Nieu-Seelanders rol die wêreld dronk

Tielman van Lill - Namibië kan met reg trots wees op Marietjie van den Bergh van Tsumeb en Will Esterhuizen van Windhoek wat uitstekend in Sydney, Australië, tydens die enkelspel rolbalwêreldkampioenskap gevaar het.Altesaam 26 lande se vrouekampioene het in twee groepe by die St. Johns Park Rolbalklub deelgeneem, terwyl 27 lande se mans by die 2018 Kampioen van Kampioene-wêreldbyeenkoms verteenwoordig was.Van den Bergh het Vrydag haar laaste twee kwalifiserende rondes gewen om tweede in groep 2 te eindig, met tien oorwinnings uit twaalf wedstryde.Esterhuizen moes ongelukkig sy derde posisie in sy groep prysgee toe hy Vrydag sy laaste twee rondes nie kon wen nie. Hy het egter steeds vierde geëindig, met sewe gewen en vyf verloor. Van den Bergh het Vrydag eers vir Caroline Ehman (Switserland) met 18-1 en 11-2 oordonder, voor sy vir Hazel Bagshaw (Ciprus) met 16-0 en 8-7 geklop het. Esterhuizen het sy beste voet voor gesit, maar verloor beide rondes naelskraap in die valbyl. Noam Yehudai (Israel) klop hom nadat die Namibiër die eerste stel met 14-5 inpalm. Daarna veg Yehudai terug en wen 5-6 en maak die valbylpot met 2-1 syne. Wattana Kadkhunthad (Thailand) wen die eerste stel met 8-9, waarna Esterhuizen met 11-8 terugveg, maar verloor weereens met 'n enkele punt in die valbyl (2-1).UITKLOPRONDESNet die twee groepwenners in elke kompetisie (mans en vroue) het 'n vrypas na die semifinaal gehad, terwyl nommers 2 en 3 in elke groep oorkruis moes uitspeel. By die mans het Shannon McIlroy (Nieu-Seeland, groep 1) en Lee Schraner (Australië, groep 2) hul plekke in die semifinaal bespreek, terwyl Jo Edwards (Nieu-Seeland, groep 1) en Alyani Jamil (Maleisië, groep 2) die vroueplekke opgeëis het.Van den Bergh moes eers teen Dee Hoggan van Skotland (derde in groep 1) in die uitklopronde kragte meet. Ongelukkig verloor sy teen die Skot (6-8, 5-11), wat op haar beurt in die halfeindstryd teen Jamil die knie moet buig.In die ander uitklopwedstryd wen Tammy Tham (tweede in groep 1, Singapoer) gemaklik teen Anne Nunes (derde in groep 2, VSA), maar verloor teen Edwards (NS) in die semifinaal.In die eindstryd is Edwards op haar beste en wen die Wêreld-enkelspeltitel teen Jamil wat die silwermedalje verdien met Tham en Hoggan derde. By die mans stap Clive McGreal (eiland Man, derde groep 1) teen Maleisië se Ejoy Redzuan (derde groep 2) op die baan. Redzuan wen dié ronde, maar verloor teen McIlroy in die halfeindstryd.In die tweede uitklopstryd bederf Tony Cheung van Hongkong China (tweede groep 1) die Skot Martyn Rice (tweede groep 2) se kanse om na die semifinaal teen Schraner te vorder. Cheung verloor egter in die finaal teen McIlroy. McIlroy maak net soos Edwards by die vroue om die tweede wêreldtitel vir Nieu-Seeland te wen, met Cheung tweede terwyl Redzuan en Schraner die derde posisie inneem.Argentinië (mans) en Switserland (vroue) is die enigste lande wat nie 'n wedstryd in die toernooi kon wen nie. Fidji het net-net dié twyfelagtige eer vrygespring deur een botsing teen Argentinië in te palm.Die stand voor die uitklopfase:Mans groep 1: 1 Shannon McIlroy (Nieu-Seeland), 2 Tony Cheung (Hongkong), 3 Clive McGrear (eiland Man), 4 Will Esterhuizen (Namibië), 5 Ozkan Akar (Turkye). Mans groep 2: 1 Lee Schraner (Australië), 2 Martyn Rice (Skotland), 3 Ejoy Redzuan (Maleisië), 4 Wayne Rittmuller (RSA), 5 Charlie Herbert (VSA).Vroue groep 1: 1 Jo Edwards (Nieu-Seeland), 2 Tammy Tham (Singapoer), 3 Dee Hoggan (Skotland), 4 Colleen Orr (Aus), 5 Leone du Rand (RSA). Vroue groep 2: 1 Alyami Jamil (Maleisië), 2 Marietjie van den Bergh (Namibië), 3 Anne Nunes (VSA), 4 Carmen Anderson (Norfolk-eiland), 5 Patsorn Bryant (Thailand).Die algehele finale stand:Mans: 1 Shannon McIlroy, 2 Tony Cheung, 3 Lee Schraner en Ejoy Redzuan, 5 Clive McGreal en Martyn Rice. Vroue: 1 Jo Edwards, 2 Alyani Jamil, 3 Tammy Tham en Dee Hoggan, 5 Marietjie van den Bergh en Anne Nunes.

Nieu-Seelanders rol die wêreld dronk

Kommentaar

Republikein 2025-06-20

Meld asseblief aan om kommentaar te lewer

Nieu-Seelanders rol die wêreld dronk

Kommentaar

Republikein 2025-06-20

Meld asseblief aan om kommentaar te lewer

MELD AAN

Advertensie