Noodtoestand vir droogte afgelas

Elvira Hattingh - Die regering sal voortgaan met droogtehulpbystand aan Namibiërs, alhoewel die noodtoestand vir droogte, wat in Mei verlede jaar deur pres. Hage Geingob aangekondig is, gister amptelik verstryk het. Die eerste minister, dr. Saara Kuugongelwa-Amadhila, het aan Republikein gesê ’n opname wat onlangs gedoen is, toon die droogte het sy greep op die land verslap ná goeie reën in die meeste dele van die land voorgekom het. “Daar is dus geen versoeke ontvang dat die noodtoestand verleng moet word nie.“Die uitbreek van peste en vloede in sommige streke bring nuwe uitdagings, wat aandag en hulpbronne gaan verg,” het Kuugongelwa-Amadhila gesê.Dit volg ná die ministerie van landbou, water en bosbou vandeesweek gesê het eise wat voor die sperdatum van 6 Maart ontvang is, sal steeds uitbetaal word.Dit is nou eise wat gemaak is in terme van die aansporingskema vir die bemarking van vee, subsidies vir veevoer en lek, asook vir die huur van weiveld en die koste om vee daarheen en terug te vervoer - waarvoor reeds byna N$21 miljoen uitbetaal is.Intussen gaan die verspreiding van voedselhulp steeds in die Kavango-Oos-, Kavango-Wes-, Kunene-, Omusati-, Oshana-, Oshikoto-, Zambezi- en Omahekestreek voort.Amerika het onderneem om voedselhulp ter waarde van N$127 miljoen, oftewel 10 000 ton kos, aan meer as 350 000 Namibiërs te verleen. Die Amerikaanse ambassadeur in Namibië, me. Lisa Johnson, het gesê die voedselhulp is nodig totdat mense hul eerste gewasse kan oes, al het dit onlangs in die gebiede gereën. Die foto wys sakke rys wat deur die Indiese regering vir droogtehulp aan Namibië geskenk is. FOTO NAMPA

Noodtoestand vir droogte afgelas

Kommentaar

Republikein 2025-05-14

Meld asseblief aan om kommentaar te lewer

Noodtoestand vir droogte afgelas

Kommentaar

Republikein 2025-05-14

Meld asseblief aan om kommentaar te lewer

MELD AAN

Advertensie