Nog hulde aan Kerina

Augetto Graig – Huldeblyke aan prof. Mburumba Kerina stroom nog in met president Hage Geingob en vele ander wat die verlies van ’n lewe wat so ’n ingrypende impak op Namibië gemaak het, probeer verwoord. Geingob sê Kerina was ’n sentrale figuur in die vestiging van ’n onafhanklike Namibië.“Die heengaan van Mburumba Kerina is vir baie mense hartseer. “Sy dade om die saak vir onafhanklikheid te bevorder, moet ons vertroos. As een van die vroeë kampvegters by die VN (Verenigde Nasies) het Kerina die saak vir onafhanklikheid bevorder, wat hy in sy leeftyd kon sien bewaarheid word. Namens die mense en die regering van die Republiek van Namibië, en inderdaad myself en my familie, betuig ek my meegevoel met die kinders en die hele familie,” sê die president.Van die leier van die amptelike opposisie, mnr. McHenry Venaani, het ook gevleuelde woorde gekom. “Ek salueer jou, burger wat soveel vir jou mense en jou land gedoen het.” Hy beskryf Kerina as “’n onvermoeide leier in die politieke landskap en ’n afgevaardigde van opperhoof Hosea Kutako by die VN wat baanbrekerswerk gedoen het; gelyktydig ’n politieke strateeg en ’n verkleurmannetjie, sonder wie se insette geen Namibiese geskiedenis oorvertel sou kon word nie.”Nog ’n bekende Namibiese politikus, me. Michaela Hübschle, sê Namibië verloor met Kerina se heengaan ’n ware ikoon van die bevrydingstryd en ’n stigtersvader van die nasie. “Sy denkrigting, wat soveel mense beïnvloed het, sal vir ewig voortleef.”Kerina se dogter, me. Kakuna Kerina, sê op haar sosiale media: “Ons vader was ’n man van die volk, en hy is dood omring deur mense. Twee weke gelede het hy ’n stigting van stapel gestuur om studiebeurse te gee vir studente wat, soos hy, andersins nie toegang tot hoër onderwys kon kry nie. “Hy het altyd diegene wat die ergste in nood verkeer, naby aan sy hart gedra en daardie briljante verstand ingespan om sy uiterste te doen om hul krisisse op te los.“My pa was gou om te glimlag en wou ewe graag stories vertel of hoor, verkieslik een wat hom laat uitbars van die lag. Dit was nog lekkerder om te sien hoe hy sy lag tot die einde probeer onderdruk. Hy en my ma, Jane Miller Kerina, het elke Namibiër wat in ballingskap na die VSA gevlug het, verwelkom met ‘135 Eastern Parkway, Brooklyn’ op ’n stuk papier geskryf, en die raad: ‘Gaan net reguit van die lughawe af; jy sal familie daar vind’.”Onderweg vanaf Frankfurt het sy telefonies aan Republikein gesê die hoeveelheid boodskappe wat die familie vanoor die wêreld ontvang, is oorweldigend. Vanuit Senegal, Liberië, Ghana en Ethiopië; van voormalige studente in Amerika; vriendskappe wat vroeg in die stryd tot Namibiese onafhanklikheid gevorm is, bring hulde, het sy gesê.Kakuna het bevestig haar pa is aan Covid-19 oorlede en sê hy sou dié feit nie wou stil hou nie, maar sou eerder Namibiërs aanmoedig om die pandemie ernstig op te neem. “Hy het nog so veel gehad om voor te lewe en sou my elke dag opdrag gee om dié persoon te besoek, of vir daai een te skryf. Op 89 was hy steeds laserskerp gefokus, en ’n patriot tot die einde.”Die familie se delegasie is gister na Staatshuis genooi. Besonderhede oor ’n begrafnis sal amptelik aangekondig word.Kerina laat vyf kinders, ses kleinkinders en vyf agterkleinkinders agter.– augetto@republikein.com.na

Nog hulde aan Kerina

Kommentaar

Republikein 2025-04-30

Meld asseblief aan om kommentaar te lewer

Nog hulde aan Kerina

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie