Notering wink in derde kwartaal

Nellie Brand-Jonker - Steinhoff verwag steeds om die aparte notering van sy Afrika-kleinhandelondernemings in die derde kwartaal af te handel, sê Markus Jooste, uitvoerende hoof van die internasionale Steinhoff-groep.Dié ondernemings verdien sowat 94% van hul inkomste uit Suid-Afrika.Jooste het met die bekendmaking van Steinhoff se resultate vir die ses maande tot einde Maart gesê “ 'n onafhanklike waardasie van die ondernemings in Afrika sal beleggers in staat stel om dié deel van die onderneming beter te waardeer en dit sal vir beleggers 'n aparte toegangspunt na opkomende markte gee”.Steinhoff het einde Mei sy planne vir dié notering aangekondig en toe ook gesê dit behoort teen die derde kwartaal afgehandel te wees. Dit is egter onderhewig aan talle faktore, waaronder marktoestande en toestemming van die owerhede.Steinhoff se inkomste het in die afgelope halfjaar met 48% tot €10,2 miljard gestyg danksy talle verkrygings die afgelope jaar.Jooste sê Steinhoff het die afgelope ses maande op sy onlangse strategiese verkrygings gefokus. Mattress Firm in Amerika is onder meer herposisioneer nadat sowat 1 400 van sy winkels se name verander is.Poundland in Brittanje en Fantastic Furniture in Australië het beter as verwag gevaar nadat hulle verkry is.Onder sy verkrygings tel ook Tekkie Town in Suid-Afrika.Ben la Grange, finansiële hoof, sê voor die beplande notering van die Afrika-kleinhandelondernemings gaan dié ondernemings herstruktureer word om onder 'n enkele nuwe beheermaatskappy te val. Dit sluit in Pepkor Suid-Afrika en die res van Afrika, JD Group, Unitrans Automotive, Steinbuild, Poco South Africa en Tekkie Town.Niks is oor Shoprite gesê nie.Ontleders het voorheen bespiegel 'n oorname van die Shoprite-groep kan weer 'n moontlikheid wees noudat Steinhoff besluit het om sy kleinhandelbedrywighede in Afrika afsonderlik te noteer.So 'n plan was vroeër op die tafel, maar is ná twee maande in Februarie laat vaar toe die maatskappye nie oor 'n aandeelruilverhouding kon ooreenkom nie. – Netwerk24

Notering wink in derde kwartaal

Kommentaar

Republikein 2025-06-19

Meld asseblief aan om kommentaar te lewer

Notering wink in derde kwartaal

Kommentaar

Republikein 2025-06-19

Meld asseblief aan om kommentaar te lewer

MELD AAN

Advertensie