Nog gevangenes, skoliere toets positief vir Covid-19

Skoliere en gevangenes is onder die 77 nuwe gevalle van Covid-19 wat in die land aangemeld is. Die gevangenes is in die aanhoudingselle op Omuthiya, terwyl die leerlinge in skole op Gobabis en Oshakati is. Volgens die adjunkminister van gesondheid en maatskaplike dienste, dr. Esther Muinjangue, is 49 uit die nuwe gevalle mans en 28 vroue. Die ouderdomme wissel van een jaar oud tot 83 jaar.

Uit die 77 gevalle is 21 in Oshakati, 18 in Omuthiya, 15 in Windhoek, 14 in Gobabis, drie in Karasburg, twee in onderskeidelik Lüderitz en Swakopmund en een elk in onderskeidelik Walvisbaai en Okahandja aangeteken.

Volgens Muinjangue het nog 53 mense herstel wat die totaal vir die land op 10 929 te staan bring. Dit sluit 34 in Khomas, ses in Omaheke, vyf in Hardap en Erongo onderskeidelik en een in Zambezi in.

Uit die 1 744 aktiewe gevalle is drie in 'n baie ernstige of kritieke toestand. Dit sluit twee kritieke gevalle in Khomas en een baie ernstige geval in Oshakati in. Die Covid-19-verwante sterftes bly op 133, tot op hede is 124 570 weefselmonsters getoets, 7 075 kontakte word gemonitor en 658 mense is in kwarantyngeriewe oraloor in die land.