oppergesag van die land te peuter nie.Die doel van hoofstuk drie van die Grondwet, wat handel oor fundamentele regte en vryhede, is, sou dit verander word, dit beter regte moet byvoeg en nié wegneem nie, beklemtoon Horn.Dempers en Horn het albei gisteroggend aan die ontbytprogram Good Morning Namibia (GMN) op NBC deelgeneem. Reaksie op Geingob se toespraakPres. Hage Geingob se toespraak tydens die opening van die grondberaad het 'n goeie oorsig van die konferensie gegee en die konteks daarvan verskaf. Só het mnr. Graham Hopwood, uitvoerende direkteur van die Instituut van Openbare Beleidsnavorsing (IPPR), eergistermiddag gesê. Maar, het Hopwood gemaan, Geingob se toespraak werp nie veel lig op watter hervorming en veranderings hy graag wil hê nie. Dit het wel geblyk daar is kommer oor die interpretasie van “regverdige vergoeding” as “billike prys”, sê Hopwood. Volgens hom wil dit voorkom of die regering hierdie vertolking wil wysig. Hy voorsien egter dít sal regtens moeilik wees omdat 'n presedent reeds geskep is met markverwante pryse wat betaal is om te geld as “regverdige vergoeding”. Hopwood het terselfdertyd gesê die grondwetlike veranderinge waarop Nujoma en Pohamba eergister aangedring het, kan ernstige gevolge vir die regspleging en die ekonomie hê. “Dit kan gevra word as hulle in sulke radikale optrede geglo het om private eiendomsregte af te skaf, hoekom hulle dit nie gedoen het terwyl hulle aan bewind was vir 'n gesamentlike tydperk van 25 jaar nie?” Hopwood sê dit is onregverdig dat hulle sulke gewaagde beleid voorstel terwyl hulle nie meer polities verantwoordbaar is nie. Pres. Geingob sal die gelag daarvoor moet betaal, sê hy. Hopwood sê ook daar word gevrees Swapo-politici sal die beraad gebruik om sondebokke te kry vir húl gebrek aan vordering, terwyl húlle nie die besluite van die 1991-beraad in werking kon stel nie. Dit het hoofsaaklik tot die stadige herverdeling van grond in Namibië bygedra. “Daar moet veel eerliker verantwoording wees van die mislukkings en foute wat die afgelope 28 jaar deur veral die ministerie van grondhervorming gemaak is.” Die hervestigingsbeleid het in talle opsigte klaaglik misluk, sê Hopwood.

Nujoma en Pohamba skok grondkonferensie

Kommentaar

Republikein 2025-09-18

Meld asseblief aan om kommentaar te lewer

Nujoma en Pohamba skok grondkonferensie

Kommentaar

Republikein 2025-09-18

Meld asseblief aan om kommentaar te lewer

MELD AAN

Advertensie