Nimt-moordverdagte eindelik aangekla

Leandrea Louw op Swakopmund - Die 57-jarige dosent van die Instituut vir Mynbou en Tegnologie (Nimt), mnr. Ernst Lichtenstrasser, wat gister vir die moorde op dié instelling se hoof en adjunkhoof, mnre. Eckhart Mueller en Heimo Hellwig, in die landdroshof op Swakopmund verskyn het, ontken hy het dit gedoen.“Ek het dit nie gedoen nie. Hulle het die verkeede ou. Volg die afgtergrond van die saak op,” het hy gesê toe hy onder polisiebewaking by die hof aangekom het.Lichtenstrasser is nie gevra om te pleit nie.Hy was die afgelope drie weke in aanhouding op ’n klag wat met die besit van ’n vuurwapen verband hou. Hy is eers vandeesweek met die moorde verbind. Mueller en Hellwig is vroeg die oggend van 15 April op Nimt se Arandis-kampus doodgeskiet.Die staatsaanklaer, me. Maria Shilongo, het borgtog teengestaan weens die erns van die misdaad en die polisieondersoek wat nog aan die gang is. Sy het ook gesê borgtog is nie in die openbare belang nie.Landdros Nelao Brown het die saak tot 24 Julie vir verdere ondersoek uitgestel en beveel die beskuldigde moet in aanhouding in die Walvisbaaise polisie-aanhoudingselle bly. Lichtenstrasser het aangedui hy is siek en moet gereeld medies ondersoek word. “Toestande in die Walvisbaaise polisie-aanhoudingselle is baie onhigiënies en met aangehoudenes oorlaai. Die polisie is nie te blameer vir die siekte waaraan ek ly nie.” Brown het toe beveel hy moet in die Walvisbaaise korrektiewe fasiliteit aangehou word, wat die beskuldigde ook teengestaan het. “Die Arandis-aanhoudingselle is baie skoner en daar is net ’n paar mense in aanhouding. Ek sal ook nader aan my vrou en prokureur wees, wat in Windhoek is.”Shilongo het kapsie hierteen gemaak en gesê die moorde waarvan hy aangekla is, het op Arandis plaasgevind, waar sy kollegas ook bly. “Dit sal nie in die belang van geregtigheid wees of vir hom veilig wees om op Arandis aangehou te word nie. Die Walvisbaaise korrektiewe fasiliteit is meer as geskik vir die beskuldigde se behoeftes en siektes.” Brown gesê as Lichtenstrasser nie gelukkig met die toestande by die fasiliteit is nie, kan sy regsverteenwoordiger die staat nader om ander reëlings te tref.

Nimt-moordverdagte eindelik aangekla

Kommentaar

Republikein 2026-03-26

Meld asseblief aan om kommentaar te lewer

Nimt-moordverdagte eindelik aangekla

Kommentaar

Republikein 2026-03-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.