NSFAF-beleid onder loep

Augetto Graig - Die Finansiële Hulpfonds vir Namibiese Studente (NSFAF) het gister ’n derde poging aangewend om die opstel van ‘n nuwe beleid oor finansiële hulp aan studente en skuldinvordering te voltooi.Die fonds wil die nuwe beleid reeds in die huidige boekjaar in werking stel. Tans is die fonds in ’n penarie nadat vroeër bevestig is geen nuwe studente sal vir die huidige akademiese jaar hulp van die NSFAF ontvang nie.Die ministerie van hoër onderwys, opleiding en vernuwing se permanente sekretaris, mnr. Alfred van Kent, het die verrigtinge tydens gisteroggend se slypskool gelei.Hy het benadruk die fonds sal voortaan binne die perke van sy begroting moet bly, maar die NSFAF sal terselfdertyd rekening met ’n verwagte toename in die hoeveelheid geldige aansoeke om finansiële hulp moet hou. Toelae kan afgeskaf en net lenings toegestaan word. Die fonds kan ook aan die nasionale belastingstelsel gekoppel word om rekordhouding en invordering te vergemaklik. Volgens die minister, dr. Itah Kandjii-Murangi, is hoër onderwys die afgelope 28 jaar deur middel van geïntegreerde en sinvolle inhoud en ontwikkeling drasties omskep. “Maar ná 28 jaar van onafhanklikheid en net 12 jaar voor 2030 is daar steeds ernstige leemtes in terme van vaardighede en kennis,” het sy gesê.Uitdagings sluit onder meer in ’n doeltreffende Namibiese hoër onderwysstelsel, die herhaling van kursusse, verhoogde pryse, programme wat wins beoog, en werklose gegradueerdes “wat nou ernstige kommer wek”, het Kandjii-Murangi gesê.In 1990 is die regering se eerste amptelike finansiële hulpskema vir Namibiese studente onder die ministerie van onderwys tot stand gebring. In 2000 is die NSFAF-wet aangeneem en in 2013 is die NSFAF as regsentiteit erken.Die regering het voortdurend die grootste deel van die nasionale begroting aan die onderwyssektor toegeken en miljarde dollar is al aan die NSFAF toegeken. Volgens die minister is dít wat aan onderwys bestee word, nie die enigste maatstaf vir sukses op die gebied van hoër onderwys nie. Boonop is daar nie genoeg hulpbronne beskikbaar om elke Namibiese student wat dit verdien, finansieel by te staan nie.“Die druk op die NSFAF se begroting is voortdurend, maar die begroting self bly beperk,” het sy gesê.Die hersiening van die fonds se beleid spruit uit die feit dat “die NSFAF nie elke Namibiese kind wat daarvoor kwalifiseer, kan ondersteun nie”, het die minister gesê.Die minister het verwys na die onlangse aanstelling van ’n nuwe NSFAF-raad en leiers, asook ander uitdagings, maar het bedadruk dat die toekenning van lenings “nie kan wag nie”. Sy het genoem die fonds het bestaande verpligtinge teenoor studente met wie reeds kontrakte aangegaan is. Die minister het die rolselers by die vergadering versoek om te verseker die nuwe beleid is inklusief en billik, en dat dit vinnig in werking gestel kan word.Finansiële regeringshulp moet toegeken word aan studente wat daarvoor kwalifiseer, die hulp verdien en dit werklik benodig, het sy gesê.Die nuwe raad het onlangs vir mnr. Kennedy Kandume as waarnemende uitvoerende hoof aangestel. Dít terwyl die dissiplinêre verhoor teen die vorige uitvoerende hoof, me. Hilya Nghiwete, voortduur. Die verhoor sou glo verlede week begin het, maar die NSFAF het sedertdien nog geen inligting hieroor bekend gemaak nie. Mnr. Jerome Mutumba, die NSFAF-raad se voorsitter, het gesê die teenwoordigheid van Kandume en ander NSFAF-beamptes is voldoende vir die doeleindes van die vergadering.Vrae oor Nghiwete se verhoor is nie by gister se geleentheid verwelkom nie. Mutumba het in reaksie hierop bloot na vorige nuusvrystellings verwys.Rolspelers van plaaslike hoër onderwysinstellings, opleidingsreguleerders soos die Namibiese Opleidingsowerheid (NTA) en die Namibiese Kwalifikasieowerheid (NQA), NSFAF-beamptes en bedryfsverteenwoordigers het die slypskool by die Namibië Instituut vir Openbare Administrasie en Bestuur (Nipam) in Windhoek bygewoon.

NSFAF-beleid onder loep

Kommentaar

Republikein 2026-06-16

Meld asseblief aan om kommentaar te lewer

NSFAF-beleid onder loep

Kommentaar

Republikein 2026-06-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.