Nóg ’n weesollie gered

Francoise Steynberg – Nóg ’n weesolifantjie is van ’n gewisse dood gered toe sy ma in die Hoanibrivier omgekom het. Okutala Etosha Lodge het tot die agt maande oue bulkalfie se redding gekom toe sy 50-jarige ma dood is en hy wees agtergelaat is. “Hy sou beslis van honger en dors omgekom het of deur roofdiere gevang word,” het die lodge se videovervaardiger, Caleb Cindano, aan Republikein gesê. “Ons het op 23 Desember ’n oproep van ’n beampte van die ministerie van die omgewing en toerisme ontvang dat ’n olifantkoei met ’n kalf in die Hoanibrivier in die Noordweste besig is om dood te gaan,” sê Cindano.Terwyl ’n rondloperolifantbul vakansiegangers aan die kus op Oukersdag verras het, moes dié lodge swoeg on die reddingsoperasie te beplan.VEILIGE HAWEOkutala Etosha Lodge, sowat 40 km van die Etosha Nasionale Park se Andersson-hek, is ’n veilige hawe vir weesdiere – wild én mak. Verlede jaar is vier weesolifante op die lodge vrygelaat. Die lodge is ook die astrante driejarige olifantversie, Frida, en haar beste tjom, die eenjarige skaap, Amor, se tuiste.Frida is van die Puros-omgewing in die Noordweste, waar haar ma aan natuurlike oorsake dood is en sy wees gelaat is.Die lodge se buurman het Amor geskenk om Frida geselskap te hou sodat sy nie van eensaamheid omkom nie. REDDINGSOPERASIEDie lodge se veearts, dr. Simone Herzog, hul hoofbestuurder, Riaan van Zyl, Cindano, en die toergids PJ Breytenbach het omstreeks 11:00 op Oukersdag die lang pad na die Hoanibrivier met twee bakkies aangepak. Dit was reëntyd in die Noordweste met verskeie riviere wat in vloed was. “Ons moes op pad nog verskeie voertuie uittrek wat in die riviere vasgesit het,” vertel Van Zyl. In die Hoanibrivier is hulle deur ’n hartseer toneel begroet. Die verwese olifantbulletjie het honger en dors by sy ma rondgedrentel, wat intussen gesterf het. Volgens Herzog was die koei ouer as 50 en het sy reeds geboorte aan vier olifantkalfies geskenk. Dié matriarg is vermoedelik aan natuurlike oorsake dood.Die veearts het dadelik vir die wesie suikerwater gegee om hom te versterk. Hy is Goliath gedoop omdat sy pa glo die grootste woestynaangepaste olifantbul in die omgewing is. Herzog het hom ’n kalmeermiddel ingespuit en die hele 600 km terug na Okutala Lodge saam met hom agterop die bakkie gesit om na sy welstand om te sien. Kersdag het die reddingspan omstreeks 03:30 op die lodge aangekom. Goliath het nie op hom laat wag nie en wou dadelik ’n bottel melk hê. Herzog het by hom in die rehabilitasiekamp geslaap en sê die kalfie het ’n gesonde eetlus. NUUSKIERIGIntussen het Frida en Amor, wat sedert Augustus 2019 in die rehabilitasiekamp langsaan bly, nuuskierig oor hul nuwe besoeker geraak.Amor het deur hul kampheining gespring om Goliath welkom te heet. Hy het met sy slurpie teruggegroet.Republikein was op 3 Januarie op die lodge met Goliath, Frida en Amor se eerste ontmoeting. Herzog het vir hulle voer op verskillende plekke in een kamp neergesit sodat hulle nie koppe (of hul groot voete) oor kos hoef te stamp nie. Goliath se bottel melk is ook gereed gehou.Die ontmoeting het vreedsaam verloop met Frida lyk of sy haar lyf ousus vir Goliath probeer hou. Amor is die vredeliewende bemiddelaar. Die veearts sal Goliath mettertyd meer saam met Frida en Amor laat loop. Sy sal die nuwe driemanskap monitor voor hulle later in een kamp saam sal bly. “Die hoofdoel is om oor sowat vyf jaar die twee flapore weer in die gebied van woestynaangepaste olifante vry te laat, waar hulle vandaan kom,” sê Cindano. Dié besluit sal in oorleg met die ministerie van die omgewing en toerisme gedoen word. Die tweede opsie is om die twee later op Okutala Etosha Lodge saam met die ander vrygelate olifante te laat loop. Intussen heers ’n mooi nuwe vriendskapsband tussen twee weesolifante en ’n skaap. - francoise@republikein.com.na

Nóg ’n weesollie gered

Kommentaar

Republikein 2025-05-01

Meld asseblief aan om kommentaar te lewer

Nóg ’n weesollie gered

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie