Noodtoestand geen verskoning
Twee joernaliste het klagtes van aanranding en teistering teen veiligheidspersoneel aanhangig gemaak.
Henriette Lamprecht – Geen noodtoestand is ’n verskoning om private media van enige mediakonferensie of enige openbare geleentheid uit te sluit nie.
Die Redakteursforum van Namibië (EFN) het hom sterk uitgespreek teen die toenemende praktyk van die regering om net staatsbeheerde media-instellings veral sedert die verklaring van die noodtoestand by sekere mediakonferensies toe te laat.
Ook was dit te veel keer tydens die Covid-19-verwante grendeltydperk die getuie van ’n misbruik van mag.
Die verklaring volg nadat twee joernaliste Jemima Beukes (Namibian Sun) en Charmaine Ngatjiheue (The Namibian) Woensdag deur pres. Hage Geingob se veiligheidspersoneel hardhandig verwyder is toe hulle die terrein van die isolasiegeriewe by die Windhoek Sentrale Hospitaal betree het, wat deur Geingob geopen is. Net die openbare uitsaaier (NBC) is toegelaat om die verrigtinge by te woon.
Beukes en Ngatjiheue het intussen klagtes van aanranding en teistering teen lede van pres. Hage Geingob se veiligheidspersoneel aanhangig gemaak. Hulle het ook ’n klag by die kantoor van die ombudsman ingedien en gevra vir ’n ondersoek na die skending van hul menseregte.
Die EFN sê in sy verklaring die regering het ’n verpligting om toegang tot inligting aan alle Namibiërs te verseker. Dit sluit die meerderheid in wat nie toegang tot staatsbeheerde televisie het nie. Die forum maan die publiek moet altyd deur die medium van hul keuse ingelig word en nie deur een wat deur die regering aan hul opgedwing word nie.
Beukes en Ngatjiheue se hardhandige behandeling deur veiligheidspersoneel is volgens die EFN ook die tipe optrede wat van veiligheidspersoneel in ’n “outoritêre staat” verwag word.
Die forum maan terselfdertyd sy lede om seker te maak hul gedrag gee nie skietgoed aan veiligheidspersoneel nie.
“Dit sal inderdaad ’n hartseer dag wees as ’n ernstige en skadelike voorval uit die moedswillige optrede van joernaliste voortspruit.”
Die EFN sê joernaliste moet redelik bly en nie aan ongedissiplineerde veiligheidspersoneel ’n verskoning gee om hul skade aan te doen nie. Met betrekking tot Baie Belangrike Persone (BBP) moet protokol soos verwag sou word van enige ander wetsgehoorsame burger, ook gevolg word.
Die president se mediaspan het in ’n verklaring sy “innige verskoning” aangeteken vir die ongerief wat deur die voorval veroorsaak is.
’n Bywoningsregister was ’n voorkomende maatreël in die lig van die gesondheidsregulasies onder die noodtoestand. Gevolglike optrede deur veiligheidsbeamptes was dus nie “opsetlik en sleg bedoel nie”, maar bloot die afdwing van regulasies.
Die verskoning is deur Namibia Media Trust (NMT) aanvaar, wat ook hul misnoeë uitgespreek het oor herhaalde voorvalle waarin staatsamptenare mediahuise verhoed om belangrike geleenthede en kwessies van nasionale belang te dek.
Die trust is ook teen die gebruik van Covid-19-regulasies om joernaliste se reg tot toegang tot inligting te skend en in die besonder enige poging om joernaliste in die uitvoer van hul pligte liggaamlike leed aan te doen.
Volgens NMT het ’n polisiebeampte glo ná die konfrontasie en terwyl Ngatjiheue en Beukes besig was om die terrein te verlaat, geskree “wat as julle geskiet is?”.
Volgens NMT bied dit insig in die ingesteldheid van openbare veiligheidspersoneel en die gemak waarmee hulle sal oorgaan om op burgerlikes te skiet.
Die ministerie van gesondheid en maatskaplike dienste (MoHSS) het by monde van sy uitvoerende direkteur, mnr. Ben Nangombe, hul spyt oor die voorval uitgespreek en vir “vergifnis” gepleit.
- [email protected]
Die Redakteursforum van Namibië (EFN) het hom sterk uitgespreek teen die toenemende praktyk van die regering om net staatsbeheerde media-instellings veral sedert die verklaring van die noodtoestand by sekere mediakonferensies toe te laat.
Ook was dit te veel keer tydens die Covid-19-verwante grendeltydperk die getuie van ’n misbruik van mag.
Die verklaring volg nadat twee joernaliste Jemima Beukes (Namibian Sun) en Charmaine Ngatjiheue (The Namibian) Woensdag deur pres. Hage Geingob se veiligheidspersoneel hardhandig verwyder is toe hulle die terrein van die isolasiegeriewe by die Windhoek Sentrale Hospitaal betree het, wat deur Geingob geopen is. Net die openbare uitsaaier (NBC) is toegelaat om die verrigtinge by te woon.
Beukes en Ngatjiheue het intussen klagtes van aanranding en teistering teen lede van pres. Hage Geingob se veiligheidspersoneel aanhangig gemaak. Hulle het ook ’n klag by die kantoor van die ombudsman ingedien en gevra vir ’n ondersoek na die skending van hul menseregte.
Die EFN sê in sy verklaring die regering het ’n verpligting om toegang tot inligting aan alle Namibiërs te verseker. Dit sluit die meerderheid in wat nie toegang tot staatsbeheerde televisie het nie. Die forum maan die publiek moet altyd deur die medium van hul keuse ingelig word en nie deur een wat deur die regering aan hul opgedwing word nie.
Beukes en Ngatjiheue se hardhandige behandeling deur veiligheidspersoneel is volgens die EFN ook die tipe optrede wat van veiligheidspersoneel in ’n “outoritêre staat” verwag word.
Die forum maan terselfdertyd sy lede om seker te maak hul gedrag gee nie skietgoed aan veiligheidspersoneel nie.
“Dit sal inderdaad ’n hartseer dag wees as ’n ernstige en skadelike voorval uit die moedswillige optrede van joernaliste voortspruit.”
Die EFN sê joernaliste moet redelik bly en nie aan ongedissiplineerde veiligheidspersoneel ’n verskoning gee om hul skade aan te doen nie. Met betrekking tot Baie Belangrike Persone (BBP) moet protokol soos verwag sou word van enige ander wetsgehoorsame burger, ook gevolg word.
Die president se mediaspan het in ’n verklaring sy “innige verskoning” aangeteken vir die ongerief wat deur die voorval veroorsaak is.
’n Bywoningsregister was ’n voorkomende maatreël in die lig van die gesondheidsregulasies onder die noodtoestand. Gevolglike optrede deur veiligheidsbeamptes was dus nie “opsetlik en sleg bedoel nie”, maar bloot die afdwing van regulasies.
Die verskoning is deur Namibia Media Trust (NMT) aanvaar, wat ook hul misnoeë uitgespreek het oor herhaalde voorvalle waarin staatsamptenare mediahuise verhoed om belangrike geleenthede en kwessies van nasionale belang te dek.
Die trust is ook teen die gebruik van Covid-19-regulasies om joernaliste se reg tot toegang tot inligting te skend en in die besonder enige poging om joernaliste in die uitvoer van hul pligte liggaamlike leed aan te doen.
Volgens NMT het ’n polisiebeampte glo ná die konfrontasie en terwyl Ngatjiheue en Beukes besig was om die terrein te verlaat, geskree “wat as julle geskiet is?”.
Volgens NMT bied dit insig in die ingesteldheid van openbare veiligheidspersoneel en die gemak waarmee hulle sal oorgaan om op burgerlikes te skiet.
Die ministerie van gesondheid en maatskaplike dienste (MoHSS) het by monde van sy uitvoerende direkteur, mnr. Ben Nangombe, hul spyt oor die voorval uitgespreek en vir “vergifnis” gepleit.
- [email protected]
Kommentaar
Republikein
Geen kommentaar is op hierdie artikel gelaat nie