NTF kry nuwe leierskap

Tielman van Lill – Die Namibiese Triathlonfederasie (NTF) het onlangs sy nuwe bestuur gekies.Die komitee bestaan uit 'n mengsel van ervare en nuwe lede en is opgewonde om ná sy sukses die afgelope paar jaar dié sport verder te laat groei.Die nuwe komitee se modus operandi vir 2021 is om twee- en driekamp verder te ontwikkel deur meer byeenkomste in Namibië aan te bied en sy ledetal te verhoog.Die nuwe komitee is Roual Spangenberg (president), Risa Dreyer (visepresident), Adelé de la Rey (sekretaris-generaal), Jan-Louis Mostert (tesourier), asook Cheryl Young, Johan van der Westhuizen en Anri Krugel (lede).Die NTF het verduidelik: “Ons wil graag vir mense wys dat jy nie superman hoef te wees om aan twee- of driekamp deel te neem nie. “Daar is kategorieë vir verskeie ouderdomme en fiksheidsgroepe. Die byeenkomste bestaan uit verskillende afstande wat deur die meeste mense baasgeraak kan word wat gesond en aktief is.“Die vereniging sal 'n veldtog loods waar belangstellendes aan afrigters voorgestel gaan word. Die afrigters kan mense help om hul mikpunt te behaal om aan die sportkode deel te neem of sommer boonop in die algemeen 'n gesonder lewe te lei. “Om in 'n driekampbyeenkoms te kompeteer en dit te voltooi, is verreikend en moontlik een van die beste ondervindings ooit wat 'n atleet hulself skuld.“Vanjaar is 'n opwindende jaar vir die NTF, want ons bied die Afrika-duathlonkampioenskap op 17 Oktober in Windhoek aan.“Die legendariese Mariental-triathlon by Hardapdam is met mening terug en daar gaan baie byeenkomste gehou word. Ons skop nou met die tweekampseisoen af waar deelnemers eers draf, dan fietsry en dan weer dieselfde afstand draf. Dié byeenkomste sal op 29 Mei, 10 Julie en 31 Julie plaasvind.“Daar is ook ander kompetisies wat nie deur die NTF aangebied word nie, maar wat mense kan gebruik om hulself aan die sport bekend te stel. Daar is die Tin Man by Uis op 19 Junie, asook 'n virtuele uitdaagreeks gedurende die hele Junie wat as Tri Wars 2 bekendstaan.”Die uittredende NTF-president, mnr. Pierre du Plooy, sê hy het vanweë omstandighede besluit om ná amper drie jaar terug te staan.“Ek konsentreer nou baie om vir Divan (du Plooy, sy jong seun wat 'n gereelde nasionale titelhouer in die sport is) te ondersteun in sy voornemens om triathlon op professionele vlak te beoefen.“Dit sou onregverdig gewees het om steeds op die komitee aan te bly terwyl my volle aandag nie daar is nie.“Ek spreek graag my waardering uit teenoor die borge wat ons sport die afgelope jare gedra het, asook vir die steun wat ons van die media gekry het en vir die werk van my medekomiteelede.“Dit is 'n besonder sterk groep wat nou onder Roual se leierskap verkies is om triathlon vorentoe te lei. Ons wens julle sterkte toe en weet dinge sal net van krag tot krag gaan.”– tielman@republikein.com.na

NTF kry nuwe leierskap

Kommentaar

Republikein 2026-07-01

Meld asseblief aan om kommentaar te lewer

NTF kry nuwe leierskap

Kommentaar

Republikein 2026-07-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.