Noord-Namibië se erfenis ontdek

Namibië sal binnekort twee nuwe museums ryker wees.Die tweejaarprojek getiteld “Museumontwikkeling as 'n instrument om kultuurregte in Namibië te versterk”, wat deur die Europese Unie (EU) met N$3,5 miljoen ondersteun word, sal twee nuwe museums in die land tot gevolg hê. Die projek, wat deur die Museumvereniging van Namibië (MAN) in samewerking met die ministerie van onderwys, kuns en kultuur geïmplementeer sal word, behels die vestiging van die permanente Museum van Namibiese Musiek en die Zambezi-museum. Volgens ’n verklaring wat deur MAN uitgereik is, sal ’n mobiele uitstalling en katalogus oor die geskiedenis en kultuur van die San en Ndonga deel van die projek wees.MAN het onlangs ’n werkwinkel op Ondangwa aangebied wat daarop gemik was om deelnemers bloot te stel aan maniere om kulturele kennis te bewaar en te laat herleef. Mnr. Martti Rautanen, wat plaaslik as “Nakambale” bekend gestaan het, was die leier van die Finse sendelinge wat in die laat 19de eeu hulself in die Noorde van die land gevestig het. Hy het in Olukonda gewoon en sy huis is vandag die Nakambale Museum. Hy het in sy leeftyd 127 artefakte versamel wat die plaaslike gemeenskap se leefstyl verteenwoordig. Die versameling is tans in die Nasionale Museum van Finland. Die museum het foto’s van al die voorwerpe aan MAN verskaf. Deelnemers aan die werkwinkel het die foto’s bekyk en ontleed. MAN sal ook ’n katalogus met inligting oor elke voorwerp, soos volgens Rautanen se notas, ontvang. Dit sal ook insig bied oor die geskiedenis van elke voorwerp. MAN beoog om ’n nuwe katalogus saam te stel met inligting oor die foto’s.Die oorspronklike inligting sal met die plaaslike gemeenskap se insigte aangevul word. Die katalogus sal ook nuwe foto’s van belangrike erfenisterreine bevat. Omdat die museum by Olukonda geleë is, sal die uitstalling op die koninkryk van die Ondonga fokus. MAN beoog ook om ’n klein mobiele uitstalling saam te stel wat dwarsoor die land vertoon kan word. Volgens dr. Martha Akawa, MAN se visevoorsitter, is dit belangrik dat jongmense bewus is van hul kulturele erfenis. “Ons glo hoewel die uitstalling op die Ondonga fokus, dit as ’n model gesien kan word. Ons glo die projek kan help om die sielkundige skade te herstel wat jongmense aangedoen is wat hul kultuur verloor het. MAN wil graag die repatriasie van sommige voorwerpe sien wat die vestiging van nuwe gemeenskapsgebaseerde museums in die streke as bronne van inspirasie sal ondersteun," het sy gesê. “Ons hoop die projek sal die gemeenskap bewus maak van die belangrikheid van sommige van die historiese artefakte wat in van die huise voorkom en dat dit families sal aanmoedig om sodanige voorwerpe aan hul plaaslike museum vir bewaring te skenk.”Vir meer inligting, kontak me. Nehoa Kautondokwa, ontwikkelingsbestuurder by MAN, by (061) 302-230 of museums@iway.na. Me. Susan Marie Lewis, media- en inligtingsbeampte by die EU, kan ook by (061) 202-6247 of SusanMarie.LEWIS@eeas.europa.eu gekontak word.

Noord-Namibië se erfenis ontdek

Kommentaar

Republikein 2025-12-23

Meld asseblief aan om kommentaar te lewer

Noord-Namibië se erfenis ontdek

Kommentaar

Republikein 2025-12-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.