Nóg reën kom

Elvira Hattingh en Tanja Bause – Goeie neerslae het die naweek oor die noordoostelike en suidelike dele van die land geval. Die weerkantoor het ? weerwaak uitgereik vir hewige storms wat vandeesweek oor hierdie dele kan voorkom, maar die reënvalsyfers op sommige plekke in die land lyk droewig.
Goeie nuus is dat nog reën vanaf 25 Januarie tot 4 Februarie oor die grootste dele van die land verwag word, met droë lug wat oor die verre oostelike dele in sirkulasies sal wees.
Dit is goeie nuus vir die land se opgaardamme, wat volgens mnr. Johaness Shigwedha, hoof van korporatiewe kommunikasie by NamWater, tot dusver nog geen noemenswaardige toevloei gehad het nie.
Terselfdertyd dui amptelike rekords daarop dat die verre Noorde van Namibië tot dusver die swakste reënseisoen in vyf jaar ervaar, terwyl Windhoek sedert die begin van Desember bo-normale reën ontvang. Ondangwa, Rundu, Grootfontein en Katima Mulilo het dusver die minste reën sedert 2010 ontvang, met laasgenoemde twee dorpe wat die ergste geraak word.
Volgens reënvalsyfers wat die naweek op Namibië Boere se Facebookblad verstrek is, het Omitara 46 mm gehad. Op die pad na Steinhausen is 38 mm aangeteken en op Summerdown is 55 mm gemeet. Hochfeld het 20 mm en Hardap het 20 mm aangeteken en tussen Grootfontein en Rundu is ook 20 mm gemeet. Die plaas Weshof tussen Witvlei en Omitara het 41 mm reën gehad terwyl 10 mm op die plaas Sarie Marais by Gobabis gemeet is. Nog ‘n leser het per SMS laat weet dat Otavi Sondagnag 50 mm ontvang het. Op die plaas Ovisume 65 km suid van Grootfontein het dit 80 mm gereën.
Mnr. Odillo Kgobetsi, hoofvoorspeller by die Namibiese weerdiens, sê die amptelike reënvalsyfers vir Sondag was 29,6 mm vir Rundu, 2,2 mm in Windhoek, 12 mm by die Internasionale Lughawe Hosea Kutako, 43 mm op Gobabis, 26 mm op Maltahöhe, 13 mm op Goedemoed, 21 mm op Steenboklaagte en 22 mm op Koes.
Volgens die amptelike syfers vir Saterdag het Rundu 8,5 mm ontvang, Grootfontein 4,4 mm en Aranos 22,9 mm. Keetmanshoop het 14,2 mm ontvang, met Okamapu, oos van Okahandja, wat 85 mm ontvang het. Aminuis het 30 mm ontvang. Vrydag, 15 Januarie, het dit 12 mm by die Rundu-lughawe gereën en 15,4 mm op Gobabis.
Groot dele van die land wag egter nog op die eerste reën. Volgens inskrywings op Namibië Boere is Karasburg, Ariamsvlei, Grünau en Warmbad in die Suide nog baie droog en het geen reën oos van Gibeon geval nie, terwyl dit glo duskant Stampriet slegs 30 mm vanaf 1 November gereën het. Die Mariental- en Aroab-omgewing wag ook nog op die eerste reën. Suid van Maltahöhe, by Lisbon, het daar tot dusver enkele druppels geval.
In die sentrale dele is dit plek-plek nog baie droog. Naby Imkerhof, Okahandja, het dit vanaf November nog net 36 mm gereën en by Seeis ook net 33 mm vanaf November. Op Swartkoppies, noordoos van Rehoboth, het dit ook nog net 34 mm sedert November gereën en die Kalkrand-Schlip-gebied is ook baie droog.
Ná Kersfees het dit glo nog net 28 mm op Epukiro, noordoos van Gobabis gereën. ‘n Boer 120 km suid van Gobabis sê hulle het 11 mm, 20 mm en 7 mm weke uitmekaar ontvang, maar dat daar nog geen groenigheid opgekom het nie. Nog ‘n boer suid van Gobabis sê hulle het 16 mm op 27 Desember en 14 mm op Sondag 17 Januarie gekry.