Nóg ’n skoolskietery in Amerika

Dit is die jongste voorval van vuurwapengeweld in die VSA waar dit 'n algemene verskynsel geword het.

’n Tienerseun (15) van Benton in Kentucky in Amerika wat Dinsdag twee medeleerlinge doodgeskiet en nog talle gewond het, gaan aangekla word van twee klagte van moord en verskeie klagte van poging tot moord.

Die motief vir die skietery is nog nie bekend gemaak nie, maar die owerhede meen hy het alleen opgetree.

Die seun, wie se naam nog nie amptelik bekend gemaak is nie, het Dinsdag voor die aanvang van die skooldag ’n vuurwapen uitgehaal en begin skiet.

Hy het kort voor 08:00 in ’n gemeenskaplike terrein van die Marshall County-hoërskool op leerlinge losgebrand, sê verskeie ooggetuies.

Dié slagting in ’n skool van sowat 1 150 leerlinge in ’n landelike gebied is die jongste voorval van vuurwapengeweld in Amerika, waar dít ’n algemene verskynsel geword het.

Bailey Hope (15) en Preston Cope (15) is doodgeskiet.

Vyf van die beseerdes is in ’n ernstige toestand, maar die hospitaal verwag dat almal wat gewond is, sal oorleef.

Bryson Conkwright, ’n ooggetuie, het aan die TV-stasie WKRN gesê hy het gesien hoe die skieter die vuurwapen uitgehaal het.

“Ek het eers nie geweet wat aangaan nie. Teen die tyd dat dit by my geregistreer het, het hierdie ou daar gesit en die sneller op almal van ons getrek.

“Ek kan die skote hoor. Hy het in ons groep ingeskiet,” sê Conkwright en wys waar die koeël sy hand skrams getref het.

Die Kentucky-polisie het aanvanklik gesê benewens die twee wat dood is, is 14 leerlinge gewond. Hulle het egter later bevestig nog 15 leerlinge is gewond.

Al die beseerdes is tussen 14 en 18 jaar oud.

Een van die leerlinge is met ’n gebreekte kaak in die hospitaal opgeneem nadat hy geval en op getrap is terwyl hy van die skieter probeer vlug het.

Jeff Edwards, aanklaer van Marshall-distrik, wat self ’n leerling in dié skool was, is na die toneel. Rugsakke, selfone en klere het rondgelê waar die skietery plaasgevind het.

“Almal het alles net so gelos toe dit gebeur het. Om die wanorde te sien, laat die gebeure insink,” sê Edwards.

Verskeie kerke het Dinsdagaand nagwake gehou. Nog ’n oudleerling sê sy weet nie hoe sy haarself “moet begin genees nie” en sy weet nie hoe die leerlinge gaan genees nie omdat hulle elke dag na die skool moet terugkeer.

Matt Bevin, goewerneur van Kentucky, is op ’n mediakonferensie deur emosie oorweldig. “Daar is geen goeie antwoord hieroor nie,” sê hy.

Die verdagte is volgens hom op ’n “niegewelddadige” wyse by die skool in hegtenis geneem, maar hy het nie daaroor uitgewei nie.

Die polisie het leerlinge aan die skool onlangs opgelei oor hoe om sulke situasies te hanteer. Die owerhede loof die polisie dat hulle gou op die toneel was en die verdagte aangekeer het.

Helikopters het vyf slagoffers, waaronder Cope wat later aan sy wonde beswyk het, na die naaste traumasentrum, sowat 190 km weg in Nashville, Tennessee, geneem.

Sarah Sanders, woordvoerder van die Withuis, sê pres. Donald Trump is oor die skietvoorval ingelig. “Ons gedagtes en gebede is by die slagoffers en hul families,” sê sy. - Netwerk24/Nampa/Reuters