Noodtoestand weens droogte afgekondig

Estelle de Bruyn en Elvira Hattingh – President Hage Geingob het gister ‘n noodtoestand in die land afgekondig. Die langdurige droogte en die nypende tekort aan water het die stap genoodsaak.Die speaker, prof. Peter Katjavivi, het gister met die aanvang van die sitting van die Nasionale Vergadering lede van die Huis oor die stap ingelig en gevra dat ‘n ieder en ’n elk sy of haar deel moet doen om water te bespaar.Terselfdertyd dui die jongste damverslag aan dat die drie damme wat Windhoek van water voorsien, gesamentlik slegs 10,7% water (16,571Mm³) oor het, terwyl Windhoek maandeliks sowat 2,4Mm³ water gebruik. Okahandja asook die groter Sentraal-Namibië is egter ook van dié damstelsel se water afhanklik en kenners is van mening dat die damme enige tyd tussen September en November gaan opdroog, afhangende van hoeveel water bespaar kan word.Die besluit kom ook kort nadat die president op Dinsdag 7 Junie met belanghebbendes in die waterbedryf en sy kabinet vergader het met die oog daarop om moontlik ‘n droogtenoodtoestand in Namibië te verklaar.Lede van die Windhoekse munisipaliteit, NamWater asook die ministerie van landbou, water en bosbou was by die vergadering teenwoordig. Tydens die vergadering is ‘n meesterplan vir waterverskaffing in Namibië ter tafel gelê, wat na raming N$24,185 miljard sal kos. Dit behels die dringende ontwikkeling van die Karst-akwifer in die Grootfontein- en Tsumeb-omgewing vir Sentraal-Namibië en ook dat meer water vanaf die Berg Aukas- en Kombatmyn gepomp moet word. Dié planne moet Windhoek help om die volgende reënseisoen te haal en sal na verwagting sowat N$44 miljoen kos. Intussen word ‘n haalbaarheidstudie gedoen om water uit die Kavangorivier vir Sentraal-Namibië te gebruik. Die Windhoekse munisipaliteit se strategiese uitvoerende hoof van infrastruktuur, water en tegniese dienste, mnr. Pierre van Rensburg, het ook tydens die vergadering gesê Windhoek kan gereelde watertekorte verwag tot tyd en wyl dit ‘n alternatiewe bron van water het. “Volgens ‘n studie kan ‘n enorme ekonomiese impak verwag word elke keer wanneer Windhoek ‘n waterkrisis ervaar. Die studie het bewys met gereelde watertekorte kan Namibië vergeet om Visie 2030 te haal, want dit kan armoedeverligting teenwerk en die diens van grond en die gepaardgaande behuisingskrisis slegs vererger. Nasionaal sal dit veroorsaak dat GDP-teikens gemis word en volhoubare ekonomiese groei negatief geraak word.“Verder mag gereelde watertekorte tot ingeperkte ontwikkeling lei, veral as die konstruksiebedryf gekniehalter word. Dit sal dit ook ‘n groot sosiale impak hê as mense hul werk begin verloor. Boonop kan die toerismesektor krimp,” het Van Rensburg gesê.

Noodtoestand weens droogte afgekondig

Kommentaar

Republikein 2025-07-17

Meld asseblief aan om kommentaar te lewer

Noodtoestand weens droogte afgekondig

Kommentaar

Republikein 2025-07-17

Meld asseblief aan om kommentaar te lewer

MELD AAN

Advertensie