NRU premierliga: Wanderers bly in tweede plek

Tielman van LillFNB Western Suburbs I het Saterdag in Khomasdal 'n spannende NRU premierligawedstryd teen FNB Wanderers I binne twee minute op sy kop gedraai om 'n gelykopuitslag af te dwing.Die besoekers het binne die eerste drie minute bloed geruik toe skrumskakel Enem Kritzinger onder die pale vir die eerste drie van die kragmeting oorval. Losskakel Mahco Prinsloo voeg twee punte by (7-0).Heelagter Ricardo Swartz open sy span se rekening en slaag met 'n strafdoel vanaf die middellyn om die telbord op 7-3 te laat staan. Maar dit is regtervleuel Shawn Thomas van die Wit Hingste wat sewe minute later teen die regterkantse kantlyn vir sy vyfpunter afstorm om die rustydtelling op 12-3 te plaas.Vroeg in die tweede helfte kry die Hingste 'n strafskop en wen die lynstaan naby die gasheerspan se doellyn waarna Kevin Thuynsma saam met 'n losgemaal oor die doellyn vir sy drie val. Dit het gelyk of dinge teen die begeesterde Suburbs begin draai toe die telling ná Prinsloo se suksesvolle doelskop tot 19-3 aangroei.Maar 'n kraglopie van Nikin Cloete, vurige linkervleuel van Suburbs, het die tuisspan se vuur weer aangesteek toe hy vier minute later onder die pale gaan druk. Losskakel Justin Nel slaag met sy poging (19-10).Prinsloo tref die kol om sy span se laaste drie punte by te voeg (22-10). Met net twee minute speeltyd oor is dit slot James Kisting wat ná goeie spel met brute krag oor die doellyn val. Nel maak geen fout nie en stoot die telling op na 22-17. Met Suburbs se laaste vyfpunter is dit weer Kisting wat met 'n horde verdedigers om sy lyf sy pad na die doellyn vind.Ongelukkig vir Suburbs is Swartz oënskynlik oorgerus met sy doelskop en skop dit vlak voor die pale mis om die eindtelling op 22-elk te laat staan.Walvisbaai klop UnitedTuis het Walvisbaai min moeite gehad om die Filistyne in sy premierligabotsing met 34-19 (rustyd 15-0 vir gasheer) te oorrompel.In sterk wind was dit 'n moeilike dag vir die skoppers. Walvisbaai het 'n tweede bonuspunt met sewe drieë ingepalm danksy die vyfpunters van slotte Cevin Harding (2) en Tertius Arangies, agtsteman Joe Hermann, vleuel Jeroen van Dam, senter Cedric Haraseb en heelagter Lloyd Jacobs. Jacobs en losskakel Charlton Brussel slaag elkeen met een doelskop.Vir United het senter en kaptein Mbimbo Mbai een drie gedruk en flank Dean Blom twee drieë. Ascher Coetzee slaag met twee doelskoppe.• Unam was weereens onkeerbaar suid van die hoofstad toe hy Rehoboth met 54-13 (rustyd 19-10) verslaan het. Vir die tuisspan, uitgedun deur beserings, het vleuel Julian Afrikaner gaan druk, terwyl Nazume Swartz met 'n doel- en twee strafskoppe slaag.Die wenspan se drieë is deur die slotte Kami Mieze en Rheinhardt Carelse (2), flank Freddy Puriza, senter Milaan van Wyk, vleuel Chess Lawrence en die plaasvervangers Jandre Cloete en Renaud van Neel ingeryg. Die skoppunte (14) het van heelagter Denver Murorua gekom.• Reho Falcon se besoek aan die kus het ewe rampspoedig geëindig toe Kudus hom met 22-0 gegaffel het.Die puntelys ná tien wedstryde elk: Unam 52, Wanderers 37, Suburbs 33, Kudus 28, Walvisbaai 27, United 22, Rehoboth 17, Falcon 4.• Reserweliga: Western Suburbs II klop vir Wanderers se tweedes met 13-10; United II verloor 27-19 teen Walvis II; Unam II klop Rehoboth II met 75-12; Kudus II is met 32-10 te sterk vir Falcon II.

NRU premierliga: Wanderers bly in tweede plek

Kommentaar

Republikein 2026-08-12

Meld asseblief aan om kommentaar te lewer

NRU premierliga: Wanderers bly in tweede plek

Kommentaar

Republikein 2026-08-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.