Norah baklei vir pleegkind
Die hoërhof sê 'n jong meisie moet terug in die sorg van haar oorspronklike pleegouer geplaas word.
Henriette Lamprecht
'n Negejarige meisie wat in Junie vanjaar tydens 'n traumatiese voorval by haar skool in Windhoek deur maatskaplike werkers verwyder is, moet terug in die sorg van haar pleegouer geplaas word.
Irene* was die afgelope ses jaar in die pleegsorg van me. Norah Appolus wat tydens die voorval vir werk in Rundu was. Die hoërhof het nou in 'n aansoek van Appolus teen die ministerie van geslagsgelykheid en kinderwelsyn, asook me. Verivanga Wamona Kasume, die vrou in wie se sorg Irene toe uitgeplaas is, opdrag gegee dat Irene na haar pleegouer moet terugkeer totdat die saak afgehandel is.
Volgens Irene se onderwyser wat tydens die voorval teenwoordig was, het die meisie “gehuil en om hulp geskree” toe sy by die skool gehaal is.
Appolus is sedert 2012 Irene se primêre versorger. Sy is in Junie 2015 in terme van bepaling 31 van die kinderwet in Appolus se pleegsorg geplaas.
Die respondente in die saak is die minister van geslagsgelykheid en kinderwelsyn, me. Helena Andjamba (direkteur van kinderwelsyn), Kasume en mnr. Assad Kampanyu (maatskaplike werker).
In hofstukke sê Appolus haar pleegkind is sonder enige kennisgewing of die regte prosedure deur die respondente by die skool gaan optel en uit haar sorg verwyder terwyl sy nie in die hoofstad was nie.
Volgens Appolus het Kasume nooit in die tydperk wat Irene in haar sorg was, met haar kontak gemaak nie.
Appolus sê voorts in die hofstukke Kasume het Tanzaniese betrekkinge, reis dikwels en het ook kontakte in Angola waar sy vir jare sake gedoen het. Sy sê Irene is in die sorg van Kasume, 'n “wildvreemdeling en veroordeelde dwelmsmous” geplaas, met geen bewyse dat sy bloedfamilie van haar is nie.
Irene se biologiese ma is sedert 2012 in 'n Tanzaniese tronk vir dwelmhandel. Die biologiese pa bly in Dubai en het nog nooit enige rol in die kind se lewe gespeel nie.
Tydens 'n onverwante ondersoek is gevind die vrou in wie se sorg Irene aanvanklik vir twee en 'n half jaar was, word deur die FBI gesoek.
Sy het nog 'n kind gehad en het finansieel swaar getrek nadat sy haar werk verloor het.
'n Sakevriend het die vrou aan Appolus voorgestel waarna sy gevra het dat Appolus na albei kinders omsien totdat sy weer finansieel op die been is.
Dit was in Augustus 2012.
In Januarie 2013 het die vrou aan Appolus gesê sy beplan om na Kenia terug te keer.
Omdat sy nie reisdokumente vir Irene gehad het nie, het sy Appolus versoek om steeds na haar om te sien totdat sy na Namibië sou terugkeer om haar te kom haal.
Ná herhaalde e-posse aan die vrou en sowat 'n jaar later het Appolus by die ministerie van geslagsgelykheid en kinderwelsyn aangeklop omdat Irene moes begin skoolgaan en geen dokumente gehad het nie.
'n Maatskaplike werker het Irene se ma en haar grootouers in Tanzanië opgespoor.
Die oupa wat versoek is om vir DNS-toetse na Namibië te kom, het nooit opgedaag nie.
In 2015 het die maatskaplike werker aan Appolus gesê dit was duidelik Irene se familie stel nie in haar belang nie en 'n aansoek is gevolglik by die kinderhof ingedien dat sy in Appolus se pleegsorg geplaas word.
'n Wagtydperk van twee jaar sou ná die suksesvolle aansoek volg waarna Appolus kon aansoek doen om Irene wettig aan te neem.
In 2017 het Appolus die ministerie weer vir die aansoek van reisdokumente genader omdat sy en Irene na Kaapstad wou reis. Toe Appolus die dokumente wou optel, is sy in kennis gestel dat Irene uit haar sorg verwyder gaan word en in haar tannie aan haar ma se kant (Kasume) se sorg geplaas gaan word.
Sy is opdrag gegee om Irene aan die tannie te oorhandig.
Op 31 Augustus verlede jaar het twee immigrasiebeamptes by Appolus se huis opgedaag met die opdrag om Irene, wat volgens hulle 'n onwettige immigrant was, na hul kantore te bring. Tydens dié besoek het Kampanyu en immigrasiebeamptes 'n histeriese Irene by Appolus probeer wegneem.
Hulle het egter tou opgegooi en die voorval het Irene, wat nog altyd aan angs gely het, toe reeds met ernstige skeidingsangs gelaat.
(*Skuilnaam)
'n Negejarige meisie wat in Junie vanjaar tydens 'n traumatiese voorval by haar skool in Windhoek deur maatskaplike werkers verwyder is, moet terug in die sorg van haar pleegouer geplaas word.
Irene* was die afgelope ses jaar in die pleegsorg van me. Norah Appolus wat tydens die voorval vir werk in Rundu was. Die hoërhof het nou in 'n aansoek van Appolus teen die ministerie van geslagsgelykheid en kinderwelsyn, asook me. Verivanga Wamona Kasume, die vrou in wie se sorg Irene toe uitgeplaas is, opdrag gegee dat Irene na haar pleegouer moet terugkeer totdat die saak afgehandel is.
Volgens Irene se onderwyser wat tydens die voorval teenwoordig was, het die meisie “gehuil en om hulp geskree” toe sy by die skool gehaal is.
Appolus is sedert 2012 Irene se primêre versorger. Sy is in Junie 2015 in terme van bepaling 31 van die kinderwet in Appolus se pleegsorg geplaas.
Die respondente in die saak is die minister van geslagsgelykheid en kinderwelsyn, me. Helena Andjamba (direkteur van kinderwelsyn), Kasume en mnr. Assad Kampanyu (maatskaplike werker).
In hofstukke sê Appolus haar pleegkind is sonder enige kennisgewing of die regte prosedure deur die respondente by die skool gaan optel en uit haar sorg verwyder terwyl sy nie in die hoofstad was nie.
Volgens Appolus het Kasume nooit in die tydperk wat Irene in haar sorg was, met haar kontak gemaak nie.
Appolus sê voorts in die hofstukke Kasume het Tanzaniese betrekkinge, reis dikwels en het ook kontakte in Angola waar sy vir jare sake gedoen het. Sy sê Irene is in die sorg van Kasume, 'n “wildvreemdeling en veroordeelde dwelmsmous” geplaas, met geen bewyse dat sy bloedfamilie van haar is nie.
Irene se biologiese ma is sedert 2012 in 'n Tanzaniese tronk vir dwelmhandel. Die biologiese pa bly in Dubai en het nog nooit enige rol in die kind se lewe gespeel nie.
Tydens 'n onverwante ondersoek is gevind die vrou in wie se sorg Irene aanvanklik vir twee en 'n half jaar was, word deur die FBI gesoek.
Sy het nog 'n kind gehad en het finansieel swaar getrek nadat sy haar werk verloor het.
'n Sakevriend het die vrou aan Appolus voorgestel waarna sy gevra het dat Appolus na albei kinders omsien totdat sy weer finansieel op die been is.
Dit was in Augustus 2012.
In Januarie 2013 het die vrou aan Appolus gesê sy beplan om na Kenia terug te keer.
Omdat sy nie reisdokumente vir Irene gehad het nie, het sy Appolus versoek om steeds na haar om te sien totdat sy na Namibië sou terugkeer om haar te kom haal.
Ná herhaalde e-posse aan die vrou en sowat 'n jaar later het Appolus by die ministerie van geslagsgelykheid en kinderwelsyn aangeklop omdat Irene moes begin skoolgaan en geen dokumente gehad het nie.
'n Maatskaplike werker het Irene se ma en haar grootouers in Tanzanië opgespoor.
Die oupa wat versoek is om vir DNS-toetse na Namibië te kom, het nooit opgedaag nie.
In 2015 het die maatskaplike werker aan Appolus gesê dit was duidelik Irene se familie stel nie in haar belang nie en 'n aansoek is gevolglik by die kinderhof ingedien dat sy in Appolus se pleegsorg geplaas word.
'n Wagtydperk van twee jaar sou ná die suksesvolle aansoek volg waarna Appolus kon aansoek doen om Irene wettig aan te neem.
In 2017 het Appolus die ministerie weer vir die aansoek van reisdokumente genader omdat sy en Irene na Kaapstad wou reis. Toe Appolus die dokumente wou optel, is sy in kennis gestel dat Irene uit haar sorg verwyder gaan word en in haar tannie aan haar ma se kant (Kasume) se sorg geplaas gaan word.
Sy is opdrag gegee om Irene aan die tannie te oorhandig.
Op 31 Augustus verlede jaar het twee immigrasiebeamptes by Appolus se huis opgedaag met die opdrag om Irene, wat volgens hulle 'n onwettige immigrant was, na hul kantore te bring. Tydens dié besoek het Kampanyu en immigrasiebeamptes 'n histeriese Irene by Appolus probeer wegneem.
Hulle het egter tou opgegooi en die voorval het Irene, wat nog altyd aan angs gely het, toe reeds met ernstige skeidingsangs gelaat.
(*Skuilnaam)
Kommentaar
Republikein
Geen kommentaar is op hierdie artikel gelaat nie