Noord-Koreane moet land uit weens sanksies

Estelle de Bruyn - Twee Noord-Koreane wat in Namibië woon en verbonde is aan die maatskappy Korea Mynbou-ontwikkeling Handelskorporasie (Komid), is onder die tien individue wat deur die Amerikaanse regering geteiken is in die jongste rondte sanksies wat teen Noord-Korea ingestel is.
Volgens ’n betroubare bron sal die twee, mnre. Kil Jong Hun en Kim Kwang Yon, Namibië eersdaags verlaat.
Volgens diplomatieke kenners raak die sanksies wat Amerika teen Noord-Koreaanse ondernemings en individue ingestel het, Namibië indirek.
“Amerikaanse besluite het nie ’n regstreekse bindende invloed op Namibië soos wat ’n resolusie van die Verenigde Nasies se Veiligheidsraad het nie. Dit het egter ernstige implikasies en kan kollaterale skade aan die land berokken. Amerika kan sanksies instel teen lande wat sake doen met lande teen wie VSA sanksies ingestel het.
“Onder internasionale reg is Namibië onder geen verpligting om enige stappe te doen nie, maar vir alle praktiese doeleindes kan ons ekonomiese en politieke betrekkinge met die VSA en sekere EU-lande daaronder ly indien ons niks doen nie.
“Vanweë ’n vroeëre resolusie van die VN se Veiligheidsraad het Namibië besprekings met Noord-Korea gehad oor die maatskappye vir wie die betrokke persone werk. Daardie twee individue is steeds in Windhoek, maar is besig om gereed te maak om die land te verlaat. Noord-Korea het diplomatieke bande met Namibië, maar is een van die lande wat nie-inwonend is nie en waarvan die betrekkinge uit Pretoria behartig word.
“Die twee individue het eiendom en voertuie wat hulle nou probeer verkoop, voor hulle die land verlaat,” het ’n diplomatieke bron gesê.
Volgens die verklaring van die Amerikaanse tesourie, is twee van die individue teen wie sankies ingestel is, Kil Jong Hun en Kim Kwang Yon, amptenare van die Noord-Koreaanse regering wat die Suider-Afrikaanse belange van Komid verteenwoordig.
Volgens die Amerikaanse tesourie is die sanksies ingestel in reaksie op die regering van Noord-Korea se “talle uitlokkings, veral die onlangse kuberkraak-aanval wat Sony Pictures Entertainment geteiken het en dreigemente teen rolprentteaters en besoekers aan hierdie teaters gemaak het. Pres. Barack Obama het Vrydag die uitvoerende bevel uitgereik wat die instelling van die sanksies teen die regering van Noord-Korea en die Werkersparty van Korea gemagtig het.
“Hierdie stap reflekteer Amerika se voortgesette verbintenis om Noord-Korea aanspreeklik te hou vir sy destabiliserende, destruktiewe en onderdrukkende aksies, veral sy pogings om Amerika se kubersekuriteit te ondermyn en Amerikaanse sakeondernemings en kunstenaars sodanig te intimideer dat hul uitoefening van hul reg tot vryheid van uiting in die wiele gery word,” lui die verklaring deur die tesourie.
Komid is Noord-Korea se primêre wapenhandelaar en hoofuitvoerder van goedere en toerusting wat betrekking het op ballistiese missiele en konvensionele wapentuig. Dit is ’n onderneming in staatsbesit en is reeds in 2005 op die sanksielys geplaas vir die instansie se rol in die uitbreiding van wapens van massavernietiging.
Die Verenigde Nasies het ook in April 2009 sankies teen Komid ingestel. Komid het kantore in verskeie lande wêreldwyd en fasiliteer wapenverkope vir die Noord-Koreaanse regering.
Drie Noord-Koreaanse maatskappy en tien individue, onder wie Kil Jong Hun en Kim Kwang Yon, is op die jongste Amerikaanse sanksielys.